ខេត្តកោះកុង ៖ ទីតាំងដីតំបន់បរិស្ថានមួយកន្លែងដែលជាព្រៃលិចទឹក មានទំហំជាង២០០ហិកតា( 2kmការ៉េ ) ស្ថិតក្នុងភូមិសារ៉ាយ ឃុំជ្រោយស្វាយ ស្រុកស្រែអំបិល ខេត្តកោះកុង…
ខេត្តកោះកុង ៖ ទីតាំងដីតំបន់បរិស្ថានមួយកន្លែងដែលជាព្រៃលិចទឹក មានទំហំជាង២០០ហិកតា( 2kmការ៉េ ) ស្ថិតក្នុងភូមិសារ៉ាយ ឃុំជ្រោយស្វាយ ស្រុកស្រែអំបិល ខេត្តកោះកុង កំពុងត្រូវបានឈ្មួញដីសំរុកដឹកដី ដើម្បីចាក់លុបទាំងយប់ទាំងថ្ងៃ ដោយប្រើរថយន្តប៉ែនរាប់សិបគ្រឿង និងគ្រឿងចក្រសំរាប់ឈូសឆាយជាច្រើនគ្រឿងទៀត ។
មន្ត្រីបរិស្ថានខេត្តមួយរូបសុំមិនបញ្ចេញឈ្មោះបានបង្ហើបប្រាប់កោះសន្តិភាព នៅរសៀលទី១៦ ខែធ្នូ ឆ្នាំ២០២៤ ថា ទីតាំងដីដែលកំពុងត្រូវបានចាក់លុបខាងលើ គឺស្ថិតក្នុងតំបន់ប្រើប្រាស់ច្រើនយ៉ាងដងពែង លាតសន្ធឹងពីស្រុកស្រែអំបិលដល់ស្រុកបុទុមសាគរ មានផ្ទៃក្រឡារាប់ពាន់ហិកតា ស្ថិតក្រោមការគ្រប់គ្រងរបស់ក្រសួងបរិស្ថាន ។ លោកថា ពលរដ្ឋអាចចូលអាស្រ័យផលក្នុងតំបន់នេះ តាមកល្ខណៈធម្មជាតិបាន និងទីតាំងខ្លះ ត្រូវបានការពារដោយពលរដ្ឋសហគមន៍ និងអាស្រ័យផលជាលក្ខណៈសហគមន៍ ឯរឿងឈ្មួញចាក់ដីរំលោភអត់មាននិយាយសោះ ។
ពលរដ្ឋរស់នៅក្នុងភូមិសារ៉ាយ ឃុំជ្រោយស្វាយជាច្រើនគ្រួសារបានបញ្ជាក់ដូចៗគ្នាថា កាលពីអំឡុង២ខែមុន ពួកគាត់សង្កេតឃើញមានគ្រឿងចក្រចូលមកឈូសឆាយផ្លូវ និងដាំបង្គោលភ្លើងចូលទៅកាន់ទីតាំងព្រៃលិចទឺកខាងលើនោះ ។ បន្ទាប់មក ឃើញមានការសាងសង់អគារធ្វើពីដែក និងចាក់បេតុងគ្រឹះយ៉ាងរឹងមាំ និងកំពុងបន្តការសាងសង់ ហើយក្នុងរយៈពេល២សប្តាហ៍ចុងក្រោយនេះ គេឃើញមានហ្វូងឡានដឹកដីជាច្រើនគ្រឿង សំរុកដឹកដីទាំងយប់ទាំងថ្ងៃចាក់ដីព័ទ្ធជុំវិញទីតាំងខាងលើរាប់សិបហិកតា ។
លោកឈុន ឈិន មេភូមិសារ៉ាយ បានបញ្ជាក់ថា រូបលោកក៏មិនទាន់បានទទួលការជូនដំណឹង ឬការអនុញ្ញាតពីថ្នាក់ណាមួយមកដល់មូលដ្ឋានរបស់លោកដែរ ។ លោកមេភូមិក៏បានបញ្ជាក់បន្ថែមដែរថា ការចាក់ដីលុបព្រៃលិចទឹកនេះ គឺមានទំហំរាប់រយហិកតា ដែលពីមុនព្រៃលិចទឹកនេះត្រូវបានហាម មិនអោយពលរដ្ឋណាម្នាក់ចូលកាប់ទន្ទ្រានក្នុងតំបន់បរិស្ថានមួយនេះឡើយ ។
