រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា អំពាវនាវដល់ប្រជាពលរដ្ឋ បណ្តារោងចក្រ សហគ្រាស ក្រសួង-ស្ថាប័ន គ្រឹះស្ថានធនាគារ និង ហិរញ្ញវត្ថុ…
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា អំពាវនាវដល់ប្រជាពលរដ្ឋ បណ្តារោងចក្រ សហគ្រាស ក្រសួង-ស្ថាប័ន គ្រឹះស្ថានធនាគារ និង ហិរញ្ញវត្ថុ បន្តចូលរួមប្រើប្រាស់ប្រាក់រៀលឱ្យបានកាន់តែទូលំទូលាយ ការទូទាត់ ការបិតស្លាកថ្លៃទំនិញជារៀល ការសន្សំ ព្រមទាំង ផ្តល់អនុគ្រោះឱ្យកាន់តែច្រើនចំពោះការប្រើប្រាស់ប្រាក់រៀល ។
ឯកឧត្តម យឹម លាត ទេសាភិបាលរងធនាគារជាតិនៃកម្ពុជា ថ្លែងក្នុងសិក្ខាសាលាផ្សព្វផ្សាយស្ដីពី “ប្រាក់រៀល ប្រព័ន្ធបាគង និងខេអេចហ្សូអរ”នៅខេត្តបន្ទាយមានជ័យ នៅថ្ងៃទី ២៥ ខែ វិច្ឆិកា ឆ្នាំ ២០២៤ នេះថា ដើម្បីឱ្យសេដ្ឋកិច្ចកម្ពុជារឹងមាំ រាជរដ្ឋាភិបាល កម្ពុជាបានដាក់ចេញនូវគោលនយោបាយជាច្រើន ជាពិសេសចាប់តាំងពីដើមទសវត្សរ៍ឆ្នាំ២០០០ មក ក្នុងនោះក៏មានគោលនយោបាយ លើកកម្ពស់ការប្រើប្រាស់ប្រាក់រៀលផងដែរ ស្របពេលដែលស្ថានភាពម៉ាក្រូសេដ្ឋកិច្ចមានលំនឹងល្អប្រសើរ ក្រោយកម្ពុជាទទួលបានសុខ សន្តិភាពពេញលេញនៅចុងឆ្នាំ ១៩៩៨ ក្រោមនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយក រដ្ឋមន្ត្រី នៃព្រះរាជាណាចក្រកម្ពុជា និងបច្ចុប្បន្នជាប្រធានព្រឹទ្ធសភា ។
លទ្ធផលសិក្សាស្រាវជ្រាវរបស់ធនាគារជាតិនៃកម្ពុជា ដោយសហការជាមួយ (JICA) កន្លងមក បានបង្ហាញថា ប្រាក់រៀលបាន ទទួលការទុកចិត្ត និងការប្រើប្រាស់កាន់តែច្រើន ក្នុងជីវភាពប្រចាំថ្ងៃរបស់ប្រជាពលរដ្ឋ ជាពិសេសនៅតាមតំបន់ជនបទ ដែលប្រាក់រៀល ដើរតួនាទីចម្បង និងទូលំទូលាយទាំងក្នុងសកម្មភាពរកប្រាក់ចំណូល ចំណាយ និងសន្សំ។ ជាក់ស្តែង សម្រាប់ខេត្តបន្ទាយមានជ័យ ទិន្នន័យស្រាវជ្រាវបង្ហាញថា គិតជាមធ្យមប្រមាណ៧១% នៃការចំណាយប្រចាំថ្ងៃរបស់ប្រជាជន ត្រូវបានធ្វើឡើងជាប្រាក់រៀល, ទោះបី ជាខេត្តនេះស្ថិតនៅជាប់ព្រំដែន និងមានការដោះដូរពាណិជ្ជកម្មជាមួយប្រទេសជិតខាងច្រើនក៏ដោយ ។
ចំណែកការចំណាយជាប្រចាំ, លទ្ធផលសិក្សាស្រាវជ្រាវរបស់ធនាគារជាតិនៃកម្ពុជា សហការជាមួយអង្គការ (UNDP) ក្នុងឆ្នាំ ២០២៣ បានបង្ហាញដែរថា កម្មករនិយោជិតរោងចក្រដែលរស់នៅតាមបណ្តាខេត្ដ ចាយវាយប្រចាំថ្ងៃរហូតដល់ទៅ ៩២% នៃចំណាយ សរុបជាប្រាក់រៀល ជាពិសេសទៅលើការស្នាក់នៅ ថ្លៃទឹក-ភ្លើង ការធ្វើដំណើរជិតឆ្ងាយ អាហារ សំលៀកបំពាក់ និងថ្នាំសង្កូវ។ ចំណែក ឯកម្មករនិយោជិតអ្នកដែលរស់នៅទីក្រុង ចាយវាយជាប្រាក់រៀល រហូតដល់ ៨២% នៃចំណាយសរុប។ ដូចនេះ ប្រសិនទាំងអ្នកលក់ និងអ្នកទិញ ប្រើប្រាស់ប្រាក់រៀលតែមួយនោះ គឺនឹងអាចជួយដល់ការលក់ដូរងាយស្រួល និងមិនចាំ បាច់ពិបាកគិតគូរដល់អត្រាប្តូរ ប្រាក់នោះទេ។ ជុំវិញប្រាក់រៀលនេះ, ឯកឧត្តម បានអំពាវនាវដល់ក្រសួង-ស្ថាប័ន រោងចក្រ ក្រុមហ៊ុន សហគ្រាស គ្រឹះស្ថានធនាគារ និងហិរញ្ញវត្ថុ ជាពិសេសបងប្អូនប្រជាពលរដ្ឋទូទៅ សូមបន្តចូលរួមប្រើប្រាស់ប្រាក់រៀលឱ្យបានកាន់តែទូលំទូលាយ ទាំងការទូទាត់ជា ប្រាក់រៀល ការបិទស្លាកថ្លៃទំនិញជារៀល និងការសន្សំជាប្រាក់រៀលជាដើម ។
ដោយឡែកប្រព័ន្ធបាគង, ឯកឧត្តម យឹម លាត ថ្លែងឱ្យដឹងថា បច្ចុប្បន្នការទូទាត់ប្រាក់ឆ្លងដែនជាមួយប្រទេសវៀតណាម ថៃ និងឡាវ គឺ Scan QR Code ជាប្រាក់រៀលតែម្តង ដោយមិនចាំបាច់ដូរជាដុល្លារឡើយ ហើយនៅក្នុងឆ្នាំនេះ ធនាគារជាតិនៃកម្ពុជា នឹងអាច តភ្ជាប់ជាមួយប្រទេសឥណ្ឌា និងចិន ហើយមានផែនការតភ្ជាប់ជាមួយប្រទេសផ្សេងទៀតក្នុងពិភពលោកផងដែរ។ ចំណែកបាគង សម្រាប់ទេសចរ (BakongTourists App) ភ្ញៀវទេសចរក៏អាចប្រើបាគងសម្រាប់ទេសចរនេះ នៅតាមបណ្ដាប្រទេសក្នុងតំបន់ ដែល កម្ពុជាបានតភ្ជាប់ប្រព័ន្ធទូទាត់នេះជាមួយផងដែរដូចជា ប្រទេសថៃ វៀតណាម ឡាវ និងមានប្រទេសជាច្រើនទៀត ៕ អត្ថបទសហការ
ចែករំលែកព័តមាននេះ