រាជធានីភ្នំពេញ ៖ បុរសម្នាក់បានបើករថយន្ត FORTUNER បោះពួយយ៉ាងលឿនក៏បានរេចង្កូតជ្រុលទៅបុករទេះលក់សាច់អាំង បណ្តាលឲ្យបុរសវ័យចំណាស់ម្នាក់ស្លាប់នៅនិងកន្លែងកើតហេតុភ្លាមៗ ហើយរថយន្តបង្កមិនព្រមឈប់ដោះស្រាយព្យាយាមបើករត់គេចចូលក្នុងផ្ទះត្រូវសមត្ថកិច្ចតាមឃាត់បានកាលពីវេលាម៉ោង ៧និង៣០នាទីយប់ថ្ងៃទី១៥ ខែធ្នូ ឆ្នាំ២០២៤ ស្ថិតនៅលើផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ។

​ជនរងគ្រោះ​ឈ្មោះ មិន វឿន ភេទប្រុស អាយុ ៥៩ឆ្នាំ មុខរបរលក់សាច់អាំង ស្នាក់នៅម្តុំចាក់អង្រែលើ មានស្រុកកំណើតនៅភូមិព្រៃជ្រៃ ឃុំព្រៃជ្រៃ ស្រុកពោធិ៍រៀង ខេត្តព្រៃវែង ។

ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញ រថយន្តបង្កម៉ាក FOR TU NER ពណ៌ខ្មៅ ពាក់ស្លាកលេខ កណ្តាល 2B-7966 បើកបរដោយបុរសម្នាក់ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីត្បូងទៅជើងក្នុងល្បឿនយ៉ាងលឿន ខណះបើកមកដល់ចំណុចកើតហេតុខាងលើស្រាប់តែរេចង្កូតមកខាងស្តាំដៃ ជ្រុលទៅបុករ៉ឺម៉កលក់សាច់អាំងដែលលក់ដោយបុរសរងគ្រោះម្នាក់នៅលើចិញ្ចើមផ្លូវ៦០ម៉ែត្រយ៉ាងពេញទំហឹងបណ្តាលឲ្យប៉ើងរ៉ឺម៉កខ្ទាតសាច់អាំង និងសម្ភារះលក់ដូរពាសពេញដងផ្លូវខូចខាតស្ទើរទាំងស្រុង ចំណែកឯបុរសជាអ្នកលក់វិញបានស្លាប់ក្បែររ៉ឺម៉កយ៉ាងអាណោចអាធ័ម ។ ភ្លាមនោះដែររថយន្តបង្កមិនព្រមឈប់ដោះស្រាយនោះទេបានបន្តល្បឿនបើករត់គេចខ្លួនពីកន្លែងកើតហេតុមកចូលសំងំនៅក្នុងផ្ទះ ក្រោយមកដោយប្រជាពលរដ្ឋក្បែរខាងបានរាយការណ៍ទៅសមត្ថកិច្ចឲ្យចុះមកធ្វើការឃាត់យករថយន្តបង្កបានភ្លាមៗ ចំណែកអ្នកបើកបរបានរត់គេចខ្លួនបាត់ស្រមោល។

បន្ទាប់ពីកើតហេតុខាងលើ សមត្ថកិច្ចមូលដ្ឋានសហការជាមួយនិងជំនាញចរាចរណ៍ចុះមកដល់ធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជំនាញផ្លូវគោក នៃស្នងការដ្ឋាន​នគបាលរាជធានីភ្នំពេញ រងចាំភាគីសងខាងដោះស្រាយគ្នានៅពេលក្រោយ។ សពសមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារយកទៅស្រុកកំណើត ធ្វើបុណ្យតាមប្រពៃណី ៕