រាជធានីភ្នំពេញ ៖ ថ្ងៃ១៤ កុម្ភៈ ទិវានៃក្តីស្រឡាញ់ខាងមុខនេះ មជ្ឈមណ្ឌលជាតិផ្តល់ឈាម នៃក្រសួងសុខាភិបាល សហការជាមួយក្រុមហ៊ុនNVC Corporation Vital និងស្ថាប័នមួយចំនួនទៀត នឹងរៀបចំកម្មវិធី «ផ្តល់ឈាម ផ្តល់ក្តីស្រឡាញ់» រឺ «Give Blood Give Love» ។
Give Blood Give Love គឺជាប្រធានបទនៅក្នុងយុទ្ធនាការបរិច្ចាគឈាមនៅថ្ងៃទី១៤ កុម្ភៈ ជារៀងរាល់ឆ្នាំ ហើយសម្រាប់ឆ្នាំ២០១៦នេះផងដែរ ។ យុវជន សិស្ស និស្សិត សិល្បៈករ និងប្រជាជនទូទៅ ប្រមាណ៦០០នាក់ នឹងចូលរួមកម្មវិធីនេះ ដែលនឹងប្រារព្ធធ្វើនៅមជ្ឈមណ្ឌលជាតិផ្តល់ឈាម (ខាងក្នុងបរិវេណនៃមន្ទីពេទ្យព្រះអង្គឌួង) ចាប់ពីម៉ោង ៨:៣០ព្រឹក ដល់ម៉ោង៤:00រសៀល ។
ឆ្លាតក្នុងឱកាសនេះ លោកវេជ្ជ. ហុក គឹមចេង បានបញ្ជាក់អោយដឹងដែរថា ឯកឧត្តមវេជ្ជ. ម៉ម ប៊ុនហេង រដ្ឋមន្ត្រីក្រសួងសុខាភិបាលបានយកចិត្តទុកដាក់ ចំពោះចលនារបស់យុវជន សិស្ស និស្សិត ក្នុងសកម្មភាពសង្គម ដូចជាការបរិច្ចាគឈាមជាដើម។ ឯកឧត្តមរដ្ឋមន្ត្រី បានណែនាំឲ្យមានការរៀបចំយុទ្ធនាការបង្កឲ្យយុវជនបានជួបជុំគ្នា បបួលគ្នាបរិច្ចាគឈាម និងកំសាន្តជាមួយការរៀបចំ សំដែងសិល្បៈ និងចំរៀងជាពិសេសក្នុងទិវានៃក្តីស្រឡាញ់ ១៤ កុម្ភៈ ២០១៦ នេះនៅមជ្ឈមណ្ឌលជាតិផ្តល់ឈាម។
លោក ជុនហៀង ថាវសិទ្ធិ ប្រធាននាយកដ្ឋានទីផ្សារនៃក្រុមហ៊ុន NVC Corporation Vital បានបញ្ជាក់អោយដឹងផងដែរថា ក្រុមហ៊ុនទឹកពិសាវីតាល់ តែងតែរីករាយក្នុងការសហការឧបត្ថម្ភគាំទ្ររាល់សកម្មភាពសប្បុរសធម៌នៅក្នុងសង្គម ពិសេសគឺការបរិច្ចាគឈាមផ្ទាល់តែម្តង ដែលជាសកម្មភាពមនុស្សធម៌ និងសង្គ្រោះជីវិត។ ហើយវីតាល់តែងតែស្វែងរកវិធីសាស្ត្រផ្សេងៗ ក្នុងការបង្កើនការចូលរួមរបស់យុវជន លើសកម្មភាពបរិច្ចាគឈាមដោយស្ម័គ្រចិត្ត ដូចជា រាល់ការបរិច្ចាគឈាម សប្បុរសជនបរិច្ចាគឈាមនឹងទទួលបានទឹកមួយយួរពីវីតាល់ រួមជាមួយនឹងថង់យួរក្រណាត់ដ៏ស្រស់ស្អាតមួយ ដែលយុវជនដែលប្រើឡើងវិញបាន។
ជាងនេះទៅទៀត ដើម្បីអោយកម្មវិធីរឹតតែមានភាពអធឹកអធម វីតាល់មានឧបត្ថម្ភ ការថតរូបបានភ្លាម (Selfie Booth) នៅក្នុងកម្មវិធី សម្រាប់អ្នកចូលរួមទាំងអស់បានថតរូបខ្លួនឯង ហើយទទួលបានការផ្តិតភ្លាមៗដោយសេរី។
