ខេត្តប៉ៃលិន ៖ ស្ត្រីម្នាក់ជិះម៉ូតូឌុបចៅរបស់ខ្លួន ក្នុងទិសដៅជើងទៅត្បូង បញ្ច្រាសគ្នាជាមួយនឹងរថយន្ត ស្រាប់តែចាំងភ្លើងរថយន្ត ក៏រេចង្កូតទៅខាងឆ្វេងដៃបុកជាមួយនឹងរថយន្ត បណ្តាលឱ្យដួលរងរបួសធ្ងន់ទាំងពីរនាក់តែម្តង។ ក្រោយពេលកើតហេតុ ស្ត្រីរងគ្រោះ និងចៅបានសន្លប់បាត់បង់ស្មារតី ហើយត្រូវបានគេយករថយន្តដឹកទៅសង្គ្រោះនៅមន្ទីរពេទ្យបង្អែកខេត្ត។ ហេតុការណ៍នេះ បានកើតឡើងកាលពីវេលាម៉ោង៦ និង២០នាទីល្ងាច ថ្ងៃទី០៣ ខែធ្នូ ឆ្នាំ២០១៦ ស្ថិតនៅចំណុចផ្លូវក្រាលកៅស៊ូ ក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន ។
ប្រភពព័ត៌មានបានឱ្យដឹងថា អ្នកបើកបរម៉ូតូឈ្មោះ មួយ គា ភេទស្រី អាយុ៥០ឆ្នាំ រងរបួសធ្ងន់ រស់នៅចំណុចខកមូស ភូមិសួនអំពៅកើត សង្កាត់ប៉ៃលិន ក្រុងប៉ៃលិន និងអ្នករួមដំណើឈ្មោះ វឿង ហុងលុយ ភេទស្រី អាយុ១០ឆ្នាំ រងរបួសធ្ងន់ ត្រូវជាចៅ រស់នៅភូមិសង្កាត់ខាងលើ ។ ប្រភពបន្តទៀតថា ហេតុការណ៍ខាងលើនេះបណ្តាលមកពីការបើកបរមិនប្រកាន់ស្តាំ ដោយស្ត្រីរងគ្រោះបើកបរជ្រុលចង្កូតទៅខាងឆ្វេងដៃ ជ្រុលទៅបុកជាមួយនឹងរថយន្ត ដែលកំពុងបើកបរបញ្ច្រាសទិសគ្នា ទើបបណ្តាលឱ្យបុកគ្នាយ៉ាងពេញទំហឹង បណ្តាលឱ្យរងរបួសធ្ងន់បែបនេះតែម្តង។
ទោះបីជាយ៉ាងណា ក្រោយពេលកើតហេតុ គេមិនទាន់ស្គាល់ឈ្មោះអ្នកបើកបររថយន្តនៅឡើយទេ ហើយបច្ចុប្បន្នជនរងគ្រោះ ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន។ ចំណែកវត្ថុតាងម៉ូតូ និងរថយន្តត្រូវបាននគរបាលចរាចរណ៍ជើងគោកដឹកយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការនគរបាលខេត្តប៉ៃលិន ដើម្បីរង់ចាំធ្វើការដោះស្រាយតាមនីតិវិធី៕
ចែករំលែកព័តមាននេះ