ខេត្តបាត់ដំបង ៖ នេះជាលើកដំបូងហើយដែល «សមាគមអភិរក្សភ្លេងខ្មែរ» នៅខេត្តសៀមរាប បាននាំយកឧបករណ៍ភ្លេងខ្មែរជាច្រើនប្រភេទ មកដាក់តាំងបង្ហាញនៅខេត្តបាត់ដំបង ក្នុងកម្មវិធីប្រគំតន្ត្រី និង សម្ដែងសិល្បៈរបស់ក្រុមសិល្បៈ…
ខេត្តបាត់ដំបង ៖ នេះជាលើកដំបូងហើយដែល «សមាគមអភិរក្សភ្លេងខ្មែរ» នៅខេត្តសៀមរាប បាននាំយកឧបករណ៍ភ្លេងខ្មែរជាច្រើនប្រភេទ មកដាក់តាំងបង្ហាញនៅខេត្តបាត់ដំបង ក្នុងកម្មវិធីប្រគំតន្ត្រី និង សម្ដែងសិល្បៈរបស់ក្រុមសិល្បៈ «មហោស្រពសិល្បៈជំនោរART» កាលពីសប្ដាហ៍មុន នៅលើបរិវេណសួនច្បារសម្ដេចក្រឡាហោម ស ខេង ក្នុងក្រុងបាត់ដំបង បំណងដើម្បីឲ្យមហាជនទូទៅបានស្គាល់ ។
សមាជិកម្នាក់នៃសមាគមអភិរក្សភ្លេងខ្មែរ លោក ខែម ស៊ីនួន វ័យ៤២ឆ្នាំ បានផ្ដល់បទសម្ភាសន៍យ៉ាងខ្លីជាមួយកោះសន្តិភាពក្នុងរាត្រីដ៏មមារញឹកថា នេះជាលើកដំបូងហើយ ដែលក្រុម «សមាគមអភិរក្សភ្លេងខ្មែរ»របស់លោក បាននាំយកឧបករណ៍ភ្លេងខ្មែរជាច្រើនប្រភេទ មកដាក់តាំងបង្ហាញឲ្យមហាជនទូទៅបានឃើញ និងបានស្គាល់នៅក្នុងខេត្តបាត់ដំបង តាមរយៈកម្មវិធីប្រគំតន្ត្រី និងសម្ដែងសិល្បៈរបស់«មហោស្រពសិល្បៈជំនោរART» ។
អ្នកអភិរក្សភ្លេងខ្មែររូបនេះបាននិយាយដូច្នេះថា «កន្លងមក សមាគមអភិរក្សភ្លេងខ្មែររបស់ខ្ញុំ មិនធ្លាប់ចេញទៅតាំងបង្ហាញឧបករណ៍ភ្លេងខ្មែរនៅតាមបណ្ដាខេត្តផ្សេងៗក្រៅពីខេត្តសៀមរាបទេ ។ ហើយនេះជាលើកទី១ ដែលក្រុមសមាគមខ្ញុំ នាំយកឧបរកណ៍ភ្លេងខ្មែរ មកដាក់តាំងបង្ហាញឲ្យមហាជនទូទៅបានស្គាល់» ។
លោកបាននិយាយបន្តថា «គោលបំណងចម្បងរបស់សមាគមខ្ញុំគឺចង់តាំងបង្ហាញ ដើម្បីឲ្យប្រជាពលរដ្ឋខ្មែរ កូនខ្មែរជំនាន់ក្រោយៗ និងជនបរទេសបានឃើញ និងបានស្គាល់ច្បាស់នូវឧបករណ៍ភ្លេងខ្មែរយើង ។ ប៉ុន្តែយ៉ាងណា ក្រុមសមាគមខ្ញុំ មិនបាននាំយកឧបករណ៍ភ្លេងខ្មែរគ្រប់ទម្រង់មកតាំងបង្ហាញទេ គឺយកមកមួយចំនួនតែប៉ុណ្ណោះ» ។
នៅក្នុងកម្មវិធីប្រគំតន្ត្រី និងសម្ដែងសិល្បៈរបស់ «មហោស្របសិល្បៈជំនោរART» រយៈពេល០៣រាត្រី គេឃើញមានការដាក់តាំងពិព័រណ៌នូវទំនិញ និងសម្ភារនានាជាច្រើនតូប ដែលភាគច្រើននៃទំនិញនិងសម្ភារទាំងនោះមានលក្ខណៈបែបសិល្បៈ ដែលកើតចេញពីការច្នៃប្រឌិតមានដូចជា ការតាំងផ្ទាំងគំនូរសហសម័យ សម្ភារប្រើប្រាស់ ឬវត្ថុតាងអនុស្សាវរីយ៍ដែលធ្វើអំពីស្រទបចេក និងកាកសំណល់ផ្សេងៗ និងការសម្ដែងសិល្បៈរបស់អង្គការ «ហ្វាពន្លឺសិល្បៈ» ការប្រគំតន្ត្រីសម័យ និងការប្រគំឧបករណ៍ភ្លេងខ្មែរ។ល។ និង។ល។