មេការមួយរូបដែលនៅឈរបញ្ជារថយន្តដឹកដីចាក់លុបទីតាំងព្រៃលិចទឹកខាងលើ បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី១៧ ធ្នូ ២០២៤ ថា ថៅកែរបស់លោកបានទិញទីតាំងដីនេះជាព្រៃលិចទឹកចំនួន៨ហិកតាពីលោកឧកញ៉ា អ៊ឹង ឃាង ដើម្បីបើកធ្វើអាជីវកម្មស្រែចិញ្ចឹមបង្គារ និងកំពុងរត់ច្បាប់សាងសង់ និងច្បាប់អាជីវកម្មធនធានរ៉ែ ។
លោក ហុង ប្រុស អភិបាលរងស្រុកស្រែអំបិលទទួលបន្ទុកការងារដីធ្លីបានឆ្លើយតបតាមប្រព័ន្ឋតេលេក្រាមប្រាប់កោះសន្តិភាពនៅព្រឹកថ្ងៃទី១៧ ធ្នូ ថា ទីតាំងខាងលើ ពិតជាមានគំរោងវិនិយោគស្រែចិញ្ចឹមបង្គារប្រាកដមែន ចំពោះឯកសារផ្លូវច្បាប់នៅមិនទាន់ឃើញខាងម្ចាស់ដីយកមកបង្ហាញអាជ្ញាធរនៅឡើយទេ ។ ប៉ុន្តែលោកថា ធ្លាប់ឃើញប្រធានការិយាល័យច្រកចេញចូលតែមួយនៃរដ្ឋបាលខេត្តចុះមកពិនិត្យម្តងដែរ ប៉ុន្តែមិនទាន់ទទួលបានការសំរេចនៅឡើយទេ សង្ស័យសុទ្ធតែដីខ្យល់ទាំងអស់គ្មានជំនាញណាហ៊ានលក់ទេ ។
មន្ត្រីជាន់ខ្ពស់មួយរូបបានបង្ហើបអោយដឹងថា មិនមានស្ថាប័នណាហ៊ានអនុញ្ញាតប្រគល់ដីតំបន់បរិស្ថាន អោយក្រុមហ៊ុន ឬបុគ្គលឯកជនគ្រប់គ្រង ឬធ្វើអាជីវកម្មដោយបំផ្លាញព្រៃលិចទឹកធម្មជាតិរាប់រយហិកតាបែបនេះឡើយ ។
មហាជននិយាយថា ក្រុមហ៊ុនចិនទិញដី៨ហិកតាពីឧកញ៉ា អ៊ឹង ឃាង សង្ស័យដីខ្យល់ ព្រោះជាព្រៃលិចទឹករបស់រដ្ឋ ហើយឈូសយករាប់រយរាប់សិបហិកតាតែម្តង ។ ដោយសារតែហេតុនេះ ទើបរយៈពេលកន្លងមក ពលរដ្ឋជាច្រើរូបត្រូវបានចាប់ខ្លួនដាក់ពន្ធនាគារពីមន្ត្រីបរិស្ថាន ដោយជាប់ចោទពីបទថាបំផ្លាញដីព្រៃក្នុងតំបន់បរិស្ថាន ។
ក្រៅពីនេះ នៅមានបទចោទជាច្រើនផ្សេងទៀតដូចជាបទរំលោភដែនសមត្ថកិច្ចគ្រប់គ្រងដោយក្រសួងធនធានទឹក និងឧតុនិយម(ទំនប់ការពារទឹកប្រៃ) រំលោភដែនសមត្ថកិច្ចគ្រប់គ្រងដោយរដ្ឋបាលជលផល ជាប់បទចោទការលួចធ្វើអាជីកម្មលើធនធានរ៉ែលួចកម្រៃសួយសារបាត់ប្រាក់ពន្ឋរបស់រដ្ឋ និងជាពិសេស គឺបានធ្វើសកម្មភាពផ្គើនទៅនឹងការសំរេចរបស់ក្រសូងរៀបចំដែនដីនគរូបនីយកម្ម និងសំណង់ ដែលបានចេញស.ជ.ណប្រគល់ដីនេះអោយទៅពលរដ្ឋចំនួន១២គ្រួសាតាំងពីឆ្នាំ២០២០មកម្ល៉េះ ។
ចំណែកឧកញ៉ា អ៊ឹង ឃាង មិនអាចទាក់ទងសុំការបំភ្លឺបានទេ ព្រោះលោកមិនលើកទូរស័ព្ទ ។ សម្រាប់ព័ត៌មានបន្ថែមនឹងមានផ្សាយជូនបន្តនៅលើកាសែតកោះសន្តិភាព ។
ចែករំលែកព័តមាននេះ