រាជធានីភ្នំពេញ ៖ ខ្សែភាពយន្តខ្មែរ និងបរទេស ដែលអាចរកប្រាក់ចំណូលបានខ្ពស់ប្រចាំរោងភាពយន្តលេជេន (Legend) ចំនួន១១រឿង ពីផលិតកម្ម ផ្សេងៗគ្នាបានដាក់បោះឆ្នោត និងជ្រើសរើសឲ្យចូលរួមព្រឹត្តិការណ៍
រាជធានីភ្នំពេញ ៖ ខ្សែភាពយន្តខ្មែរ និងបរទេស ដែលអាចរកប្រាក់ចំណូលបានខ្ពស់ប្រចាំរោងភាពយន្តលេជេន (Legend) ចំនួន១១រឿង ពីផលិតកម្ម ផ្សេងៗគ្នាបានដាក់បោះឆ្នោត និងជ្រើសរើសឲ្យចូលរួមព្រឹត្តិការណ៍ភាពយន្តប្រចាំឆ្នាំ២០១៦ (Movies of The Years 2016) ។ ឆ្លងកាត់ការបោះឆ្នោតពីទស្សនិកជន ខ្សែភាពយន្តខ្មែររឿង «កំណត់ហេតុនាងនាថ» មានការគាំទ្រច្រើន ហើយទទួលបានពានរង្វាន់ពីរផ្សេងគ្នា គឺពានរង្វាន់ផ្នែក«ភាពយន្តល្អបំផុតប្រចាំឆ្នាំ២០១៦» និងពានរង្វាន់ «ភាពយន្តខ្មែរប្រចាំឆ្នាំ២០១៦» ។ ក្រៅពីធ្វើឲ្យកក្រើកអស់អ្នកចូលរួមទស្សនាមក រឿង «កំណត់ហេតុនាថ» ធ្វើឲ្យគេចាប់អារម្មណ៍កាន់តែខ្លាំង ក្រោយពីភាពយន្តនេះទទួលបានការបោះឆ្នោតគាំទ្រឲ្យក្លាយជាភាពយន្តល្អប្រចាំឆ្នាំ២០១៦នេះ ។
បុគ្គលិកប្រតិបត្តិផ្នែកទីផ្សាររបស់រោងភាពយន្តលេជេន កញ្ញាគុយ កែវមរកត បញ្ជាក់ថា ពានរង្វាន់ភាពយន្តខ្មែរប្រចាំឆ្នាំ២០១៦ ជ្រើសរើសតែភាពយន្តខ្មែរចំនួន៧រឿង ដែលទទួលបានប្រាក់ចំណូលខ្ពស់ប្រចាំរោងភាពយន្តលេជេន ដាក់ឲ្យបោះឆ្នោត ដោយតម្រូវឲ្យទស្សនិកជនបំពេញឈ្មោះអុីម៉ែល និងលេខទូរស័ព្ទមុនបោះឆ្នោតនៅលើគេហទំព័ររបស់រោងភាពយន្តដើម្បីប្រាកដថា អ្នកបោះឆ្នោមម្នាក់មិនអាចបោះបានលើសពី១ដងទេ ។ ឆ្លងតាមការបោះឆ្នោតរយៈពេល២ថ្ងៃ សំឡេងបោះឆ្នោតសរុបទាំងអស់ដែលទទួលបានមានចំនួន ១០២០សំឡេង ក្នុងនោះរឿង«កំណត់ហេតុនាងនាថ» បានចំនួន៣២៥សំឡេង ។
ព្រឹត្តិការណ៍បន្ទាប់គឺពានរង្វាន់«ភាពយន្តល្អបំផុតប្រចាំឆ្នាំ២០១៦» ដោយមានភាពយន្តខ្មែរ និងបរទេស ល្បីៗប្រចាំឆ្នាំចំនួន១១រឿងដាក់ឲ្យបោះឆ្នោតម្តងទៀត ។ ម្ចាស់ពានរង្វាន់ខ្សែភាពយន្តដ៏ល្អបំផុតក្នុងចំណោមខ្សែភាពយន្តទាំង១១រឿងប្រចាំឆ្នាំ២០១៦ នៅរោងភាពយន្តលេជេន បានទៅលើ រឿង«កំណត់ហេតុនាងនាថ» ដែលទទួលបានសំឡេងបោះឆ្នោតចំនួន ១៥៥សំឡេងនៃចំនួនបោះឆ្នោតសរុប៥៩៤ សំឡេង ។ រឿង «កំណត់ហេតុនាងនាថ» ក៏នឹងត្រូវយកមកចាក់បញ្ចាំងម្តងទៀតនៅក្នុងកម្មវិធីខ្សែភាពយន្តប្រចាំឆ្នាំ២០១៦ ដែលប្រព្រឹត្តទៅនៅថ្ងៃទី២៨ ខែធ្នូ ឆ្នាំ២០១៦ នៅរោងភាពយន្តលេជេនទួលគោក ។
អ្នកស្រីចាន់ណា សុខឃីម បញ្ជាក់ថា វាគឺជាមោទនភាពសម្រាប់ផលិតកម្ម ផលិតករ និងសិល្បករក្រោយពីអ្នកទាំងអស់គ្នាបានរួមគ្នាផលិតខ្សែភាពយន្តដែលល្អ និងជាទីចាប់អារម្មណ៍របស់មហាជន ។ «ពួកយើងស្ទើរស្រក់ទឹកភ្នែកគ្រាដែលទទួលបានដំណឹងថា យើងទទួលបានពានរង្វាន់ដល់ទៅ២ បើទោះបីជារឿង «កំណត់ហេតុនាងនាថ» គឺជារឿងលើកដំបូងរបស់ផលិតកម្មឥន្ទ្រានិម្មិតក៏ដោយ ។ ការខិតខំប្រឹងប្រែងតស៊ូរបស់ផលិតករ និងសិល្បករពិតជាមិនអត់ប្រយោជន៍ ហើយអ្វីដែលខ្ញុំព្រមទាំងក្រុមការងារផលិតកម្ម និងសិល្បករទទួលបានគឺដោយសារការចូលរួមគាំទ្ររបស់ទស្សនិកជនគ្រប់មជ្ឈដ្ឋាន ហើយខ្ញុំពិតជាអរគុណសម្រាប់ទឹកចិត្តគាំទ្រមួយនេះ » ។
អ្នកស្រីចាន់ ណាសុខឃីម សន្យាថា នឹងបន្តផលិតខ្សែភាពយន្តមានគុណភាព និងជាចំណីអារម្មណ៍ប្លែកសម្រាប់ទស្សនិកជន ។
ភាពយន្តដែលនាំចូល និងផលិតដោយក្រុមហ៊ុន និងផលិតកម្មចំនួន១១រឿងដែលទទួលបានការគាំទ្រច្រើន និងដាក់ឲ្យបោះឆ្នោតមានខ្សែភាពយន្តរឿង «អ្នកនាងម្ចាស់ឡឺកឺ» របស់ផលិតកម្មមហាហង្ស, ខ្សែភាពយន្តរឿង «ចន្ទ្រា របស់ផលិតកម្មអង្គរភីឈ័រ, ខ្សែភាពយន្តរឿង «សិស្សប្អូនសំណព្វចិត្ត» របស់ផលិតកម្មរ៉ក (Rock), ខ្សែភាពយន្តរឿង«កំពូលអ្នកសុំទានជួបស្នេហ៍» របស់ផលិតកម្ម អិលឌី (LD Picture), ខ្សែភាពយន្តរឿង «ទង់ព្រលឹង» របស់ផលិតកម្មរ៉េដ (RED Picture), ខ្សែភាពយន្តរឿង«កំណត់ហេតុនាងនាថ» របស់ផលិតកម្មឥន្ទ្រានិម្មិត, ខ្សែភាពយន្តរឿង «Joking Jazz 4G», ខ្សែភាពយន្តរឿង «ប៉ុបពីទៅហូលីវូដ», រឿង«Fast 888» របស់ក្រុមហ៊ុនសប្បាយ (Sabay MVP), «Captain America» និងរឿង «The Conjuring 2» របស់ក្រុមហ៊ុនវេសស្តេក(WML) ៕
ចែករំលែកព័តមាននេះ