រាជធានីភ្នំពេញ ៖ ការធ្វើស្រែតាមរយៈការចុះកិច្ចសន្យារវាងអ្នកផលិត និងឈ្មួញប្រមូលទិញស្រូវសម្រាប់នាំចេញ ទំនងជាដំណោះស្រាយមួយសមស្រប និងទទួលយកបានសម្រាប់ទាំងអស់គ្នា ដើម្បីធានាបាននូវវិស័យ
រាជធានីភ្នំពេញ ៖ ការធ្វើស្រែតាមរយៈការចុះកិច្ចសន្យារវាងអ្នកផលិត និងឈ្មួញប្រមូលទិញស្រូវសម្រាប់នាំចេញ ទំនងជាដំណោះស្រាយមួយសមស្រប និងទទួលយកបានសម្រាប់ទាំងអស់គ្នា ដើម្បីធានាបាននូវវិស័យស្រូវអង្កររបស់កម្ពុជា ដែលប្រឈមនឹងការប្រកួតប្រជែងកាន់តែខ្លាំង ។
ជាមួយគ្នានេះ ការដាក់ចេញនូវគោលនយោបាយនេះរបស់ក្រសួងកសិកម្ម រុក្ខាប្រមាញ់ និងនេសាទ និងវិស័យឯកជន ពួកគេបាននិងកំពុងចាប់ផ្តើមពួតដៃគ្នាអនុវត្តគោលនយោបាយធ្វើស្រែតាមបែបកិច្ចសន្យាជាមួយប្រជាកសិករ តាមរយៈការសហការពីម្ចាស់រោងម៉ាស៊ីនកិនស្រូវនានានៅតាមបណ្តាខេត្ត ក្រោមការសម្របសម្រួលពីអន្តរមន្ទីរពាក់ព័ន្ធក្នុងខេត្ត ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងកាលពីពេលថ្មីៗថា គោលនយោបាយនេះ គឺធ្វើនៅតាមខេត្តនីមួយៗ តាមរយៈកិច្ចសហការរវាងកសិករ និងម្ចាស់រោងម៉ាស៊ីនកិនស្រូវ ហើយសម្របសម្រួលការងារដោយគណៈកម្មការអន្តរមន្ទីរ និងគ្រប់គ្រងដោយអន្តរមន្ទីរពាក់ព័ន្ធនៅតាមខេត្ត ហើយអភិបាលខេត្តនីមួយៗនឹងធ្វើជាសាក្សីដើម្បីកុំឲ្យភាគីណាមួយក្បត់ ។ ក្រសួងកំពុងរៀបចំសមាសភាពការងារនេះជាបណ្តើរៗ តាមរយៈការធ្វើយ៉ាងណា ឲ្យសមាគមឬរោងម៉ាស៊ីនកិនស្រូវនៅតាមខេត្តនីមួយៗធ្វើការជាមួយកសិករ និងមន្ទីរពាក់ព័ន្ធក្នុងខេត្ត ។
លោកបន្តថា ៖ « ការរៀបចំធ្វើស្រែតាមបែបចុះកិច្ចសន្យា ជាការជួយកសិករឲ្យមានលំនឹងក្នុងចិត្ត និងជំរុញធ្វើយ៉ាងណា ឲ្យកសិករផលិតពូជសុទ្ធ មានគុណភាពល្អ ដើម្បីងាយស្រួលនាំចេញ និងប្រកួតប្រជែងជាមួយប្រទេសនាំចេញអង្ករនានា » ។
ការប្រមូលផលស្រូវរដូវវស្សាឆ្នាំ២០១៦ ទទួលបានទិន្នផល១០លានតោន ស្មើនឹង១២០%នៃផែនការដាក់ចេញដោយក្រសួង ។
លោក វេង សាខុន បន្តថា ទិន្នផលស្រូវជាមធ្យមកម្ពុជាទទួលបានជាង៤តោនក្នុង១ហិកតា ប៉ុន្តែខេត្តមួយចំនួនទៀតទទួលបានជាមធ្យម៦ទៅ៧តោនក្នុង១ហិកតា អាស្រ័យលើគុណភាពដី និងប្រព័ន្ធស្រោចស្រពនៅតាមទីតាំងជាក់ស្តែង ។