គួររម្លឹងផងដែរថា គោលបំណងនៃយុទ្ធនាការបរិច្ចាគឈាម ក្នុងទិវានៃក្តីស្រឡាញ់គឺ៖ ដើម្បីបង្កលក្ខណៈឲ្យយុវជន យុវនារី ប្រជាជនទូទៅចែករំលែកក្តីស្រឡាញ់របស់គាត់ដោយចូលរួមបរិច្ចាគឈាមជួយដល់ជនរងគ្រោះដែលត្រូវការឈាម។ ក៏ដូចជាដើម្បីអំពាវនាវឲ្យគ្រប់អង្គភាព ស្ថាប័ន វិស័យឯកជន អង្គការជាតិ និងអន្តរជាតិចូលរួមចំណែកក្នុងភាពជាដៃគូជាមួយមជ្ឈមណ្ឌលជាតិផ្តល់ឈាមដើម្បីជំរុញលើកកម្ពស់ការបរិច្ចាគឈាមដោយស្មគ្រ័ចិត្ត។
តាមរបាយការណ៍របស់មជ្ឈមណ្ឌលជាតិផ្តល់ឈាមបានបង្ហាញថា៖ ឈាមប្រមាណ ៥៤,៧៩៣ ប្លោក ទទួលបានក្នុងឆ្នាំ២០១៥ គឺមានការកើនឡើងច្រើនជាង ឆ្នាំ២០១៤ ចំនួន៥%។ ក្នុងចំណោមអ្នកផ្តល់ឈាមទាំងអស់នោះគឺមាន យុវជនអាយុពី១៨ឆ្នាំ ដល់ ៣០ឆ្នាំ ប្រមាណ៦៧%។ ឈាម ១៥០ប្លោក ត្រូវការជារៀងរាល់ថ្ងៃដើម្បីជួយដល់ជីវិតមនុស្សជាទីស្រឡាញ់របស់យើងនៅទូទាំងប្រទេស។
លោកវេជ្ជបណ្ឌិត ហុក គីមចេង ប្រធានមជ្ឈមណ្ឌលជាតិផ្តល់ឈាម ក៏បានសំដែងនូវសេចក្តីរីករាយ និងថ្លែងអំណរគុណចំពោះការគាំទ្ររបស់ក្រសួងសុខាភិបាល សាលារាជធានីភ្នំពេញ សាខាកាកបាទក្រហមរាជធានីភ្នំពេញ សហភាពសហព័ន្ធយុវជនកម្ពុជា និងស្ថាប័នឯកជនមួយចំនួនដែលបានចូលរួមរៀបចំកម្មវិធី ដែលក្នុងនោះគឺមានវីតាល់ដែលជាដៃគូរសហការយ៉ាងជិតស្និតផងដែរ ។
លោកវេជ្ជ. ហុក គឹមចេង អំពាវនាវឲ្យយុវជន យុវនារី ប្រជាជនទូទៅអញ្ចើញចូលរួមបរិច្ចាគឈាមនៅគ្រប់មជ្ឈមណ្ឌល ជាតិផ្តល់ឈាមខេត្តនានាហើយជាពិសេសគឺនៅមជ្ឈមណ្ឌលជាតិផ្តល់ឈាម (ក្នុងបរិវេណមន្ទីរពេទ្យព្រះអង្គឌួង) ក្នុងថ្ងៃទី១៤ ខែកុម្ភៈ ឆ្នាំ២០១៦ នេះ ឲ្យបានច្រើនកុះករ។
គួរបញ្ជាក់ផងដែរ វីតាល់ចាប់ផ្តើមសហការឧបត្ថម្ភសកម្មភាពរបស់មជ្ឈមណ្ឌលជាតិផ្តល់ឈាមតាំងពីឆ្នាំ២០១១ មកម្ល៉េះតាមរយៈមូលនិធិ ២៥៛ របស់វីតាល់។ ជាងនេះទៅទៀតវីតាល់តែងតែគាំទ្រសកម្មភាពមនុស្សធម៌ផ្សេងៗនៅក្នុងសង្គម ជាក់ស្តែងការឧបត្ថម្ភថវិការទៅកាន់កាកបាទក្រហមកម្ពុជា មន្ទីរពេទ្យគន្ធបុប្ជា កុមារកំព្រា គថ្លង់ ការការពារបរិស្ថាន និងសកម្មភាពយុវជនជាច្រើនផ្សេងទៀត៕
ចែករំលែកព័តមាននេះ