រាជធានីភ្នំពេញ ៖ ខណៈការផ្គង់ផ្គង់ថាមពលអគ្គិសនីក្នុងស្រុកមិនទាន់គ្រប់គ្រាន់ កម្ពុជាបានទិញថាមពលអគ្គិសនីប្រទេសជិតខាងមកបំពេញបន្ថែម រួមមានពីប្រទេសថៃ, វៀតណាម និងឡាវជាដើម ហើយបើគិតជាទំហំនាំចូលអគ្គិសនីក្នុងឆ្នាំ២០១៧មានប្រមាណជាង១.៤០០លានគីឡូវ៉ាត់ម៉ោង គិតជាទឹកប្រាក់ជិត២០០លានដុល្លារអាមេរិក ។ នេះបើតាមមន្ត្រីជាន់ខ្ពស់នៃអាជ្ញាធរអគ្គិសនីកម្ពុជា ។
លោក ទី នរិន្ទ ប្រធានអាជ្ញធរអគ្គិសនីកម្ពុជា បានមានប្រសាសន៍ថា នៅក្នុងឆ្នាំ២០១៧កន្លងទៅនេះ តម្រូវការប្រើប្រាស់អគ្គិសនីក្នុងប្រទេសបានកើនឡើងដល់៧.៩០០លានគីឡូវ៉ាត់ម៉ោង ក្នុងនោះការផលិតក្នុងស្រុកបានប្រមាណតែជាង៧២%ប៉ុណ្ណោះ ដូចនេះ កម្ពុជាត្រូវទិញអគ្គិសនីពីប្រទេសជិតខាងមកបំពេញតម្រូវការ ហើយក្នុងឆ្នាំ២០១៧កម្ពុជាបានទិញចូលប្រមាណ១៨%មកបំពេញតម្រូវការ ។
លោកបន្តថា ក្នុងឆ្នាំ២០១៧ អនុភាពសរុបនៃប្រភពអគ្គិសនីដែលកម្ពុជា មានបានកើនឡើងពី២.១១៥មេហ្កាវ៉ាត់ មក២.២៨៣មេហ្កាវ៉ាត់។ រីឯថាមពលអគ្គិសនីដែលបានប្រើប្រាស់កើនឡើងពី៧.១៧៥លានគីឡូវ៉ាត់ម៉ោងនៅឆ្នាំ ២០១៦ ដល់៧.៩៦៦លានគីឡូវ៉ាត់ម៉ោង នៅឆ្នាំ២០១៧ ។ លោកថា ៖« បរិមាណដែលអគ្គិសនីបានមកពីការផលិតក្នុងស្រុកបានកើនឡើងពី៧៧,៩%ក្នុងឆ្នាំ២០១៦ដល់៨១,៤%ក្នុងឆ្នាំ២០១៧ ។ រីឯបរិមាណថាមពលអគ្គិសនីដែលយើងបានទិញពីប្រទេសជិតខាងបានថយចុះពី២២%នៃតម្រូវការក្នុងឆ្នាំ២០១៦ មកនៅត្រឹម១៨,៦%នៃតម្រូវការវិញក្នុងឆ្នាំ២០១៧ »។
លោកបន្ថែមថា បើតាមសមត្ថភាពពីវារីអគ្គិសនីរបស់កម្ពុជា ឃើញថា នៅរដូវវស្សាមានថាមពលអគ្គិសនីពេញបន្ទុក ឬអាចនិយាយបានថា ទោះមិននាំចូល ក៏អាចផ្គត់ផ្គត់គ្រប់គ្រាន់ដែរ តែនៅពេលរដូវប្រាំងវិញ ប្រភពថាមពលដែលបានមកពីវារីអគ្គិសនីនានាបានធ្លាក់ចុះ ដូចនេះហើយត្រូវការនាំចូលពីប្រទេសជិតខាងមកផ្គត់ផ្គង់ បើមិនអីចឹងទេ មិនមានថាមពលគ្រប់គ្រាន់សម្រាប់ផ្ដល់ទៅតាមតម្រូវការនោះទេ ។
លោកនិយាយថា ៖« តាមពិតទៅ នៅពេលដែលវារីអគ្គិសនីយើងសង់រួចរាល់ យើងអាចមានភ្លើងសល់ ហើយអាចលក់ទៅប្រទេសជិតខាង ក៏ប៉ុន្តែគេនឹងមិនទិញយើងទេ ព្រោះគេមានភ្លើងគ្រប់គ្រាន់ហើយ »។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏បានមានប្រសាសន៍ផងដែរ ការអភិវឌ្ឍវិស័យអគ្គិសនីរបស់កម្ពុជាសម្រេចបានលទ្ធផលលឿនជាង និងល្អជាងការប៉ាន់ស្មាន របស់អ្នកសិក្សាស្រាវជ្រាវ ។ ជាក់ស្ដែង ក្នុងរយៈពេល១៥ឆ្នាំកន្លងមកនេះ អនុភាពប្រភពអគ្គិសនីដែលបានអភិវឌ្ឍន៍បានកើនឡើង១១,៤ដង ធ្វើឲ្យកម្ពុជាមានប្រភពអគ្គិសនីសម្រាប់ផ្គត់ផ្គង់ឱ្យការប្រើប្រាស់ទូទាំងប្រទេសគ្រប់គ្រាន់ និងទាន់តាមកំណើននៃការប្រើប្រាស់ ។
លោករដ្ឋមន្ត្រីថ្លែងថា ៖« នៅចុងឆ្នាំ ២០១៧កន្លងទៅនេះ ការអភិវឌ្ឍបណ្ដាញបញ្ជូនអនុស្ថានីយ និងបណ្ដាញបញ្ជូនរងនៅកម្ពុជា បានធ្វើឲ្យប្រព័ន្ធបណ្ដាញជាតិអាចភ្ជាប់បញ្ចូលនូវប្រភពអគ្គិសនីដែលបានអភិវឌ្ឍទាំងអស់បញ្ចូលគ្នា »។
លោកបន្តថា មិនយូរទៀតទេ លំនៅឋានប្រជាពលរដ្ឋទូទាំងប្រទេស នឹងមានអគ្គិសនីប្រើប្រាស់ ហើយនៅដំណាក់កាលនោះ មន្ត្រីនៃអគ្គិសនីទាំងអស់ នឹងត្រូវពង្រឹងពីគុណភាពអគ្គិសនីជូនអ្នកប្រើប្រាស់ ពោលគឺពេលនោះ ត្រូវតែធានាមិនមានការរអាក់រអួល ឬដាច់ភ្លើងញឹកញាប់ជាដើម ។
គួរបញ្ជាក់ថា ក្នុងឆ្នាំ២០១៧ ប្រទេសទាំង៣ដែលកម្ពុជានាំចូលថាមពលអគ្គិសនី រួមមាន ថៃ នាំចូលចំនួន២៦៩,៥៦លានគីឡូវ៉ាត់ម៉ោង , រៀតណាមចំនួន១.១៥៣,៨៥លានគីឡូវ៉ាត់ម៉ោង និងឡាវចំនួន៥៦,៥២លានគីឡូវ៉ាត់ម៉ោង ៕
ចែករំលែកព័តមាននេះ