ខេត្តបាត់ដំបង ៖ លំនៅឋានមួយខ្នងដែលធ្វើពីថ្មក្រោមឈើលើ ត្រូវអគ្គិភ័យលេបត្របាក់អស់គ្មានសល់ដែលគេអះអាងថា បណ្ដាលមកពីការទុស្សេខ្សែចរន្តអគ្គិសនី កាលពីវេលាម៉ោងជិត១រំលងអធ្រាត្រឈានចូលថ្ងៃទី១៦ មករា នៅភូមិគារ១ ឃុំគារ ស្រុកមោងឬស្សី…
ខេត្តបាត់ដំបង ៖ លំនៅឋានមួយខ្នងដែលធ្វើពីថ្មក្រោមឈើលើ ត្រូវអគ្គិភ័យលេបត្របាក់អស់គ្មានសល់ដែលគេអះអាងថា បណ្ដាលមកពីការទុស្សេខ្សែចរន្តអគ្គិសនី កាលពីវេលាម៉ោងជិត១រំលងអធ្រាត្រឈានចូលថ្ងៃទី១៦ មករា នៅភូមិគារ១ ឃុំគារ ស្រុកមោងឬស្សី តែមិនបង្កគ្រោះថ្នាក់ដល់មនុស្សទេ ។
យោងតាមរបាយការណ៍ការិយាល័យបង្ការ ពន្លត់អគ្គិភ័យ និងសង្គ្រោះ បានឲ្យដឹងថា លំនៅឋានដែលរងគ្រោះដោយអគ្គិភ័យនោះធ្វើពីថ្មក្រោមឈើខាងលើ មានទំហំ៧ម៉x០៩ម៉ ដែលមានម្ចាស់ឈ្មោះ ហៀង ហាន ប្រុស អាយុ៣៧ឆ្នាំ ។
បើតាមរបាយការណ៍ដដែល ក្រៅពីឆេះផ្ទះអស់ទាំងស្រុងសម្ភារៈ ឬទ្រព្យសម្បត្តិនានានៅក្នុងផ្ទះក៏ក្លាយជាផេះអស់ដែរ ។ តាមការស្រង់សម្ដីម្ចាស់ផ្ទះបានប្រាប់សមត្ថកិច្ចថា អគ្គិភ័យបានកើតឡើង នៅពេលក្រុមគ្រួសារទាំងអស់ កំពុងដេកលង់លក់ក្នុងដំណេក ។ ម្ចាស់ផ្ទះបានបញ្ជាក់ថា អគ្គិភ័យបានឆាបឆេះពីចំណុចផ្ទះបាយនៅខាងក្រោមដែលផ្ដើមចេញពីការទុស្សេខ្សែចរន្តអគ្គិសនី ។
អគ្គិភ័យបានឆេះផ្ទះអស់ទាំងស្រុងរួមទាំងសម្ភារៈ ទ្រព្យសម្បត្តិទាំងអស់ និង ឆេះប្រាក់សុទ្ធចំនួន០១លានរៀល ។ ប៉ុន្តែជនរងគ្រោះមិនទាន់ប៉ាន់ប្រមាណជាក់លាក់ពីការខាតបង់នៅឡើយទេ ខណៈអាជ្ញាធរ និងមន្ត្រីជំនាញកំពុងចុះពិនិត្យជាក់ស្ដែង និងចែកអំណោយសង្គ្រោះបន្ទាន់ដល់គ្រួសារជនរងគ្រោះ។
សូមបញ្ជាក់ថា ចាប់តាំងពីថ្ងៃ០១ មករា រហូតមកថ្ងៃទី១៦ មករា ឆ្នាំ២០២៥ នេះអគ្គិភ័យបានកើតឡើងចំនួន០៧លើកហើយ ។ ក្នុងនោះឆេះផ្ទះ សាលារៀន និងតូបលក់ទំនិញ តែពុំមានគ្រោះថ្នាក់ដល់មនុស្សទេ ៕
ចែករំលែកព័តមាននេះ