រាជធានីភ្នំពេញ ៖ ប្រជាពលរដ្ឋកម្ពុជាចាប់ផ្ដើមមានចំណាប់អារម្មណ៍ និងចង់ផ្លាស់មកស្នាក់នៅក្នុងអគារសហកម្មសិទ្ធិ ឬខុនដូកាន់តែច្រើន ធ្វើឲ្យកំណើននៃការផ្គត់ផ្គង់ខុនដូកម្ពុជា ពិសេសនៅរាជធានី ក៏មានច្រើនដែរ ។ ជាក់ស្ដែង នៅរយៈពេល២-៣ឆ្នាំចុងក្រោយនេះ ការវិនិយោគលើអគារខុនដូ ទាំងទុនពីខាងក្រៅ និងទុនក្នុងស្រុកមានកំណើនជាបន្តបន្ទាប់ ។ ទោះបីយ៉ាងណា ខុនដូដែលមានការគាំទ្រ និងមានទីផ្សារច្រើន គឺប្រភេទខុនដូតម្លៃមធ្យម ចំណែកខុនដូតម្លៃខ្ពស់ៗនោះហាក់នៅទ្រឹងនៅឡើយ ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គី បានឲ្យដឹងថា ទីផ្សារខុនដូនៅកម្ពុជាហាក់នៅនឹងបន្តិចមួយរយៈចុងក្រោយនេះ ក៏ប៉ុន្តែខុនដូប្រភេទខ្លះទៀតនៅតែលក់ដាច់ជាបន្តបន្ទាប់ ។ លោកថា ៖« ខុនដូដែលមានតម្លៃខ្ពស់ៗមិនសូវមានអ្នកទិញច្រើនប៉ុន្មានទេនៅពេលនេះ តែខុនដូតម្លៃមធ្យមនៅតែលក់ដាច់ជាហូរហែដដែល ព្រោះខុនដូប្រភេទនេះ គឺផ្ដោតទៅលើអតិថិជនជាជនជាតិខ្មែរ ។ ម្យ៉ាងទៀត ប្រជាពលរដ្ឋខ្មែរក៏មិនសូវមានធនធានខ្លាំង ដែលអាចទិញខុនដូតម្លៃខ្ពស់ៗច្រើនបានដែរ គឺភាគច្រើនទិញខុនដូតម្លៃមធ្យម » ។
លោកបន្តថា ការវិនិយោគលើខុនដូនៅតែមាន ហើយវិនិយោគិនក៏នឹងមិនផ្អាកត្រឹមនេះដែរ ប៉ុន្តែមានវិនិយោគិនខ្លះសង់ខុនដូទំនើបៗ និងមានតម្លៃខ្ពស់សម្រាប់ពេលអនាគត ហើយវិនិយោគិនខ្លះទៀតសង់ខុនដូតម្លៃមធ្យមសម្រាប់អ្នកមានចំណូលមធ្យម និងអាចបង់រំលស់បានប្រចាំខែ ឬជាដំណាក់កាល ។ ទីផ្សារខុនដូនៅតែត្រូវការជាបន្តបន្ទាប់ ដោយសារតែប្រជាពលរដ្ឋខ្មែរដែលធ្លាប់ទៅរស់នៅបរទេស ហើយត្រឡប់មកវិញចង់រស់នៅក្នុងខុនដូ ក៏ប៉ុន្តែពួកគាត់ភាគច្រើនអាចទិញបានត្រឹមខុនដូតម្លៃសមរម្យ និងមិនអាចទិញតម្លៃខ្ពស់បានច្រើនគ្នាទេ ។
លោកបន្ថែមថា សម្រាប់អ្នកវិនិយោគលើវិស័យខុនដូ លោកផ្ដល់ជាមតិឲ្យវិនិយោគលើខុនដូតម្លៃមធ្យម ទើបអាចរកទីផ្សារសម្រាប់ប្រជាពលរដ្ឋខ្មែរបានច្រើន ក៏ប៉ុន្តែបើអ្នកដែលផ្តោតលើអតិថិជនមកពីបរទេស គួរសង់ខុនដូមានតម្លៃខ្ពស់ តែត្រូវមានស្តង់ដាត្រឹមត្រូវនិងទំនើបដូចនៅបរទេសដែរ ។ លោកថា៖« អ្វីដែលវិនិយោគិនបរទេសត្រូវគិត មុននឹងវិនិយោគលើអគារខុនដូលំដាប់ខ្ពស់នៅកម្ពុជា គឺត្រូវស្វែងរកទីតាំងល្អ កន្លែងណាមានសក្ដានុពលសម្រាប់ការរស់នៅ និងពាណិជ្ជកម្ម ព្រោះថា ការសង់ខុនដូសំខាន់បំផុតនៅកម្ពុជា គឺផ្តោតលើទីតាំងនេះឯង » ។
បើតាមបុគ្គលិកផ្នែកលក់ខុនដូមួយនៅរាជធានីភ្នំពេញ ក៏បានឲ្យដឹងដែរថា បច្ចុប្បន្ននេះ ការលក់ខុនដូនៅតែមានជាហូរហែអីចឹងដែរ ក៏ប៉ុន្តែខុនដូដែលលក់ដាច់ គឺមានតម្លៃចន្លោះពី៤ម៉ឺន ទៅ៥ម៉ឺនដុល្លារអាមេរិក ហើយអតិថិជនជាជនជាតិខ្មែរ ។ ចំណែកខុនដូមានតម្លៃខ្ពស់ៗ រាប់សិបម៉ឺនដុល្លារលក់មិនសូវដាច់ទេ មានមួយៗប៉ុណ្ណោះ ។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា វិស័យសំណង់ និងលំនៅឋាននៅកម្ពុជា បានងើបឡើងវិញក្រោយពីឆ្នាំ២០០៨ និង២០០៩មក ។ រយៈពេល៧ឆ្នាំប៉ុណ្ណោះគ្រាន់តែទុនវិនិយោគពីលំនៅឋាន ដែលក្រសួងសេដ្ឋកិច្ច និងហិរញ្ញវត្ថុ បានចេញអាជ្ញាប័ណ្ណជូនមានចំនួនប្រមាណ៣.៣៧៥លានដុល្លារអាមេរិក ក្នុងនោះក្រសួងបានចេញអាជ្ញាប័ណ្ណជូនបុរីចំនួន១៣២គម្រោង ស្មើនឹង៣១.៩៩៧ផ្ទះ, អគារសហកម្មសិទ្ធិ ឬអគារស្នាក់នៅរួម មាន៨១គម្រោង ស្មើនឹង២៩.៦១២យូនីត ។
យោងតាមក្រុមហ៊ុនវែបសាយអចលន ទ្រព្យដែលរៀបចំព្រឹត្តិការណ៍តាំងបង្ហាញពិព័រណ៍អចលនទ្រព្យ កាលពីពេលថ្មីៗនេះបានឲ្យដឹងថា ក្នុងរយៈពេល២ថ្ងៃនៃការតាំងបង្ហាញពិព័រណ៍អចលនទ្រព្យ ដោយចូលរួមពីបណ្ដាក្រុមហ៊ុនលក់ខុនដូនានានោះ មានអ្នកទិញ និងកក់ខុនដូចំនួន១៣៣យូនីត ក្នុងនោះគិតជាទឹកប្រាក់ប្រមាណ២០លានដុល្លារអាមេរិក ។ ក្រុមហ៊ុននេះបង្ហាញផងដែរថា ក្នុងចំណោមអតិថិជនទិញខុនដូ មាន៤០%ជាជនជាតិចិន, ៤០%ជនជាតិខ្មែរ និង២០% ទៀតជនជាតិផ្សេងៗ ៕
ចែករំលែកព័តមាននេះ