ប្រតិបតិ្តការបង្ក្រាបបទល្មើសព្រៃឈើតាមព្រំដែន លោកនាយឧត្តមសេនីយ៍ សៅ សុខា ដឹកនាំកម្លាំងផ្ទាល់
ខេត្តមណ្ឌលគិរី ៖ ប្រតិបត្តិការកក្រើកពេញខេត្តមណ្ឌលគិរី ខណៈរថយន្តកែច្នៃប្រភេទរ៉េវដឹកឈើចំនួន៨គ្រឿង ត្រូវបានលោកនាយឧត្តមសេនីយ៍ សៅ សុខា
ខេត្តមណ្ឌលគិរី ៖ ប្រតិបត្តិការកក្រើកពេញខេត្តមណ្ឌលគិរី ខណៈរថយន្តកែច្នៃប្រភេទរ៉េវដឹកឈើចំនួន៨គ្រឿង ត្រូវបានលោកនាយឧត្តមសេនីយ៍ សៅ សុខា
ខេត្តមណ្ឌលគិរី ៖ ប្រតិបត្តិការកក្រើកពេញខេត្តមណ្ឌលគិរី ខណៈរថយន្តកែច្នៃប្រភេទរ៉េវដឹកឈើចំនួន៨គ្រឿង ត្រូវបានលោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដឹកនាំកម្លាំងដោយផ្ទាល់បង្ក្រាបបាននៅចំណុចប៉ុស្តិ៍ការពារព្រំដែនអូរហ៊ុច ចន្លោះស្រុកអូររាំងនិងស្រុកកែវសីមា ក្នុងតំបន់ដែនជម្រកសត្វព្រៃកែវសីមា កាលពីព្រឹកថ្ងៃទី២២ ខែកុម្ភៈ ។
លោក កែវ សុភគ៌ ប្រធានមន្ទីរបរិស្ថានខេត្តបានឲ្យដឹងថា គិតត្រឹមវេលាម៉ោង៣រសៀលថ្ងៃទី២២ ខែកុម្ភៈ កម្លាំងចម្រុះក្រោមការដឹកនាំរបស់លោកនាយឧត្តមសេនីយ៍ សៅ សុខា ចាប់បានរថយន្តប្រភេទរ៉េវដឹកឈើចំនួន៨គ្រឿង និងមនុស្សចំនួន៧នាក់(ជនជាតិវៀតណាម៦នាក់ ខ្មែរ១នាក់) រួមនឹងវត្ថុតាងជាច្រើនទៀត ។
លោក សុភគ៌ ថ្លែងថា ក្នុងប្រតិបត្តិការនេះ សមត្ថកិច្ចក៏រឹបអូសបានឈើខុសច្បាប់ជាច្រើនកំណាត់ផងដែរ ប៉ុន្តែដោយឈើទាំងនោះស្ថិតនៅក្នុងព្រៃជ្រៅ សមត្ថកិច្ចបានត្រឹមការពារសិន និងពុំទាន់មានតួលេខច្បាស់នៅឡើយទេ ។
លោក ទៀ ខៃម៉េង មេបញ្ជាការកងអនុសេនាធំលេខ២ចំណុចវរសេនាតូចការពារព្រំដែនលេខ១០៣ បានឲ្យដឹងថា ពិតជាមានករណីបង្ក្រាបឈើនៅតាមខ្សែបន្ទាត់ព្រំដែនកម្ពុជា-វៀតណាមមែន ហើយនៅទីនោះកងកម្លាំងរបស់លោកកំពុងចូលរួមការបង្ក្រាបជាមួយកម្លាំងចម្រុះ ។ ទោះជាយ៉ាងណា អ្នកយកព័ត៌មានមិនអាចសុំការបញ្ជាក់ពីលោកមេបញ្ជាការរូបនេះបានទេ ជុំវិញសកម្មភាពដឹកឈើឆ្លងដែនខុសច្បាប់នៅតំបន់ដែលលោកគ្រប់គ្រង បែរជាគ្មានការបង្ក្រាបរហូតផ្អើលដល់ថ្នាក់ជាតិជាអ្នកបង្ក្រាបទៅវិញ ។
ចំណែកលោក ឡេង សុភ័ណ្ឌ មេបញ្ជាការវរៈនគរបាលការពារព្រំដែនគោកលេខ៦២១ មិនអាចសុំការបំភ្លឺបានទេ នារសៀលថ្ងៃទី២២ ខែកុម្ភៈ ខណៈតំបន់ដែលមានការបង្ក្រាបបទល្មើសព្រៃឈើទ្រង់ទ្រាយធំនេះ គឺស្ថិតក្នុងដែនសមត្ថកិច្ចរបស់លោកគ្រប់គ្រង ។
រីឯលោក រ័ត្ន សុវណ្ណ អនុប្រធានមន្ទីរបរិស្ថានខេត្ត និងជានាយកដែនជម្រកសត្វព្រៃកែវសីមា ដែលរងការរិះគន់ពីមហាជនថា ជាអ្នកអនុញ្ញាតឲ្យមានបទល្មើសព្រៃឈើក្នុងដែនសមត្ថកិច្ចរបស់ខ្លួន កោះសន្តិភាពមិនអាចសុំការបំភ្លឺបានទេនៅល្ងាចថ្ងៃដដែលនោះ ។
