រាជធានីភ្នំពេញ ៖ បុរសម្នាក់បានស្រែកឡូឡា និងដេញវាយអ្នកធាក់ស៊ីក្លូរត់ពេញផ្លូវទុកស៊ីក្លូចោល ក៏ព្រោះតែអ្នកធាក់ស៊ីក្លូរូបនោះជិះមកបុករូបគេបណ្តាលឱ្យរយះជើងឈាមហូរកក្លាក់បង្កឱ្យមានការភ្ញាក់ផ្អើលកាលពីវេលាម៉ោង៩ និង១០នាទីយប់ ថ្ងៃទី២០ កក្កដា ២០១៥ ត្រង់ចំណុចកែងវត្តមហាមន្ត្រីតាមបណ្តោយផ្លូវ២៨៤កែង១៦៣ស្ថិតក្នុងសង្កាត់អូរឡាំពិក ខណ្ឌចំការមន ។
តាមការរៀបរាប់របស់បុរសស្រវឹងស្រាដែលត្រូវស៊ីក្លូបុកនោះបានឱ្យដឹងថា រូបគេមានឈ្មោះ ចក់ មុន្នី ភេទប្រុស អាយុ៤២ឆ្នាំ មុខរបរជាសន្តិសុខផ្សារអូរឡាំពិច និងមានទីលំនៅក្រុងតាខ្មៅ។ មុនពេលកើតហេតុរូបគេបានជិះម៉ូតូមួយគ្រឿងម៉ាកស៊ុយហ្សុយគីស្មាស ពណ៌ខ្មៅ ស៊េរី ឆ្នាំ២០០៥ ពាក់ស្លាក់លេខ កំពង់ស្ពឺ 1A-3667 ជិះពីបូរីកីឡាត្រឡប់ទៅផ្ទះវិញនៅក្រុងតាខ្មៅ ពេលជិះតាមបណ្តោយផ្លូវលេខ១៦៣ក្នុងទិសដៅពីជើងទៅត្បូងមកដល់ត្រង់កែងវត្តមហាមុន្ត្រីក៏មានស៊ីក្លូមួយគ្រឿងជិះតាមផ្លូវលេខ២៨៤ក្នុងទឹសដៅពីលិចទៅកើតមកបុកគាត់ចំពាក់កណ្តាលម៉ូតូរបស់គាត់បណ្តាលឱ្យគាត់រយះជើងឈាមហូរតែម្តងទៅ ។
តែបើតាមសាក្សីដែលបានឃើញហេតុការណ៍បានឱ្យដឹងថា មុនពេលកើតហេតុ គេបានឃើញស៊ីក្លូជិះតាមផ្លូវលេខ ២៨៤បំរុងបត់ឆ្វេង តែដោយត្រង់ចំណុចនោះមានរថយន្តច្រើនពេក ទើបធ្វើឱ្យស៊ីក្លូគេចរថយន្តនិងជ្រុលទៅបុកចំម៉ូតូតែម្តងទៅ ពេលបុកភ្លាមៗ ដោយសារម្ចាស់ម៉ូតូមានសភាពស្រវឹងផងមិនបាននិយាយច្រើនទេបានចុះពីលើម៉ូតូដេញវាយអ្នកធាក់ស៊ីក្លូរត់ចោលស៊ីក្លូ ហើយថែមទាំងវាយរបស់របរដែលនៅលើស៊ីក្លូបណ្តាលឱ្យធ្លាក់រប៉ាត់រប៉ាយពេញផ្លូវ ។
ក្រោយពេលកើតហេតុខាងកំលាំងសមត្ថកិច្ចបានធ្វើការវាស់វែងបំរុងយកទាំងម៉ូតូ និងស៊ីក្លូទៅរក្សាទុកនៅប៉ុស្តិ៍ តែដោយសារសាច់ញាតិបងប្អូនខាងបុរសម្ចាស់ម៉ូតូមកដល់ទើបធ្វើការសំរួលមិនចង់ឱ្យយកទៅប៉ុស្តិ៍ទេព្រោះរឿងនេះគ្រាន់តែជារឿងតូចតាចទេ ហើយបានយកបុរសរបួសនោះទៅលាងរបួស និងព្យាបាលដោយខ្លួនឯងទៅ ៕
ចែករំលែកព័តមាននេះ