កាស៊ីណូនៅខេត្តព្រះសីហនុនឹងកើនដល់ជាង20កន្លែង
រាជធានីភ្នំពេញ ៖ កំណើនវិនិយោគ និងការមកដល់នៃភ្ញៀវទេសចរចិន ព្រមទាំង
រាជធានីភ្នំពេញ ៖ កំណើនវិនិយោគ និងការមកដល់នៃភ្ញៀវទេសចរចិន ព្រមទាំងការអភិវឌ្ឍហេដ្ឋារចនាសម្ព័ន្ធនានា បានធ្វើឲ្យចំនួនកាស៊ីណូនៅខេត្តព្រះសីហនុ នឹងកើនឡើងដល់២៤កន្លែងនៅពេលឆាប់ៗខាងមុខនេះ ស្របពេលមនុស្សមួយចំនួនចាប់ផ្តើមប្រដូចខេត្តនេះ ជាទីក្រុងម៉ាកាវទី២ ។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន បានថ្លែងតាមទូរស័ព្ទកាលពីព្រឹកថ្ងៃទី១៨ កញ្ញា កន្លងមកថា បច្ចុប្បន្ននេះ ខេត្តព្រះសីហនុមានកាស៊ីណូចំនួន១៨ទៅ១៩កន្លែងកំពុងដំណើរការ និងកាស៊ីណូមួយចំនួនទៀតកំពុងសាងសង់ ហើយរំពឹងនឹងបញ្ចប់នៅពេលឆាប់ៗនេះ ដែលធ្វើឲ្យចំនួនកាស៊ីណូនឹងកើនដល់២៣ ទៅ២៤កន្លែងនាពេលខាងមុខ ។
លោកបន្តថា វិនិយោគិនកាស៊ីណូភាគច្រើនជាជនជាតិចិន ព្រោះបច្ចុប្បន្ន ជនជាតិចិនស្នាក់នៅរយៈពេលវែង និងរយៈពេលខ្លីនៅខេត្តនេះ មានជាង៤ពាន់នាក់ ។
លោកបន្តថា ៖« ដោយសារខេត្តព្រះសីហនុកាន់តែមានភាពរីកចម្រើន និងការមកដល់របស់ភ្ញៀវជាតិ-អន្តរជាតិច្រើន យើងបានពង្រឹងសន្តិសុខសណ្តាប់ធ្នាប់ជាប្រចាំ ដើម្បីធានាបាននូវសន្តិសុខ សុវត្ថិភាពជូនភ្ញៀវជាតិ អន្តរជាតិ និងអ្នកវិនិយោគនានា » ។ លោកបន្តថា ៖«ការអនុវត្តច្បាប់ យើងធ្វើទាំងអស់គ្នា មិនថាប្រជាពលរដ្ឋក្នុងស្រុក ឬភ្ញៀវបរទេសនោះទេ » ។
ក្រៅពីភ្ញៀវ និងវិនិយោគិន នៅខេត្តព្រះសីហនុក៏មានកម្មករកំពុងធ្វើការក្នុងវិស័យសំណង់ទាំងខ្មែរ និងចិនជាង២ពាន់នាក់ផងដែរ ។
អភិបាលខេត្តព្រះសីហនុ លោក យន្ត មីន បានថ្លែងដែរថា ភ្ញៀវទេសចរ និងវិនិយោគិនចិនបានចេញចូលខេត្តព្រះសីហនុច្រើន ។ រហូតមកទល់ពេលនេះ ចំនួនកាស៊ីណូបានកើនឡើងជាង២០កន្លែង ដែលធ្វើឲ្យខេត្តខ្វះបន្ទប់សម្រាប់ភ្ញៀវទេសចរក្នុងស្រុក និងភ្ញៀវអន្តរជាតិ នាចុងសប្តាហ៍ផងដែរ ។