ប្រធានមន្ទីរកសិកម្មខេត្តបាត់ដំបង លោក ឆឹង វិច្ចរ៉ា ឲ្យដឹងថា ប្រសិនជាកសិករធ្វើស្រែតាមបែបចុះកិច្ចសន្យា ពួកគេទទួលបានអត្ថប្រយោជន៍ច្រើនដូចជា ១-ទទួលពូជ និងផលិតបាននូវស្រូវដែលមានគុណភាពល្អ និងខាតបង់តិចតួចនៅពេលប្រមូលផល ។ ២-បើប្រឈមនឹងការខ្វះទុនក្នុងការផលិត ពួកគេអាចទទួលបានទុនពីដៃគូពាក់ព័ន្ធ និង៣-ធ្វើឲ្យកសិករខ្លួនឯងប្រឹងប្រែងដើម្បីផលិតពូជស្រូវសុទ្ធ រក្សាបាននូវគុណភាពនៅពេលប្រមូលផល និងអាចទទួលបានតម្លៃបន្ថែមពីការធ្វើស្រែរបស់ពួកគេ ។
វិស័យឯកជនគាំទ្រគំនិតផ្តួចផ្តើមនេះ ដោយលោក សុង សារ៉ន អគ្គនាយក Amru Rice ជាក្រុមហ៊ុននាំចេញអង្ករធំមួយនៅកម្ពុជា ថ្លែងថា ការដាក់ចេញនូវគោលនយោបាយនេះ របស់ក្រសួងកសិកម្មជារឿងល្អដើម្បីលើកស្ទួយជីវភាពកសិករ និងការទទួលបានអង្ករមានគុណភាពល្អ ។ លោកបន្តថា កន្លងមក ក្រុមហ៊ុនរបស់លោកបានធ្វើស្រែចុះកិច្ចសន្យាជាមួយសហគមន៍កសិករនៅខេត្តមួយចំនួនដូចជា ព្រះវិហារ ពោធិ៍សាត់ បាត់ដំបង និងកំពង់ចាមមួយចំនួនហើយ ។
លោកបន្តថា ៖ « អ្វីសំខាន់ គឺរឿងទីផ្សារ ប្រសិនជាយើងមានទីផ្សារនាំចេញច្រើន យើងអាចធ្វើស្រែចុះកិច្ចសន្យាជាមួយកសិករបានច្រើន ប៉ុន្តែយើងប្រឈមនឹងហានិភ័យនៃការខាតបង់ ប្រសិនជាយើងគ្មានទីផ្សារ » ។ លោកបន្តថា ៖ « ការធ្វើស្រែចុះកិច្ចសន្យាជាមួយកសិករ យើងមិនផ្តល់ទុន ផ្តល់ពូជនោះទេ ហើយក៏មិនកំណត់តម្លៃជាមុនដែរ អ្វីដែលកំណត់ គឺបើកចំហតម្លៃ និងទិញក្នុងតម្លៃជាក់ស្តែងនៅពេលរដូវប្រមូលផលមកដល់ » ។
លោកឧកញ៉ា ភួ ពុយ អគ្គនាយកធនាគារស្រូវកម្ពុជា ថ្លែងថា ដើម្បីដោះស្រាយបញ្ហាប្រឈមលើកង្វះខាតឃ្លាំងស្តុក និងឡសម្ងួតស្រូវ លោកនឹងបោះទុនវិនិយោគជាង១០លានដុល្លារលើផ្នែកនេះនៅឆ្នាំ២០១៧ ។ គម្រោងនេះមានការគាំទ្រពីធនាគារឯកជន និងមួយផ្នែកពីរាជរដ្ឋាភិបាល ព្រោះប្រសិនជាយើងគ្មានឡសម្ងួត និងឃ្លាំងស្តុកស្រូវគ្រប់គ្រាន់ទេ បញ្ហាប្រឈមក្នុងវិស័យនេះមិនអាចដោះស្រាយបានទេ ។
លោកបន្តថា ៖ « ធនាគារស្រូវគ្រោងរៀបចំសហគមន៍កសិករ តាមរយៈការចុះកិច្ចសន្យាជាមួយកសិករ ដើម្បីធ្វើឲ្យផលិតផលកសិកម្មរបស់ពួកគេមានតម្លៃដោយស្ថិរភាព និងមានទីផ្សារ ជាពិសេស បញ្ចៀសបាននូវការក្រឡុកតម្លៃពីក្រុមឈ្មួញកណ្តាល » ។
បច្ចុប្បន្ន នៅកម្ពុជាមានរោងម៉ាស៊ីនកិនស្រូវប្រមាណ២៧០កន្លែង ដែលអាចកិនអង្ករនាំចេញបានប្រកបដោយគុណភាពខ្ពស់ ៕
ចែករំលែកព័តមាននេះ