មិត្តឡាវប្រែក្រឡាស់សម្តីដាក់ទ័ពសាជាថ្មី
ខេត្តស្ទឹងត្រែង ៖ តាមសេចក្តីរាយការណ៍ពីកងកម្លាំងការពារព្រំដែនកម្ពុជាបានឱ្យដឹងថា នៅព្រឹកថ្ងៃទី៦ មេសា ទាហានឡាវមួយក្រុមប្រដាប់ដោយអាវុធគ្រប់ដៃ
ខេត្តស្ទឹងត្រែង ៖ តាមសេចក្តីរាយការណ៍ពីកងកម្លាំងការពារព្រំដែនកម្ពុជាបានឱ្យដឹងថា នៅព្រឹកថ្ងៃទី៦ មេសា ទាហានឡាវមួយក្រុមប្រដាប់ដោយអាវុធគ្រប់ដៃ ត្រូវបានបន្ថែមកម្លាំងរបស់ខ្លួនមកកាន់ព្រំដែនចំណុចដើមល្វា ដែលជាដីកម្ពុជា ។ ការបន្ថែមទ័ពបែបនេះគឺខុសពីកិច្ចព្រមព្រៀងគ្នាដែលបញ្ជាការយោធាខេត្តស្ទឹងត្រែង និងខេត្តចម្ប៉ាសាក់បានចរចាគ្នាសម្រាលភាពតានតឹងដោយផ្អាកការសាងសង់ប៉ុស្តិ៍ ដែលចម្រូងចម្រាសដោយកម្ពុជាផ្អាកធ្វើនៅចំណុចដើមល្វា រីឯឡាវក៏ត្រូវផ្អាកនៅចំណុចដុងក្រឡចាស់ ។ ភាគីទាំង២ ក៏បានសន្យាគ្នាដែរថា នឹងមានការជួបគ្នាដោះស្រាយជាថ្មីទៀតនៅក្រោយពិធីបុណ្យចូលឆ្នាំដែលប្រទេសទាំង២ មានទំនៀមទម្លាប់ និងជំនឿប្រហាក់ប្រហែលគ្នានោះ ។
តាមសមត្ថកិច្ចការពារព្រំដែនកម្ពុជាបានឱ្យដឹងបន្តថា កងកម្លាំងទាហានឡាវក្នុងឯកសណ្ឋានប្រដាប់ដោយអាវុធមួយរថយន្តសេអឹមសេ ត្រូវបានអាជ្ញាធរខេត្តចម្ប៉ាសាក់ ប្រទេសឡាវបញ្ជូនមកកាន់ចំណុចដើមល្វាវ៉ើនខាវ ក្នុងភូមិសាស្ត្រឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង ជាប់នឹងច្រកវ៉ើនខាម ស្រុកខូង ខេត្តចម្ប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ ។ សកម្មភាពនោះត្រូវបានគេសង្កេតឃើញថា ក្រុមទាហានឡាវបានដឹកឈើ ដើម្បីសាងសង់ប៉ុស្តិ៍មកជាមួយផងដែរ ។
គួររំលឹកថា កាលពីថ្ងៃទី៥ ខែមេសា ឆ្នាំ២០១៧ មានជំនួបមួយរវាងលោកឧត្តមសេនីយ៍ត្រីស្វាយ ញ៉ន មេបញ្ជាការយោធាតំបន់ប្រតិបត្តិការសឹករងខេត្តស្ទឹងត្រែង ជាមួយនឹងលោកឧត្តមសេនីយ៍ត្រីស៊ូ កៃភីមម៉ាសាន មេបញ្ជាការយោធាខេត្តចម្ប៉ាសាក់ ។ ក្នុងជំនួបនោះបានកំណត់ថា រាល់កិច្ចការត្រង់កន្លែងដែលមានការយល់ច្រឡំគ្នានឹងត្រូវផ្អាកសកម្មភាពទាំងអស់ ។
រាល់ការងារទាំងអស់រឿងព្រំដែន ត្រូវទុកឱ្យអភិបាលខេត្តស្ទឹងត្រែង និងចម្ប៉ាសាក់ដោះស្រាយបន្ត ។ កម្លាំងសមត្ថកិច្ចនៅតាមខ្សែបន្ទាត់ព្រំដែនកន្លែងដែលមានបញ្ហាកើតឡើងត្រូវតែរក្សាសន្តិសុខរៀងៗខ្លួន ។ ប៉ុន្តែមួយថ្ងៃក្រោយ បន្ទាប់ពីមានជំនួបនោះ បែរជាភាគីឡាវមិនបានគោរពទៅតាមគោលការណ៍ឯកភាពគ្នានោះទេ ថែមទាំងបន្ថែមកម្លាំង និងដឹកជញ្ជូនសម្ភារមកសាងសង់ប៉ុស្តិ៍នៅកន្លែងដើមល្វាក្បែរគ្រឹះប៉ុស្តិ៍ចាស់របស់កម្ពុជាដែលបន្សល់ទុកតាំងពីសម័យបារាំងទៅវិញ ហើយកម្ពុជាក៏មានគម្រោងធ្វើប៉ុស្តិ៍លើខឿនចាស់នោះឡើងវិញដែរ ។ ការដឹកឈើមកប៉ងធ្វើប៉ុស្តិ៍ នៅក្បែរខឿនប៉ុស្តិ៍កម្ពុជានោះ ត្រូវបានទាហានឡាវទាំងនោះប្រាប់ថា ធ្វើតាមបទបញ្ជាលោកអភិបាលខេត្តចម្ប៉ាសាក់ ។
តាមព័ត៌មានចុងក្រោយថា សភាពការណ៍នោះបានធូរស្រាលវិញ ដោយខាងឡាវនិយាយថា មានការភាន់ច្រឡំពីចំណុចប៉ុស្ដិ៍ព្រំដែនហើយក៏បានដឹកឈចេញទៅវិញ ៕
ចែករំលែកព័តមាននេះ