ប្រតិបត្តិការបង្ក្រាបបទល្មើសព្រៃឈើតាមខ្សែបន្ទាត់ព្រំដែន ក្រោមការបញ្ជាផ្ទាល់របស់លោកនាយឧត្តមសេនីយ៍ សៅ សុខា សបញ្ជាក់ឲ្យឃើញថា បទល្មើសព្រៃឈើនៅខេត្តមណ្ឌលគិរីគឺពិតជាមានប្រាកដដូចការចេញផ្សាយរបស់កោះសន្តិភាពកាលពីថ្ងៃទី២១ ខែកុម្ភៈ ដែលអាជ្ញាធរខេត្តមិនមានសមត្ថភាពទប់ស្កាត់ឬបង្ក្រាបក្រុមឧក្រិដ្ឋជនព្រៃឈើ ស្របពេលដែលមន្ត្រីក្នុងខេត្តនេះតែងតែអះអាងនិងរាយការណ៍ទៅថ្នាក់លើរបស់ខ្លួន ពីភាពស្ងប់ស្ងាត់នៃសកម្មភាពកាប់ឈើខុសច្បាប់នៅខេត្តមណ្ឌលគិរី ។
ចំណែកព័ត៌មានដែលតែងមានការនិយាយតគ្នាពីមាត់មួយទៅមាត់មួយក្នុងខេត្តមណ្ឌលគិរីថា សព្វថ្ងៃនេះដីព្រៃរាប់រយហិកតារហូតឈានដល់រាប់ពាន់ហិកតា កំពុងត្រូវបានអ្នកមានអំណាចក្នុងខេត្ត វាតទីយកជាកម្មសិទ្ធិផ្ទាល់ខ្លួន។ ប្រភពព័ត៌មាននិយាយថា ដីព្រៃទាំងនោះសុទ្ធសឹងស្ថិតនៅក្នុងតំបន់អភិរក្ស តំបន់ដែនជម្រកសត្វព្រៃ និងតំបន់ហាមឃាត់ ។ មន្ត្រីមានអំណាចដែលកំពុងធ្វើសកម្មភាពដាក់កម្លាំងមនុស្សឲ្យចូលទៅកាប់រានដីព្រៃទុកជាកម្មសិទ្ធិផ្ទាល់ខ្លួននោះ ភាគច្រើនគឺជាមន្ត្រីប្រដាប់អាវុធតែម្តង ដែលពួកគេបាននិងកំពុងសម្រុកដាក់កម្លាំងកាប់ទន្ទ្រានដីព្រៃនៅតាមខ្សែបន្ទាត់ព្រំដែន ក្នុងស្រុកកែវសីមា ស្រុកអូររាំង និងស្រុកកោះញែក ។ ចំណែកដីព្រៃមួយចំនួនទៀតត្រូវគេកាប់រាននៅក្នុងព្រៃដែនជម្រកសត្វព្រៃកែវសីមា ជាប់ព្រំប្រទល់ស្រុកស្នូល ខេត្តក្រចេះ ។
យោងតាមរបាយការណ៍ដែលកោះសន្តិភាពទទួលបានពីមន្ត្រីរដ្ឋបាលព្រៃឈើ កាលពីអំឡុងឆ្នាំ២០១៦ ដីព្រៃចំនួនជិត១ម៉ឺនហិកតាស្ថិតនៅតំបន់អភិរក្សជីវចម្រុះសីមា ដែលប្តូរមកជាដែនជម្រកសត្វព្រៃកែវសីមា ត្រូវបានប្រជាពលរដ្ឋ និងមន្ត្រីមួយចំនួននៅក្នុងខេត្តមណ្ឌលគិរី កាប់រានព្រៃយកជាកម្មសិទ្ឋិផ្ទាល់ខ្លួន ។
ទោះជាមានការបង្ក្រាបឬទប់ស្កាត់ពីមន្ត្រីជំនាញយ៉ាងណា ក៏ដីព្រៃទូទាំងខេត្តមណ្ឌលគិរី នៅតែមានសកម្មភាពកាប់រានជារៀងរាល់ថ្ងៃ គ្មានស្រាកស្រាន្តឡើយ។
រហូតមកដល់វេលាម៉ោង៣និង៣០នាទីរសៀលថ្ងៃទី២២ ខែកុម្ភៈ កោះសន្តិភាពមិនទាន់អាចសុំការបំភ្លឺពីសមត្ថកិច្ចពាក់ព័ន្ធបានទេ ជុំវិញព័ត៌មានលំអិតក្នុងករណីចាប់រថយន្តដឹកឈើខុសច្បាប់៨គ្រឿងនោះទេ ហើយអ្នកពាក់ព័ន្ធធំបំផុតនៅពីក្រោយខ្នងក៏ពុំទាន់ត្រូវបានគេទម្លាយព័ត៌មានឱ្យដឹងដែរ ៕
ចែករំលែកព័តមាននេះ