រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាលខណ្ឌដង្កោ និងនគរបាលខណ្ឌបឹងកេងកង បានធ្វើការបង្ក្រាបករណីចាប់នារីៗញាត់ចូលវ៉ាលិស ដើម្បីជំរិតទារប្រាក់។ ដោយបានធ្វើការឃាត់ខ្លួនក្រុមឧក្រិដ្ឋជនជនជាតិចិន បានចំនួន២នាក់ ក្នុងនោះ…
រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាលខណ្ឌដង្កោ និងនគរបាលខណ្ឌបឹងកេងកង បានធ្វើការបង្ក្រាបករណីចាប់នារីៗញាត់ចូលវ៉ាលិស ដើម្បីជំរិតទារប្រាក់។ ដោយបានធ្វើការឃាត់ខ្លួនក្រុមឧក្រិដ្ឋជនជនជាតិចិន បានចំនួន២នាក់ ក្នុងនោះ នគរបាលបានរំដោះនារីរងគ្រោះ ដែលជាជនជាតិចិនម្នាក់ ផងដែរ ។
ជនសង្ស័យចំនួន២នាក់ រួមមាន ៖ ទី១, ឈ្មោះ JIAO YOUKE អាយុ២៧ឆ្នាំ ជនជាតិចិន និងទី២, ឈ្មោះ ZHENG NAIWEN អាយុ៣៧ឆ្នាំ ជនជាតិចិន ត្រូវនគរបាលឃាត់ខ្លួននៅចំណុចបុរីពិភពថ្មីកួរស្រូវ៣ សង្កាត់រលួស ខណ្ឌដង្កោ រាជធានីភ្នំពេញ ។
បើតាមនគរបាលបានឲ្យដឹងថា ក្រុមឧក្រិដ្ឋជនខាងលើធ្លាប់ធ្វើសកម្មភាព ចំនួន៦លើករួចមកហើយ ជាក់ស្ដែងកាលពីថ្ងៃទី១៣ ខែមករា ឆ្នាំ២០២៥ បានចាប់នារីម្នាក់ឈ្មោះ HO THI LUONG អាយុ៣៧ឆ្នាំ ជនជាតិវៀតណាម នៅចំណុចសណ្ឋាគារ នួ ឌី ស៊ី ស្ថិតនៅក្នុងសង្កាត់ទឹងថ្លា ខណ្ឌសែនសុខ រាជធានីភ្នំពេញ ដាក់ចូលទៅក្នុងវ៉ាលិស ដើម្បីជំរិតទារប្រាក់ ។
ក្រោយពីមានហេតុការណ៍ខាងលើកើតឡើង ដោយអនុវត្តតាមបទបញ្ជារបស់ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ នៅថ្ងៃទី២៦ ខែមករា ឆ្នាំ២០២៥ វេលាម៉ោង១៧និង៣០នាទី លោកឧត្តមសេនីយ៍ត្រី ហ៊ុន មុន្នីរ័ត្ន, វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ សហការជាមួយអធិការដ្ឋាននគរបាលខណ្ឌដង្កោ និងខណ្ឌបឹងកេងកង រហូតកំណត់បានអត្តសញ្ញាណ និងទីតាំងលាក់ខ្លួនរបស់ជនសង្ស័យខាងលើចំណុចបុរីពិភពថ្មីកួរស្រូវ៣ សង្កាត់រលួស ខណ្ឌដង្កោ រាជធានីភ្នំពេញ ដោយកម្លាំងជំនាញ បានជួយសង្គ្រោះជនរងគ្រោះបានម្នាក់ឈ្មោះ ZHAO KANG LI ភេទស្រី អាយុ៤០ឆ្នាំ ជនជាតិចិន ។
នគរបាលបានបញ្ជាក់ទៀតថា ជនសង្ស័យខាងលើ បានសារភាពថា ពួកខ្លួនដែលចូលរួមធ្វើសកម្មភាពមានគ្នា ចំនួន៣នាក់ ដោយបានធ្វើសកម្មភាពចាប់ស្ត្រីជនជាតិចិន និងវៀតណាម ដាក់ចូលទីក្នុងវ៉ាលិស ដើម្បីជំរិតទារប្រាក់ចំនួន៦ករណី មកហើយ ។
បច្ចុប្បន្នជនសង្ស័យខាងលើ ត្រូវបាននាយកដ្ឋាននគរបាលព្រហ្មទណ្ឌ កសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ។
ជាមួយគ្នានេះ នាយកដ្ឋាននគរបាលព្រហ្មទណ្ឌ សូមធ្វើការក្រើនរំលឹក និងអំពាវនាវឲ្យបណ្ដាផ្ទះសំណាក់ សណ្ឋាគារទាំងអស់ នៅពេលឃើញអ្នកអូសវ៉ាលីធំៗខុសប្រក្រតី សូមរាយការណ៍មកកាន់សមត្ថកិច្ចជាបន្ទាន់៕
ចែករំលែកព័តមាននេះ