សារព័ត៌មានបរទេសផ្សាយកាលពីពេល ថ្មីៗនេះថា តុលាការអីុតាលីបានកាត់ក្ដីជាលក្ខណៈគំរូមួយហាមស្ដ្រីប្រពន្ធចុងទូរស័ព្ទទៅស្ដ្រីជាប្រពន្ធដើម ប្រាប់ថា«ខ្លួនជាប្រពន្ធចុង» ។ ការកាត់ក្ដីនោះក្នុងសវនាការមួយដែលប្រពន្ធដើមប្ដឹងស្ដ្រីជាប្រពន្ធចុងពីបទគំរាមកំហែងខ្លួន ។ រឿងក្ដីនេះត្រូវតុលាការកំពូលអីុតាលីពិន័យស្ដ្រីជាប្រពន្ធចុងចំនួន៤០០អឺរ៉ូ ។
ស្ដ្រីជាប្រពន្ធចុងឈ្មោះ អ៊ែនណា ម៉ារីយ៉ាឌីអារ៍ អះអាងថា«ខ្លួនមិនបានធ្វើអ្វីខុសទេព្រោះគ្រាន់តែទូរស័ព្ទទៅនាងជាប្រពន្ធដើមជាប្រយោល ម្យ៉ាងស្ដ្រីជាប្រពន្ធដើមមិនបានឆ្លើយតបទេដោយចុចទទួលហើយបើកទូរស័ព្ទចោល» ។
ទោះបីជាបែបណាក៏ដោយ តុលាការកំពូលសម្រេចថាស្ដ្រីជាប្រពន្ធដើមមិនតបតជាមួយចុងចោទ អ៊ែនណា ម៉ារីណាឌីអារ៍ មិនចាត់ទុកថាជាកំហុសទេ ព្រោះរូបនាងភ័យលើរឿង«អាក្រក់» ដែលភាគីម្ខាងបង្កឡើង ។ តុលាការកំពូលឈរលើសាលដីការបស់សាលាឧទ្ធរណ៍ដែលសម្រេចថាអំពើរបស់ចុងចោទជាអំពើគំរាមកំហែងភាគីម្ខាងទៀត ដោយទូរស័ព្ទទៅមិនប្រាប់ឈ្មោះ និងបកស្រាយពីរឿងសម្ងាត់របស់ខ្លួន ថាទាក់ទងស្នេហាជាមួយប្ដីរបស់ស្ត្រីដើមចោទ ។ រឿងនោះចាត់ទុកថាជាកំហុស ហើយតម្រូវឱ្យបង់ប្រាក់ពិន័យ៤០០ អឺរ៉ូ ។
តាមការអង្កេតកាលពីឆ្នាំ២០១០ ឃើញថាប្ដី ប្រពន្ធអីុតាលីជាងពាក់កណ្ដាលផិតក្បត់គ្នា ក្នុងនោះ៥៥% ជាបុរស និង៤៥%ជាស្ដ្រី ដោយពាក់កណ្ដាលនៃអំពើផិតក្បត់ស្ថិតនៅលើសម្ព័ន្ធភាពសម្ងាត់ ៕
ចែករំលែកព័តមាននេះ