លោកបន្តថា ៖« ខេត្តព្រះសីហនុពិតជាកំពុងរីកចម្រើនយ៉ាងលឿន ដោយសារសក្តានុពលរបស់ខេត្ត ដូចជា ព្រលានយន្តហោះ កំពង់ផែផ្លូវគោក វិស័យទេសចរណ៍ ហើយឆ្នេរកម្ពុជាក្លាយជាសមាជិកក្លិបឆ្នេរស្អាតជាងគេនៅលើពិភពលោកជាដើម » ។
លោកឧកញ៉ា ឡៅ ហេង អគ្គនាយកសណ្ឋាគារអូឈើទាល កម្រិតផ្កាយ៤ ខេត្តព្រះសីហនុ បានថ្លែងផងដែរថា ដោយសារកំណើនភ្ញៀវទេសចរមានសភាពយឺត លោកបានសហការជាមួយវិនិយោគិនចិនដើម្បីកែប្រែសណ្ឋាគាររបស់លោកជាកាស៊ីណូវិញ ព្រោះលោករំពឹងថា វិស័យនេះនឹងរីកចម្រើននាពេលអនាគត ។
លោកបន្តថា ព្រះសីហនុ ជាទីក្រុងតូចមួយ ដូច្នេះ វិនិយោគិនដាក់លុយចូលតែពី៣០០ ទៅ៥០០លានដុល្លារ នឹងធ្វើឲ្យខេត្តនេះមានសភាពលេចធ្លោ ប៉ុន្តែអ្វីដែលលោកបារម្ភគឺខ្លាចនយោបាយចិនប្រែប្រួល នឹងធ្វើឲ្យយើងពិបាក ។ ផ្ទុយទៅវិញ ប្រសិនជាវិនិយោគិនចិនបោះទុនធំៗ និងមានគោលដៅអភិវឌ្ឍន៍រយៈពេលវែង វានឹងធ្វើឲ្យការអភិវឌ្ឍក្នុងខេត្តនេះមាននិរន្តរភាព ។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានថ្លែងថា ដោយសារលំហូរទុនវិនិយោគដោយផ្ទាល់ពីបរទេស កត្តាសន្តិសុខ ស្ថិរភាពនយោបាយ និងកំណើនសេដ្ឋកិច្ច បានធ្វើឲ្យខេត្តនេះរីកចម្រើនយ៉ាងឆាប់រហ័ស ក៏ដូចជាសក្តានុពលមានស្រាប់របស់ខេត្ត និងផែនការអភិវឌ្ឍរបស់រាជរដ្ឋាភិបាល ។
លោកបន្តថា ៖« ជាមួយនឹងកំណើននៃការវិនិយោគបានធ្វើឲ្យតម្លៃអចលនទ្រព្យក្នុងខេត្តនេះកើនឡើងទ្វេដង ឬលើសពីនេះនៅតាមតំបន់មួយចំនួន ហើយចលនាទិញ-លក់កំពុងមានសកម្មភាពខ្លាំង » ។
លោកបន្ថែមថា ៖« ការរីកចម្រើន នឹងធ្វើឲ្យខេត្តនេះក្លាយជាកន្លែងផលិតមួយដើម្បីនាំចេញទៅកាន់បរទេសផងដែរ ដោយសារមានកំពង់ផែទឹកជ្រៅ ព្រលានយន្តហោះអន្តរជាតិ និងការដឹកជញ្ជូនតាមផ្លូវគោកកាន់តែងាយស្រួល» ។
យោងតាមគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥-២០២៥ ដែលបានប្រកាសដាក់ឲ្យប្រើប្រាស់ពីកាលពីខែតុលា ឆ្នាំ២០១៥ រាជរដ្ឋាភិបាលបានដាក់ខេត្តព្រះសីហនុទាំងមូលជាតំបន់ឧស្សាហកម្មដើម្បីសម្រួលដល់ការនាំចេញ ៕
ចែករំលែកព័តមាននេះ