សំរាមប្លាស្ទិកទម្ងន់សរុបជាង៨លានតោនត្រូវគេបោះចូលសមុទ្រនៅទូទាំងពិភពលោកក្នុងមួយឆ្នាំ បង្កផលប៉ះពាល់អាក្រក់ដល់ជីវិតរស់នៅក្នុងសមុទ្រ ។
តាមរបាយការណ៍ស្រាវជ្រាវចុងក្រោយរៀបចំឡើងដោយអង្គការ Association for Marine Science នៅរដ្ឋម៉ាសាឈូសេត សហរដ្ឋអាមេរិក និងបោះពុម្ពផ្សាយក្នុងទស្សនាវដ្តី Science បញ្ជាក់ថា បច្ចុប្បន្ននៅទូទាំងពិភពលោកមានសំរាមប្រភេទប្លាស្ទិកសរុបខ្ពស់ជាង២៧៥លានតោន ក្នុងចំនួននោះមានប្រហែល៣% ឬច្រើនជាង៨លានតោនត្រូវបោះចូលសមុទ្រ ។
ទិន្នន័យបញ្ជាក់ថា នៅដំណាច់ឆ្នាំ២០១៥ មានការព្យាករពីបរិមាណសំរាមប្លាស្ទិកនៅក្នុងមហាសមុទ្រនៅលើពិភពលោកនឹងកើនខ្ពស់ក្នុងកម្រិត៨លានតោន និងប្រភពនៃសំរាមប្លាស្ទិកនៅក្នុងមហាសមុទ្រភាគច្រើនចេញពី «ប្រទេសកំពុងអភិវឌ្ឍន៍» ។
នៅក្នុងការស្រាវជ្រាវនោះអះអាងថា ប្រទេសចិនជាប្រទេសកំពុងអភិវឌ្ឍន៍ បានបោះសំរាមប្រភេទប្លាស្ទិកចូលសមុទ្រខ្ពស់បំផុតនៅលើពិភពលោក មានប្រហែល៣០% នៃសំរាមប្លាស្ទិកនៅក្នុងសមុទ្រ បន្ទាប់មកឥណ្ឌូណេស៊ី ហ្វ៊ីលីពីន វៀតណាម ស្រីលង្កា ថៃ អេហ្ស៊ីប ម៉ាឡេស៊ី នីហ្សេរីយ៉ា និងបង់ក្លាដេស ជាប់ចំណាត់ថ្នាក់១០ប្រទេស ដែលបោះសំរាមប្លាស្ទិកចូលសមុទ្រយ៉ាងខ្ពស់ ។ ក្រុមអ្នកស្រាវជ្រាវបានអំពាវនាវដល់រដ្ឋាភិបាលក្នុងប្រទេសទាំង១៩២ នៅលើពិភពលោកដែលមានសមុទ្រ គួរចាត់ការលើបញ្ហានេះ ៕
ចែករំលែកព័តមាននេះ