ងាកមកនិយាយពីក្រុម «សមាគមអភិរក្សភ្លេងខ្មែរ» របស់អ្នកខេត្តសៀមរាបវិញ ក្នុងរាត្រីដ៏អធិកអធ័មនោះ ពួកគេហាក់ប្រឹងប្រែងសម្បើមណាស់ក្នុងការប្រគំភ្លេងសម្ដែងក្បាច់រាំ ដើម្បីឲ្យភ្ញៀវបានទស្សនា និង បានឃើញពីការប្រគំឧបករណ៍ភ្លេងខ្មែរ ដែលមានសូរសៀងដ៏ពីរោះរណ្តំមានទម្រង់ផ្សេងៗគ្នា ។
ជាមួយនឹងការតាំងបង្ហាញឧបករណ៍ភ្លេងខ្មែរជាច្រើនប្រភេទនេះ បើតាមលោក ខែម ស៊ីនួន បានប្រាប់ថា ឧបករណ៍ភ្លេងខ្មែរ ដែល«សមាគមអភិរក្សភ្លេងខ្មែរ» របស់លោកយកមកដាក់តាំងបង្ហាញឲ្យមហាជនបានឃើញបានស្គាល់នេះ រួមមានដូចជា៖ ទ្រខ្មែរគ្រប់ប្រភេទ ស្គរ ចាប៉ីដងវែង និងខ្លុយគ្រប់ប្រភេទ។ល។និង ។ល។ អ្នកអភិរក្សភ្លេងខ្មែររូបនេះ បានប្រាប់ដែរថា ក្នុងរយៈពេល០៣រាត្រី នៃកម្មវិធី«មហោស្រពសិល្បៈជំនោរ ART» នេះ មានអតិថិជនជាច្រើនបានជាវឧបករណ៍ភ្លេងរបស់លោកយកទៅប្រើប្រាស់ ក្នុងនោះមាន «ចាប៉ីដងវែង និងទ្រខ្មែរ» ។
លោកបានបញ្ជាក់ថា សព្វថ្ងៃនេះ ក្រុម«សមាគមអភិរក្សភ្លេងខ្មែរ»របស់លោកមានអ្នកជំនាញផលិតឧបករណ៍ភ្លេងខ្មែរគ្រប់ប្រភេទ គ្រប់ទម្រង់ ដែលមានទីតាំងនៅភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប ។ លោកបានបន្ថែមថា ឧបករណ៍ភ្លេងខ្មែររបស់សមាគមលោក ភាគច្រើនដាក់តាំងបង្ហាញតែនៅក្នុងខេត្តសៀមរាប ពេលមានកម្មវិធីបុណ្យជាតិធំៗ ដូចបុណ្យចូលឆ្នាំខ្មែរ ឆ្នាំសកល បុណ្យភ្ជុំបិណ្ឌ និងបុណ្យអុំទូក។ល។
គោលបំណងចម្បងនៃការដាក់បង្ហាញឧបករណ៍ភ្លេងខ្មែរនេះ គឺ សមាគមរបស់លោក ចង់ឲ្យប្រជាពលរដ្ឋខ្មែរ និងជនបរទេសបានស្គាល់ច្បាស់នូវ«ឧបករណ៍ភ្លេងខ្មែរ» ដែលខ្មែរបុរាណយើងបានបង្កើតឡើង ។ ជាពិសេស កូនខ្មែរជំនាន់ក្រោយៗ ។ ព្រោះបើតាមលោកដឹងមានកូនខ្មែរស្ទើរ៦០% ដែលមានស្គាល់«ឧបករណ៍ភ្លេងខ្មែរ» ដូច្នេះហើយ ទើបក្រុមរបស់លោក បង្កើតជា«សមាគមអភិរក្សភ្លេងខ្មែរ» ដើម្បីអភិរក្សឧបករណ៍ភ្លេងខ្មែរ និងនាំយកឧបករណ៍ភ្លេងទាំងនេះ ទៅដាក់តាំងបង្ហាញជាសាធារណៈ នៅក្នុងកម្មវិធីនានា ដើម្បីឲ្យកូនមហាជនបានឃើញ និងបានស្គាល់ច្បាស់នូវ «ឧបករណ៍ភ្លេងខ្មែរ» ដែលជាកេរ្តិ៍ដំណែលរបស់ដូចតាខ្មែរ ៕
ចែករំលែកព័តមាននេះ