រាជធានីភ្នំពេញ ៖ អ្នកនាំពាក្យរងក្រសួងមហាផ្ទៃបានឲ្យដឹងថា ក្នុងរយៈពេល២សប្តាហ៍កន្លងមកនេះ គិតចាប់ពីថ្ងៃទី២ រហូតដល់ថ្ងៃទី១៥ ខែធ្នូ ឆ្នាំ២០២៤ មន្ត្រីទទួលបន្ទុកការងារអត្តសញ្ញាណកម្មនៃក្រសួងមហាផ្ទៃបានបន្តផ្តល់សេវាអត្តសញ្ញាណប័ណ្ណសញ្ជាតិខ្មែរសរុបចំនួន៩.៩១៤សន្លឹកជូនប្រជាពលរដ្ឋដោយ ឥតគិតថ្លៃនៅទូទាំងប្រទេស…
រាជធានីភ្នំពេញ ៖ អ្នកនាំពាក្យរងក្រសួងមហាផ្ទៃបានឲ្យដឹងថា ក្នុងរយៈពេល២សប្តាហ៍កន្លងមកនេះ គិតចាប់ពីថ្ងៃទី២ រហូតដល់ថ្ងៃទី១៥ ខែធ្នូ ឆ្នាំ២០២៤ មន្ត្រីទទួលបន្ទុកការងារអត្តសញ្ញាណកម្មនៃក្រសួងមហាផ្ទៃបានបន្តផ្តល់សេវាអត្តសញ្ញាណប័ណ្ណសញ្ជាតិខ្មែរសរុបចំនួន៩.៩១៤សន្លឹកជូនប្រជាពលរដ្ឋដោយ ឥតគិតថ្លៃនៅទូទាំងប្រទេស ។
លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃឱ្យដឹងតាមប្រព័ន្ធតេឡេក្រាម នៅថ្ងៃខែធ្នូ ឆ្នាំ២០ ២៤ បានលើកឡើងថា ក្នុងរយៈពេលដូចគ្នានេះមន្ត្រីក៏បានបន្តផ្តល់សេវាអត្តសញ្ញាណកម្មផ្សេងទៀត សរុបជាង២ម៉ឺនសេវាជូនដល់ប្រជាពលរដ្ឋដោយឥតគិតថ្លៃដែរក្នុងនោះរួមមាន សេវាលិខិតឆ្លងដែនមានចំនួន១១.៧១៨ក្បាល លិខិតធ្វើដំណើរមានចំនួន២.៨២៧ក្បាល សៀវភៅស្នាក់នៅមានចំនួន៤.២១៣ក្បាល និងសៀវភៅគ្រួសារមានចំនួន៣.៦៧៣ក្បាល ។
បើតាមលោកបណ្ឌិត ទូច សុឃៈ ដើម្បីបំពេញតម្រូវការរបស់ប្រជាពលរដ្ឋ អគ្គនាយដ្ឋានអត្ត សញ្ញាណកម្ម នៃក្រសួងមហាផ្ទៃបានរិះរកគ្រប់មធ្យោបាយ ដើម្បីបង្កើនប្រសិទ្ធភាពនៃការផ្ដល់សេវាឱ្យកាន់តែល្អប្រសើរជូនប្រជាពលរដ្ឋស្របតាមគោលនយោបាយរបស់រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាដែលជំរុញឱ្យក្រសួងមហាផ្ទៃយកចិត្តទុកដាក់ខ្ពស់ ធ្វើយ៉ាងណាឱ្យសេវាសាធារណៈមានភាពងាយស្រួលជូនពលរដ្ឋ។
អ្នកនាំពាក្យបានបន្ថែមថា ជាក់ស្ដែងអគ្គនាយដ្ឋានអត្តសញ្ញាណកម្មបានដាក់ចេញនូវសេវាជាច្រើនតាមប្រព័ន្ធអនឡាញ (online) ជូនប្រជាពលរដ្ឋ ព្រមទាំងបន្តផ្ដល់សេវាទាំងថ្ងៃសៅរ៍ និងថ្ងៃអាទិត្យ នៅតាមមូលដ្ឋាន និងនៅតាមផ្សារទំនើប ខណៈឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានដាក់គោលការណ៍ឱ្យបន្តសិក្សាតាមបណ្តាច្រកចេញចូលតែមួយ ដើម្បីជំរុញការផ្តល់សេវាធ្វើអត្តសញ្ញាណប័ណ្ណជូនប្រជាពលរដ្ឋឱ្យបានឆាប់រហ័សប្រកបដោយគុណភាព និងប្រសិទ្ធភាព ស្របតាមទស្សនៈអ្វីៗធ្វើ ដើម្បីផ្តល់ភាពកក់ក្តៅជូនប្រជាពលរដ្ឋ ។
សូមបញ្ជាក់ថា ដើម្បីជំរុញការងារផ្ដល់សេវាអត្តសញ្ញាណប័ណ្ណ អគ្គនាយកដ្ឋានអត្ត សញ្ញាណកម្ម បានអំពាវនាវដល់ប្រជាពលរដ្ឋ ដែលមានសន្លឹកអត្តសញ្ញាណប័ណ្ណគំរូថ្មីរបកខូច សូមមេត្តាយកមកប្តូរនៅតាម ប៉ុស្តិ៍នគរបាលរដ្ឋបាល ឬអធិការដ្ឋាននគរបាលក្រុង ស្រុក ខ័ណ្ឌ ឬស្នងការដ្ឋាននគរបាលរាជធានីខេត្តនៃទីកន្លែងដែលបងប្អូនរស់នៅ ឬនៅនាយកដ្ឋាន អត្តសញ្ញាណប័ណ្ណសញ្ជាតិខ្មែរ ។
ដោយឡែកអ្នកមានអត្តសញ្ញាណប័ណ្ណជិតផុតសុពលភាពក៏អាចស្នើសុំធ្វើឡើងវិញដោយឥតគិតថ្លៃនៅទីតាំងទាំងនោះបានដែរ ៕
ចែករំលែកព័តមាននេះ