រាជធានីភ្នំពេញ ៖ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានប្រកាសថា បណ្តាសិស្សសាលា ឬជនទំនើងទាំងឡាយណាដែលមានការរក្សាទុកដាវ ឬកាំបិតតាមខ្លួន ឬម៉ូតូ សមត្ថកិច្ចនឹងចាត់វិធានការទៅតាមផ្លូវច្បាប់ហើយ ដូច្នេះស្នើឱ្យអ្នកអាណាព្យាបាលចូលរួមតាមដាន…
រាជធានីភ្នំពេញ ៖ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានប្រកាសថា បណ្តាសិស្សសាលា ឬជនទំនើងទាំងឡាយណាដែលមានការរក្សាទុកដាវ ឬកាំបិតតាមខ្លួន ឬម៉ូតូ សមត្ថកិច្ចនឹងចាត់វិធានការទៅតាមផ្លូវច្បាប់ហើយ ដូច្នេះស្នើឱ្យអ្នកអាណាព្យាបាលចូលរួមតាមដាន និងត្រួតពិនិត្យកូនៗរបស់ខ្លួន ជៀសវាងការទទួលទោសទណ្ឌ ។
ថ្លែងប្រាប់អ្នកសារព័ត៌មាន លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានឱ្យដឹងថា បច្ចុប្បន្ននេះ សមត្ថកិច្ចជំនាញ បាននិងកំពុងបង្ក្រាប គឺផ្ដោតសំខាន់ទៅលើការកាន់កាប់ ប្រើប្រាស់អាវុធដោយខុសច្បាប់ ដូច្នេះការលួចលាក់ដាក់តាមម៉ូតូ ដែលបង្កឱ្យមានរបួសស្នាម រហូតដល់បាត់បង់ជីវិត គឺនឹងត្រូវអនុវត្តតាមវិធានការច្បាប់ហើយ ។ លោកបានបន្ថែមថា កន្លងមកសមត្ថកិច្ចជំនាញ តែងតែធ្វើការបង្ក្រាបបានជាបន្ដបន្ទាប់ និងចុះត្រួតពិនិត្យនៅតាមសាលារៀន ហើយជាលទ្ធផលមិនទាន់ឃើញមានសិស្សានុសិស្សដាក់អាវុធតាមខ្លួននោះទេ ។
ប៉ុន្តែទោះជាយ៉ាងណា អ្នកនាំពាក្យនគរបាលរាជធានីរូបនេះ សូមក្រើនរំលឹកទៅដល់សិស្សានុសិស្សថា ចាប់ពីពេលនេះទៅ សមត្ថកិច្ចនឹងចុះធ្វើរដ្ឋបាលនៅតាមសាលារៀន ហើយប្រសិនបើជាឃើញមានកាំបិត ដាវ ឬសម្ភារៈដែលបង្កឱ្យគ្រោះថ្នាក់ប៉ះពាល់ដល់ អាយុជីវិត ឬរបួសស្នាម គឺនឹងមានវិធានការអនុវត្តតាមផ្លូវច្បាប់ហើយ ។ ទន្ទឹមនឹងនោះ អ្នកនាំពាក្យនគរបាលរាជធានី ស្នើឱ្យអ្នកអាណាព្យាបាលចូលរួមតាមដាន និងត្រួតពិនិត្យកូនៗរបស់ខ្លួនផង ជៀសវាងទទួលការអនុវត្តទោសទណ្ឌ ក្នុងករណីរកឃើញមាន កាំបិត ដាវ ឬសម្ភារៈដែលបង្កឱ្យគ្រោះថ្នាក់ ។
បើតាមឯកឧត្តមឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានឱ្យដឹងដែរថា ឆ្នាំ២០២៥ ស្នងការនគរបាលរាជធានីភ្នំពេញ បានប្តេជ្ញាបង្កើនសកម្មភាពទ្វេដង ក្នុងការបង្ការ ទប់ស្កាត់ និងឈានទៅបង្ក្រាបក្រុមក្មេងទំនើង ដើម្បីធានាសន្ដិសុខ សណ្ដាប់ធ្នាប់ ជូនប្រជាពលរដ្ឋ ។
ក្នុងនោះឯកឧត្តមឧត្តមសេនីយ៍ឯក បានដាក់បទបញ្ជាដល់ស្នងការរងទទួលការងារព្រហ្មទណ្ឌ ពិសេសទទួលដឹកនាំការងារបង្ក្រាបទប់ស្កាត់ក្រុមក្មេងទំនើង ត្រូវចុះធ្វើបច្ចុប្បន្នភាពនៅតាមមូលដ្ឋាន ទាំងមុខសញ្ញាបង្ហោះម៉ូតូ ឬកែច្នៃមធ្យោបាយនានា ដើម្បីជាចំណែកក្នុងការអនុវត្តបទបញ្ជារបស់ប្រមុខនៃរាជរដ្ឋាភិបាល ឱ្យកាន់តែមានប្រសិទ្ធភាពខ្ពស់បំផុត ៕
ចែករំលែកព័តមាននេះ