រាជធានីភ្នំពេញ ៖ នៅវេលាម៉ោង១០ព្រឹក ថ្ងៃទី២៣ ខែធ្នូ ឆ្នាំ២០២៤នេះ សមត្ថកិច្ច បានប្រគល់រថយន្ត ១គ្រឿង ជូនម្ចាស់ដើមវិញហើយ…
រាជធានីភ្នំពេញ ៖ នៅវេលាម៉ោង១០ព្រឹក ថ្ងៃទី២៣ ខែធ្នូ ឆ្នាំ២០២៤នេះ សមត្ថកិច្ច បានប្រគល់រថយន្ត ១គ្រឿង ជូនម្ចាស់ដើមវិញហើយ បន្ទាប់ពីជជនសង្ស័យម្នាក់ បានលួចពីកន្លែងលាងរថយន្តមួយ នៅខណ្ឌ៧មករា យកទៅប្លុងចោលកន្លែងលាងរថយន្តផ្សេងទៀត រួចខ្ចីម៉ូតូ បុគ្គលិកទីនោះ ជិះគេចខ្លួនបាត់ ។
ហេតុការណ៍ខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោង៦និង២០នាទីព្រឹកថ្ងៃទី២៣ ខែ ធ្នូ ឆ្នាំ ២០២៤ នៅចំណុចការ៉ាស់លាងរថយន្ត យីហោ Car Spa ស្ថិតតាមបណ្ដោយផ្លូវ១០៥ សង្កាត់បឹងប្រលឹត ខណ្ឌ៧មករា រាជធានីភ្នំពេញ ។
តាមប្រភពព័ត៍មានជនរងគ្រោះជាម្ចាស់រថយន្តម៉ាក Starex ពណ៌.ស ពាក់ស្លាកលេខ ភ្នំពេញ 2BA-4431 បានអោយដឹងថា កាលពីវេលាម៉ោង៦និង៥១នាទីព្រឹក ថ្ងៃកើតហេតុ គាត់បានយករថយន្តមកលាងនៅការ៉ាស់លាងរថយន្ត Car Spa រួច ក៏ចុះពីលើរថយន្តបានហុចសោ ទៅបុរសជនសង្ស័យ ស្មានតែបុគ្គលិក ។ តែចុងក្រោយ ពេលលាងរថយន្តយូរពេក ក៏មកសួរទើបដឹងថា បុរសដែលទទួលសោ រថយន្ត មិនមែនជាបុគ្គលិកលាងរថយន្តទេ ទើបបង្កការភ្ញាក់ផ្អើលថា ចោរលួចរថយន្តហើយរត់ទៅប្ដឹងសមត្ថកិច្ចប៉ុស្តិ៍នគរបាលរដ្ឋបាលបឹងប្រលឹត ដើម្បីស្រាវជ្រាវរករថយន្តខាងលើ ។
តាមប្រភពដដែលបានបន្តថា លុះមួយសន្ទុះក្រោយមក ក៏មានដំណឹងថា ជនសង្ស័យរូបនោះ បានបើករថយន្ត ដែលលួចពីគេនេះ ទៅប្លុងចោលនៅការ៉ាសមួយទៀត មានយីហោ ឆាយហ៊ាង នៅចំណុចដីឡូតិ៍លេខ១៦Eo ផ្លូវលេខ៩៩ សង្កាត់បឹងត្របែក ខណ្ឌចំការមន រួចហើយជនសង្ស័យរូបនេះបានប្រើល្បិច ទុករថយន្ត ហើយសុំខ្ចីម៉ូតូ បុគ្គលិកការ៉ាសឆាយហ៊ាង ម៉ាកហុងដា សេ១២៥ ពណ៌ខ្មៅ សេរី២០២៣ ពាក់ផ្លាកលេខភ្នំពេញ 1KH-2848 ហើយជិះគេចខ្លួនបាត់ បង្កការភ្ញាក់ផ្អើលយ៉ាងខ្លាំងតែម្តង ។
តាមប្រភពដដែល បានបន្តទៀតថា ជនរងគ្រោះបានហុចសោរថយន្តស្មានតែបុគ្គលិកលាងរថយន្ត ការពិត! ជនសង្ស័យ ដែលបានមកសុំថៅកែការ៉ាស់លាងរថយន្ត ដើម្បីសុំការងារធ្វើ ប៉ុន្តែថៅកែមិនអោយធ្វើ ទើបឈរនៅមុខការ៉ាស់ ។
ក្រោយពេលកើតហេតុ សមត្ថកិច្ចកិច្ចមូលដ្ឋានបានចុះទៅដល់ទីតាំងកន្លែងកើតហេតុ រហូតដល់១០:០០នាទីព្រឹកថ្ងៃដដែល សមត្ថកិច្ចប្រគល់រថយន្តខាងលើជូនជនរងគ្រោះវិញ ចំណែកជនសង្ស័យ និងម៉ូតូដែលបាត់ សមត្ថកិច្ចកំពុងស្រាវជ្រាវស្វែងរកឃាត់ខ្លួន ដើម្បីអនុវត្តតាមនីតិវិធី ៕
ចែករំលែកព័តមាននេះ