ខេត្ដព្រះសីហនុ ៖ យ៉ាងហោចណាស់មនុស្ស៥នាក់បានរងរបួសធ្ងន់ និងស្រាល បន្ទាប់ពីរថយន្តចំនួន៥គ្រឿងបានបុកបន្ដគ្នាកាលពីវេលាម៉ោង១៨និង១៥នាទី ថ្ងៃទី៣០ ឧសភា នៅត្រង់ចំណោតអូរត្រាវ ស្ថិតក្នុងភូមិ១ សង្កាត់លេខ១ ក្រុងព្រះសីហនុ ។ នេះបើយោងតាមការបញ្ជាក់ពីលោកវរសេនីយ៍ឯក អ៊ី សុខា ស្នងការរងទទួលបន្ទុកសណ្តាប់ធ្នាប់នៃស្នងការដ្ឋាននគរបាលខេត្តព្រះសីហនុ ។
ការឆ្លើយបញ្ជាក់របស់លោកវរសេនីយ៍ឯកដូចនេះគឺនៅក្រោយហេតុការណ៍រយៈពេលប្រហែលជា១ម៉ោង ដោយលោកអះអាងថា នៅក្នុងហេតុការណ៍គ្រោះថ្នាក់ដ៏រន្ធត់នេះ ពុំមានមនុស្សបាត់បង់ជីវិតទេ តែមានមនុស្ស៥នាក់ដែលបានរងរបួសក្នុងនោះមធ្យម២នាក់ និងរបួសស្រាល៣នាក់ ។ ជនរងគ្រោះទាំងនោះកំពុងសម្រាកព្យាបាលនៅគ្លីនិកឯកជនសេតេ (ពេទ្យដើមស្វាយ) ។ លោកស្នងការរងបានបញ្ជាក់ថា យោងតាមការបំភ្លឺរបស់ភាគីរថយន្តរងគ្រោះ និងយោងតាមការសន្និដ្ឋានជំហានដំបូង គ្រោះថ្នាក់នេះ បង្កឡើងដោយរថយន្តកុងតឺន័រដែលដឹកទំនិញចេញពីកំពង់ផែទៅកាន់រាជធានីភ្នំពេញ នៅពេលមកដល់ចំណោតអូរត្រាវបានបើកក្នុងល្បឿនលឿនក៏ជ្រុលទៅបុកគូទរថយន្តតាក់ស៊ី២គ្រឿង និងរថយន្តទួរីសមួយគ្រឿងខ្ទាតទៅប៉ះទ្វាររថយន្តហាយឡែនឌ័រពណ៌ស្ករ ដែលបើកបរក្នុងទិសដៅបញ្ច្រាសគ្នាពីភ្នំពេញមកក្រុងព្រះសីហនុ ។ បន្ទាប់មករថយន្ដកុងតឺន័រក៏បានរេចង្កូតទៅបុករបាំងផ្លូវធ្លាក់ចូលក្នុងជ្រោះក្រឡាប់ផ្ងាជើង តែសំណាងល្អអ្នកបើកបរពុំមានគ្រោះថ្នាក់ធ្ងន់ធ្ងរ ហើយរត់គេចខ្លួនបាត់តែម្តង ។ បន្ទាប់ពីធ្វើការវាស់វែងរួច កម្លាំងជំនាញរបស់លោក បានស្ទូចរថយន្តទាំងប្រាំគ្រឿងយកមកទុកនៅការិយាល័យចរាចរណ៍ផ្លូវគោកដោះស្រាយតាមផ្លូវច្បាប់ ។
ដោយឡែកបើយោងតាមការអះអាងពីអ្នកឃើញហេតុការណ៍នេះបានអះអាងថា នៅក្នុងហេតុការណ៍នេះ បើទោះពុំមានមនុស្សណាម្នាក់បាត់បង់ជីវិតក្តី ក៏នៅក្នុងហេតុការណ៍នោះមានមនុស្សរងរបួសធ្ងន់និងស្រាលមិនក្រោម១១នាក់ទេ ព្រោះនៅក្នុងរថយន្តទី១ ម៉ាកឡិចស៊ីសRX300 មានមនុស្សចំនួន៦នាក់បូករួមទាំងអ្នកបើកបរផង ។
ក្នុងរថយន្តទី២ ម៉ាកតូយ៉ូតាមានតែតៃកុងម្នាក់ ។ ក្នុងរថយន្តទី៣ ម៉ាកទួរីស មានមនុស្សចំនួន៤នាក់ ។ ក្នុងរថយន្តទី៤ ម៉ាកហាយឡែនឌ័រ មានម្នាក់ឯង និងនៅក្នុងរថយន្តកុងតឺន័រ ពុំមានតួលេខច្បាស់លាស់សង្ស័យមានគ្នា២នាក់ តៃកុង និងព្រូ ។ ដូចនេះបូករួមមនុស្សដែលនៅក្នុងហេតុការណ៍នេះ មិនក្រោម១១នាក់នោះទេ ប៉ុន្តែត្រង់ថារបួសធ្ងន់ប៉ុន្មាន និងស្រាលប៉ុន្មានគឺពួកគាត់ពុំដឹងច្បាស់ឡើយ ៕
ចែករំលែកព័តមាននេះ