រាជធានីភ្នំពេញ ៖ ទោះបីជាមានការអភិវឌ្ឍន៍ជាច្រើនទសវត្សរ៍ ក៏ដោយ នៃការរួមគ្នាទប់ស្កាត់ការឆ្លងជំងឺអេដស៍ក្តី បើយោងតាមអង្គការ UN AIDS បានឲ្យដឹងថា ប្រជាជនប្រហែល៤០លាននាក់…
រាជធានីភ្នំពេញ ៖ ទោះបីជាមានការអភិវឌ្ឍន៍ជាច្រើនទសវត្សរ៍ ក៏ដោយ នៃការរួមគ្នាទប់ស្កាត់ការឆ្លងជំងឺអេដស៍ក្តី បើយោងតាមអង្គការ UN AIDS បានឲ្យដឹងថា ប្រជាជនប្រហែល៤០លាននាក់ នៅទូទាំងពិភពលោក កំពុងរស់នៅជាមួយមេរោគអេដស៍ ដែលជាងពាក់កណ្តាល នៃពួកគេជាស្ត្រី និងកុមារី ស្របនឹងតាមរបាយការណ៍ ការឆ្លងថ្មី ប្រមាណ ១.៣លាននាក់ ជារៀងរាល់ឆ្នាំ ។ ទាក់ទិននឹងជំងឺអែដស៍នេះដែរ អង្គការថែ ទាំសុខភាពអ្នកជំងឺអេដស៍ បានអំពាវនាវថា ការប្រយុទ្ធនឹងជំងឺអេដស៍ មិនទាន់បញ្ចប់ទេ គឺត្រូវធ្វើរហូតដល់ពេលមេរោគអេដស៍រលាយបាត់ ។
ព្រះរាជាណាចក្រកម្ពុជាយក ថ្ងៃទី១ ខែធ្នូ ឆ្នាំ២០២៤ ក្នុងការទទួលស្គាល់ ទិវាពិភពលោក ប្រយុទ្ធនឹងជំងឺអេដស៍នោះ អង្គការមូលនិធិថែទាំសុខភាពអ្នកជំងឺអេដស៍កម្ពុជា សម្រាប់ឆ្នាំនេះ នឹងមានរៀបចំ ព្រឹត្តិការណ៍រំលឹក ទិវាពិភពលោក ប្រយុទ្ធនឹងជំងឺអេដស៍ នៅខេត្តសៀមរាប នៅថ្ងៃទី១ ខែធ្នូ ដើម្បីលើកកម្ពស់ការយល់ដឹងថា «ការប្រយុទ្ធនឹងមេរោគអេដស៍/ជំងឺអេដស៍ មិនទាន់បញ្ចប់ទេ» ។
ព្រឹត្តិការណ៍នេះ មានគោលបំណងលើកកម្ពស់ការយល់ដឹង លើកកម្ពស់ការបង្ការការឆ្លងមេរោគអេដស៍ ការធ្វើតេស្តរកមេរោគអេដស៍ ការព្យាបាល និងគាំទ្រដល់អ្នក ដែលរងផលប៉ះពាល់ដោយសារមេរោគអេដស៍/ជំងឺអេដស៍ នៅក្នុងប្រទេសកម្ពុជា និងទូទាំងពិភពលោក ។
ការមាក់ងាយ និងការរើសអើងបានបន្តរារាំងបុគ្គលពីការស្វែងរកការថែទាំចាំបាច់ ហើយ ប្រជាជនគន្លឹះជាច្រើនកំពុងប្រឈមមុខនឹងឧបសគ្គដ៏ច្រើនក្នុងការទទួលបានការព្យាបាល។ ព្រឹត្តិការណ៍ទិវាពិភពលោកប្រយុទ្ធនឹងជំងឺអេដស៍នឹងផ្តោតលើ បញ្ហាប្រឈមទាំងនេះ ដោយសង្កត់ធ្ងន់លើតម្រូវការ ដើម្បីកំណត់ការឆ្លើយតបទៅនឹងមេរោគអេដស៍/ជំងឺអេដស៍ ដែល ជាអាទិភាពលើរបៀបវារៈសុខភាពសាធារណៈថ្នាក់ជាតិ និងពិភពលោក ។
អង្កការមូលនិធិថែមទាំងសុខភាពអ្នកជំងឺអេដស៍កម្ពុជា បានបញ្ជាក់ថា ទោះបីជាទទួលបានជោគជ័យពីមុនក៏ដោយ ការកើនឡើង នៃការឆ្លងមេរោគអេដស៍ថ្មី ក្នុងចំណោមប្រជាជនគន្លឹះ មានន័យថា យើងមិនទាន់ពេញចិត្តនៅឡើយ នេះបើតាមលោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី ។
លោកវេជ្ជបណ្ឌិតបញ្ជាក់ថា៖ «រដ្ឋាភិបាល ត្រូវតែផ្តល់អាទិភាពដល់ការបង្ការ ការព្យាបាល និងសេវាថែទាំមេរោគអេដស៍ ដោយធានាថា ពុំមាននរណាម្នាក់ត្រូវមើលរំលងឡើយ» ។
លោកវេជ្ជបណ្ឌិតបញ្ជាក់ថា៖ «នៅពេលយើងប្រារព្ធទិវាពិភពលោកប្រយុទ្ធនឹងជំងឺអេដស៍នេះ យើងទទួលស្គាល់ថា «ការប្រយុទ្ធនឹងមេរោគអេដស៍/ ជំងឺអេដស៍ មិនទាន់បញ្ចប់ទេ» ហើយយើង បញ្ជាក់ឡើងវិញ នូវការប្តេជ្ញាចិត្តរបស់យើងក្នុងការបញ្ចប់ជំងឺអេដស៍ដោយ ការលើកកម្ពស់គោលនយោបាយរួមគ្នា និងធានាឱ្យមានលទ្ធភាពទទួលបានការធ្វើតេស្ត និងការព្យាបាលសម្រាប់ប្រជាជនគ្រប់រូប» ។
ទិវាពិភពលោកប្រយុទ្ធនឹងជំងឺអេដស៍នេះ ដើរតួជាវេទិកាដ៏សំខាន់មួយសម្រាប់អ្នកតស៊ូមតិ ចំពោះមេរោគអេដស៍/ជំងឺអេដស៍ ដើម្បីទទួលស្គាល់វឌ្ឍនភាពដែលបានទទួល ចងចាំរំលឹកដល់អ្នកដែលបានបាត់បង់ជីវិតទាក់ទងនឹងជំងឺអេដស៍ និងអ្នកដែលបន្តការប្រយុទ្ធ និងអំពាវនាវឱ្យរដ្ឋាភិបាលទូទាំងពិភពលោកប្តេជ្ញាផ្តល់ធនធានចាំបាច់ និងការគាំទ្រផ្នែកនយោបាយ ដើម្បីបញ្ចប់មេរោគអេដស៍/ជំងឺអេដស៍ ៕
ចែករំលែកព័តមាននេះ