រាជធានីភ្នំពេញ ៖ បុរសជាសន្តិសុខម្នាក់ បានបើករថយន្តរបស់ភ្ញៀវ​ចេញទៅ​ចាក់សាំង មិនថាមានបញ្ហាអ្វីនោះទេ ស្រាប់តែ​ជ្រុលទៅបុកទម្លុះចូលហាង​ចិនមួយកន្លែង បណ្ដាលឲ្យរងការខូចខាត ។

ហេតុការណ៍ខាងលើនេះបានបង្កការភ្ញាក់ផ្អើល​កើតឡើង​កាលពី​វេលាម៉ោង៨យប់ថ្ងៃទី២២ ខែធ្នូ ឆ្នាំ ២០២៤ តាមបណ្ដោយផ្លូវសបិទ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

តាមប្រភពព័ត៌មានពីកន្លែងកើតហេតុ បានដឹងថា មុនពេលកើតហេតុ បុរសជាសន្តិសុខម្នាក់ត្រូវបានភ្ញៀវជនជាតិចិនប្រេីអោយបើករថយន្តរបស់ខ្លួនម៉ាក KII carnival ពណ៌ស ពាក់ស្លាកលេខ ភ្នំពេញ 2BN-8638 ចេញ​ពី​ក្លឹប​កម្សាន្ត​មួយ​កន្លែង ដើម្បីយកទៅចាក់សាំង ដោយបេីក​បរ​ធ្វើដំណើរតាមបណ្ដោយផ្លូវ​សបិទ ក្នុង​ទិសដៅពីត្បូងទៅជើង លុះមកដល់ចំណុចកើតហេតុ មិនដឹងថាអ្នកបើកបរមានបញ្ហាបច្ចេកទេសអ្វី ឬ​ស្លន់រឿង​អ្វី​នោះទេ ក៍ស្រាប់តែធ្វើឲ្យរថយន្ត​នោះ​ជ្រុលចង្កូតទៅខាងឆ្វេងដៃ ហើយ​បុកទម្លុះចូល​ហាង​មួយកន្លែង​យីហោស្ប៉ាឆ្នេរមាស បណ្ដាលឲ្យរងការខូចខាតបែកកញ្ចក់​អស់ចំនួនមួយផ្ទាំង ក៏ដូចជាខូចខាតរថយន្តផ្នែកខាងមុខកល់ជាប់​នៅមុខហាង ទៅមុខលែងរួច ។ ក្នុងហេតុការណ៍នេះដែរ មិនបង្កឲ្យមាន​មនុស្សណាម្នាក់​រងរបួសនោះទេ គ្រាន់តែខូចខាតសម្ភារៈដូចជាកញ្ចក់ទ្វារ​​ហាង និងរថយន្តតែប៉ុណ្ណោះ ។

ក្រោយកើតហេតុ មានតំណាងខាងរថយន្តបានមកធ្វើការសម្របសម្រួលជាមួយនឹងភាគីម្ចាស់​ហាង ដោយភាគីខាងរថយន្ត​បានជួយចេញថ្លៃការខូចខាតសម្ភារៈទៅអោយខាងម្ចាស់ហាង ដើម្បីបញ្ចប់រឿង ៕