ខេត្តស្វាយរៀង ៖ រថយន្តដឹកធាងដូងមួយគ្រឿង កាលពីវេលាម៉ោង២រសៀលថ្ងៃទី១២ មិថុនា បានបុកម៉ូតូដឹកប្រេងសាំងមួយគ្រឿងក្បែរគល់ស្ពានសម្តេចហ៊ុន សែន សំរោងស្ថិតនៅក្នុងឃុំអង្គប្រសែ ស្រុករមាសហែក។ ក្នុងហេតុការណ៍នេះ គឺរថយន្តដឹកធាងដូងសំពីងសំពោងបានទៅបុកម៉ូតូពីក្រោយពេញទឹហឹង បណ្តាលឱ្យម្ចាស់ម៉ូតូខ្ទាតចេញពីម៉ូតូដួលបោកក្បាលទៅលើថ្នល់សន្លប់ និងខ្ទាតចេញប៊ីដុងមានសាំងពេញប្រមាណ២០ប៊ីដុង រីឯម្ចាស់រថយន្តបានបន្ថែមល្បឿនបើករត់គេចតែសំណាងអាក្រក់ធ្លាក់ចូលក្នុងស្រែហើយត្រូវសមត្ថកិច្ចចាប់បាន។
តាមអ្នកឃើញហេតុការណ៍បានឱ្យដឹងថា គេឃើញបុរសរងគ្រោះជិះម៉ូតូដឹកអីវ៉ាន់សំពីងសំពោងមកពីទិសខាងត្បូង លុះមកដល់ស្ពានសម្តេចហ៊ុន សែន សំរោង បានបើកយឺតៗឆ្លងស្ពានទៅជិតផុតហើយក៏មានរថយន្តហ៊ីយ៉ាន់ដាយមួយគ្រឿងដឹកធាងដូងសំពីងសំពោងដែរបើកស្របទិសគ្នាឡើងស្ពានយ៉ាងលឿន។ លុះឆ្លងដល់ក្បាលស្ពានផ្នែកខាងជើងក៏បើកវ៉ាម៉ូតូតែមិនផុតក៏បុកម៉ូតូពីក្រោយពេញទំហឹង។
អ្វីដែលប្រជាពលរដ្ឋ និងសមត្ថកិច្ចមានការងឿងឆ្ងល់ហើយបង្ហើបប្រាប់កោះសន្តិភាព គឺអ្នកបើករថយន្តនិយាយថា គេដើរប្រមូលទិញធាងដូងពីខេត្តស្វាយរៀងទៅខេត្តកំពង់ចាម ដើម្បីធ្វើទ្រើងម្រេច ក៏ប៉ុន្តែកាលពីប៉ុន្មានថ្ងៃមុនគេឃើញរថយន្តដឹកធាងដូងពីកំពង់ធំចូលមកកំពង់ចាម រួចឆ្លងកាត់ខេត្តព្រៃវែងចូលមកខេត្តស្វាយរៀង ហើយពេលនេះគេដឹក ធាងដូងចេញពីខេត្តស្វាយរៀងទៅខេត្តកំពង់ចាមវិញ ដែលសង្ស័យថា ក្រែងដូចម៉ូតូគេដឹករុំជិតឃើញតែការុង លុះពេលដួលទើបធ្លាយប៊ីដុងសាំង។ ឯរថយន្តដឹកធាងដូងក៏គេសង្ស័យក្រែងមានអ្វីបង្កប់ក្រោមធាងដូងដែរ៕
ចែករំលែកព័តមាននេះ