រាជធានីភ្នំពេញ ៖ មានករណីអគ្គិភ័យឆាបឆេះតូបលក់ទូរសព្ទចំនួន២ទីតាំងទាំងស្រុង និងបន្តរាលដាលឆេះដល់ហាងលក់ទូរសព្ទចំនួន១ទីតាំង រួមនឹងផ្ទះពលរដ្ឋ១ខ្នង បង្កការខូចខាតដល់ទ្រព្យសម្បត្តិមួយចំនួនធំ ។

ហេតុការណ៍ខាងលើ​នេះបានបង្កការភ្ញាក់​ផ្អើល​កើតឡើងកាលពីវេលាម៉ោង៨និង៤០នាទីយប់ ថ្ងៃទី​២៦ ខែធ្នូ ឆ្នាំ២០២៤ នៅចំណុចច្រក​ចូលទៅកាន់វត្តសន្សំកុសល ស្ថិតក្នុងមូលដ្ឋានសង្កាត់បឹងទំពុន ខណ្ឌមានជ័យ រាជធានីភ្នំពេញ ។

តាមប្រភពព័ត៌មានពីប្រជាពលរដ្ឋបានឱ្យដឹងថា មុនកើតហេតុ គេឮសំឡេងផ្ទុះចេញពីបន្ទប់ផ្នែកខាងក្រោយនៃតូបលក់ទូរសព្ទខាងលើ ​លុះ​មួយសន្ទុះក្រោយមក ក៏ស្រាប់តែមានផ្សែងខ្មៅហ៊ុយ ឃ្មួល​ឃ្មាញ់លាយឡំអណ្តាតភ្លើងយ៉ាងសន្ធោសន្ធៅ ។ ភ្លាមៗនោះបង្កឱ្យមានការឆោឡោរពលរដ្ឋ រាយការណ៍​ជូនសមត្ថកិច្ចជំនាញមកជួយអន្តរាគមន៍​ពន្លត់តែម្ដង ។

បន្ទាប់ពីទទួល​​​បានព័ត៌មានខាងលើនេះ​ភ្លាម លោក​វរសេនីយ៍ឯក ព្រហ្ម យ៉ន បានបញ្ជាឱ្យកម្លាំងជំនាញបញ្ចេញរថយន្តពន្លត់អគ្គិភ័យ​ជាច្រើនគ្រឿងចុះជួយអន្តរាគមន៍ពន្លត់​ ដើម្បីទប់ស្កាត់កុំឱ្យមានការឆេះ​រាលដាលកាន់តែខ្លាំងបន្តទៀត ។

ក្នុងគ្រោះ​អគ្គីភ័យខាងលើនេះ ​បាន​លេបត្របាក់តូបលក់ទូរស័ព្ទអស់​ចំនួន២កន្លែងទាំងស្រុង និង​បានឆាបឆេះរាលដាលដល់ផ្ទះលក់ទូរសព្ទចំនួន១កន្លែងទៀត​អស់ទាំងស្រុង រួមទាំងទូរសព្ទ និង​គ្រឿងសម្ភារៈទូរសព្ទអស់មួយចំនួនធំ ​និង​រាលដាលឆេះដល់ផ្ទះប្រជាពលរដ្ឋ១ខ្នង (ខូចខាតអស់​១០%) ដោយបានប្រើប្រាស់រថយន្តពន្លត់អគ្គិភ័យរបស់ស្នងការរាជធានីចំនួន១៨គ្រឿង, រថយន្តពន្លត់អគ្គិភ័យរបស់កងរាជអាវុធហត្ថចំនួន៣គ្រឿង, រថយន្ត​ពន្លត់អគ្គិភ័យរបស់ក្រុមអូសុីអាយសុីចំនួន២គ្រឿង នឹងរថយន្តពន្លត់អគ្គិភ័យរបស់ស្រាបៀរ​ចំនួន១គ្រឿង រួមរថយន្តជំនួយរបស់ទីក្រុងកោះពេជ្រ, រថយន្តជ្រោយចង្វា បាញ់រលត់ជាស្ថាពរ ។

ចំណែកមូលហេតុបង្កជាអគ្គិភ័យខាងលើ ត្រូវបានសមត្ថកិច្ចកំពុងស្រាវជ្រាវស្វែងរកដើមចមនៃការ​ឆាបឆេះនេះ​ ៕