ខេត្តព្រៃវែង ៖ ផ្ទះឈើមួយខ្នងត្រូវបានអគ្គិភ័យឆាបឆេះអស់ទាំងស្រុង និងបុរសចំណាស់ម្នាក់ជាម្ចាស់ផ្ទះត្រូវភ្លើងឆេះរលាករលួយពេញខ្លួន ដោយសារតែព្យាយាមចូលទៅយកទូរស័ព្ទនៅក្នុងផ្ទះ ក្នុងពេលដែលភ្លើងកំពុងឆេះខ្លាំង ។ គ្រោះអគ្គិភ័យនេះបានកើតឡើង កាលពីវេលាម៉ោង៨ព្រឹក ថ្ងៃទី១៦…
ខេត្តព្រៃវែង ៖ ផ្ទះឈើមួយខ្នងត្រូវបានអគ្គិភ័យឆាបឆេះអស់ទាំងស្រុង និងបុរសចំណាស់ម្នាក់ជាម្ចាស់ផ្ទះត្រូវភ្លើងឆេះរលាករលួយពេញខ្លួន ដោយសារតែព្យាយាមចូលទៅយកទូរស័ព្ទនៅក្នុងផ្ទះ ក្នុងពេលដែលភ្លើងកំពុងឆេះខ្លាំង ។
គ្រោះអគ្គិភ័យនេះបានកើតឡើង កាលពីវេលាម៉ោង៨ព្រឹក ថ្ងៃទី១៦ មករា នៅតាមបណ្ដោយផ្លូវជាតិលេខ១១ ក្នុងភូមិជោគជ័យ ឃុំបាបោងស្រុកពាមរក៍ ខេត្តព្រៃវែង ។
ផ្ទះដែលត្រូវភ្លើងឆេះនេះជាប្រភេទផ្ទះឈើជញ្ជាំង និងដំបូលស័ង្កសីរនាបធ្វើពីឫស្សី ដែលមានទទឹង៥ម៉ែត្រ និងបណ្ដោយ៦ម៉ែត្រ កម្ពស់ពីដី ៣ម៉ែត្រមានម្ចាស់ឈ្មោះ សុខ វ៉េង ភេទប្រុស អាយុ៦៣ឆ្នាំ ។
តាមការបញ្ជាក់ពីបុរសជាម្ចាស់ផ្ទះបានអះអាងថា មុនពេលកើតហេតុ រូបគាត់បានដាក់ឆ្នាំងខ្សែភ្លើងដាំបាយនៅលើផ្ទះពេលដោតខ្សែភ្លើងរួច រូបគាត់បានចុះមកក្រោមធ្វើការនៅមុខផ្ទះសុខៗស្រាប់តែឮសំឡេងផ្ទុះផូងផាំងនៅលើផ្ទះ និងមានអណ្ដាតភ្លើងឆេះសទ្ធោសន្ធៅពេញផ្ទះ ភ្លាមនោះគាត់ក៏ស្រវ៉េស្រវ៉ារកទូរស័ព្ទ ដើម្បីខលហៅកូនចៅបងប្អូនឱ្យមកជួយ ប៉ុន្តែក៏នឹកឃើញថា ទូរស័ព្ទនៅក្រោមផ្ទះទើបស្ទុះចូលទៅយកទូរស័ព្ទមកវិញ ហើយក៏ត្រូវភ្លើងឆាបឆេះពេញទាំងមូលខ្លួនតែម្ដង ។
ដោយឡែក ប្រជាពលរដ្ឋនៅក្បែរនោះបានឱ្យដឹងថា ពេលពួកគាត់មកដល់ ឃើញបុរសជាម្ចាស់ផ្ទះត្រូវភ្លើងឆាបឆេះដេកដួលនៅមុខផ្ទះទើបនាំគ្នាស្ទុះចូលទៅជួយផ្សែងយកជនរងគ្រោះចេញមកក្រៅ ហើយបានទូរស័ព្ទហៅសមត្ថកិច្ច ជួយដឹកយកជនរងគ្រោះទៅសង្គ្រោះនៅមន្ទីរពេទ្យបង្អែកអ្នកលឿងភ្លាមៗ ហើយសមត្ថកិច្ចក៏បាននាំយករថយន្តពន្លត់អគ្គិភ័យមកជួយបាញ់ទឹកពន្លត់ភ្លាមៗផងដែរ ប៉ុន្តែដោយសារតែភ្លើងខ្លាំងពេកទើបមិនអាចស្រោចស្រង់ផ្ទះនេះបាន ។
ចំណែកសមត្ថកិច្ចបានបញ្ជាក់ថា តាមការពិនិត្យជាក់ស្ដែង ពេលដែលផ្ទុះសេរខ្សែភ្លើងនៅលើផ្ទះកើតជាអគ្គិភ័យនោះអណ្ដាតភ្លើងបានឆាបឆេះប៉ះត្រូវកំប៉ុងហ្គាសនៅលើផ្ទះទៀត ទើបធ្វើឲ្យផ្ទុះកំប៉ុងហ្គាស់ឆាបឆេះកាន់តែខ្លាំងគួបផ្សំផ្ទះនេះធ្វើពីឈើ និងឬស្សីថែមទៀតទើបធ្វើឱ្យភ្លើងឆេះលឿនរហូតមិនអាចបាញ់ទឹកពន្លត់ទាន់ គឺបានត្រឹមទប់ស្កាត់កុំឲ្យរាលដាលទៅដល់ផ្ទះអ្នកជិតខាងប៉ុណ្ណោះ ។
ដោយឡែក ក្រុមគ្រូពេទ្យមន្ទីរពេទ្យបង្អែកអ្នកលឿងបានឲ្យដឹងថា ដោយសារម្ចាស់ផ្ទះរងរបួសធ្ងន់ធ្ងរពេកទើបក្រុមគ្រូពេទ្យបញ្ជូនជនរងគ្រោះទៅព្យាបាលបន្តនៅឯរាជធានីភ្នំពេញ នៅព្រឹកថ្ងៃកើតហេតុនេះតែម្ដង ៕
ចែករំលែកព័តមាននេះ