ទីក្រុងម៉ូស្គូ៖ ប្រទេសរុស្ស៊ីព្រមានថាខ្លួននឹងចាត់វិធានការឆ្លើយតបជាបន្ទាន់នៅក្នុងពេលឆាប់ៗនេះបន្ទាប់ពីអ៊ុយក្រែនចាប់ផ្ដើមបាញ់គ្រាប់មីស៊ីលរយៈចម្ងាយឆ្ងាយម៉ាកអាត់តាខំ (ATACMS) របស់អាមេរិកចូលទឹកដីរុស្ស៊ីកាលពីយប់មិញ។ នៅក្នុងចំណោមមីស៊ីល៨គ្រាប់ដែលបាញ់តម្រង់ទៅរកឃ្លាំងអាវុធរបស់រុស្ស៊ីនោះ ប្រព័ន្ធការពារដែនអាកាសរុស្ស៊ីអាចបាញ់ទម្លាក់បាន២គ្រាប់។ នៅសល់៦គ្រាប់ទៀតអាចបាញ់ចំគោលដៅ។ នេះបើយោងតាមប្រភពពីក្រុមស៊ើបការណ៍សម្ងាត់អាមេរិក។
ការបាញ់មីស៊ីលនេះហាក់ដូចជាធ្វើផ្គើននឹងបទបញ្ជាដ៏ម៉ឺងម៉ាត់របស់ប្រមុខដឹកនាំរុស្ស៊ី លោកពូទីន ដែលទើបតែប្រកាសកែប្រែនយោបាយនុយក្លេអ៊ែរកាលពីម្សិលមិញដើម្បីរក្សាសិទ្ធិប្រើប្រាស់នុយក្លេអ៊ែរនៅក្នុងករណីដែលរុស្ស៊ីរងការវាយប្រហារតាមគ្រប់រូបភាព។ ដូច្នេះ អ្នកវិភាគខ្លះយល់ថាការបាញ់មីស៊ីលរបស់អ៊ុយក្រែនអាចជាការធ្វើតេស្តសាកល្បង ឬស្ទង់ចិត្តភាពអត់ធ្មត់របស់រុស្ស៊ីផង ឬអាចនិយាយម៉្យាងទៀតថា «ចាំមើលតើរុស្ស៊ីហ៊ានប្រើនុយក្លេអ៊ែរ ឬនិយាយបានត្រឹមតែមាត់ទទេ?»
រដ្ឋមន្ត្រីការបរទេសរុស្ស៊ី លោកឡាវរ៉ូស (Lavrov) បានថ្លែងនៅខួបមួយពាន់ថ្ងៃនៃសង្គ្រាមថាការដែលអ៊ុយក្រែនបាញ់មីស៊ីលអាមេរិកចូលទឹកដីរុស្ស៊ីនោះជាការបង្ហាញថាក្រុមបស្ចិមប្រទេសមានចេតនាចង់ពង្រីកសង្គ្រាមនេះយ៉ាងពិតប្រាកដ។ នៅឯកិច្ចប្រជុំកំពូលជីម្ភៃដែលរៀបចំនៅប្រទេសប្រេស៊ីល លោកឡាវរ៉ូសថ្លែងថារុស្ស៊ីចាត់ទុកថានេះជាដំណាក់កាលថ្មីមួយនៃការវាយប្រហារពីសំណាក់ក្រុមបស្ចិមប្រទេសទៅលើប្រទេសរុស្ស៊ី។ ដូច្នេះ លោកបញ្ជាក់ថារុស្ស៊ីនឹងចាត់វិធានការឆ្លើយតបវិញ។
លោកពូទីនចុះហត្ថលេខាលើក្រឹតថ្មីស្ដីពីនយោបាយនុយក្លេអ៊ែរត្រូវសេតវិមាន អង់គ្លេស និងសហភាពអឺរ៉ុបថ្កោលទោស និងចាត់ទុកថានេះជាទង្វើដែលគ្មានការទទួលខុសត្រូវ។ លោកពូទីនធ្លាប់ប្រើប្រាស់វោហារសាស្ត្របែបនេះជារឿយៗថាកុំលេងសើចជាមួយរុស្ស៊ី ប្រយ័ត្នរុស្ស៊ីប្រើអាវុធនុយក្លេអ៊ែរ។ ជាពិសេស កាលពីឆ្នាំ២០២៣ លោកបានដកខ្លួនពីសន្ធិសញ្ញាហាមធ្វើតេស្តអាវុធនុយក្លេអ៊ែរ និងដកខ្លួនពីកិច្ចព្រមព្រៀងដទៃទៀតស្ដីពីការកាត់បន្ថយគ្រឿងសព្វាវុធជាយុទ្ធសាស្ត្រ។
ប្រមុខដឹកនាំអ៊ុយក្រែន លោកហ្សេឡិនស្គី បានរិះគន់ក្រុមប្រទេសជីម្ភៃដែលជួបប្រជុំគ្នានៅប្រេស៊ីលនោះថាមិនអាចដាក់ចេញវិធានការអ្វីមួយប្រកបដោយប្រសិទ្ធភាពដើម្បីឆ្លើយតបទៅនឹងការគំរាមកំហែងរបស់លោកពូទីន។ ជាក់ស្ដែង សេចក្ដីថ្លែងការណ៍របស់ជីម្ភៃបានលើកឡើងអំពីបញ្ហាជាច្រើននៅលើពិភពលោក ប៉ុន្តែមិនបានដាក់ចេញវិធានការឱ្យបានហ្មត់ចត់ដើម្បីដោះស្រាយបញ្ហាទាំងនោះទេ។ លោកហ្សេឡិនស្គីចោទប្រកាន់ថាលោកពូទីនមិនចាប់អារម្មណ៍អំពីសន្តិភាពទេ។
«កាលពីយប់មិញ អ៊ុយក្រែនបាញ់មីស៊ីលជាច្រើនគ្រាប់ទៅលើទីតាំងនៅតំបន់ប្រ៊ីយ៉ង់ (Bryansk)។ នៅម៉ោង៣:២៥ទៀបភ្លឺ ពួកសត្រូវបាញ់មីស៊ីល៦គ្រាប់ចូលតំបន់ប្រ៊ីយ៉ង់។ យោងតាមទិន្នន័យដែលទទួលបាន ពួកគេប្រើប្រាស់មីស៊ីលរបស់អាមេរិកម៉ាកអាត់តាខំ (ATACMS) ជាប្រភេទមីស៊ីលតាក់ទិច (tactic)»។ ខាងលើនេះជាការប្រកាសរបស់ក្រសួងការពារជាតិរុស្ស៊ី។ រដ្ឋមន្ត្រីការបរទេសរុស្ស៊ីហាក់ដូចជាចង់សង្កត់ធ្ងន់ ឬចង់ដាក់បន្ទុកទៅលើអាមេរិកជាអ្នកអុជអាល ឬនៅពីក្រោយរឿងនេះ។
លោកយល់ថាបើគ្មានការជួយជ្រោមជ្រែង និងចង្អុលបង្ហាញពីអាមេរិកខាងផ្នែកបច្ចេកទេសទេ អ៊ុយក្រែនមិនអាចបាញ់មីស៊ីលចំគោលដៅដល់ថ្នាក់ហ្នឹងទេ។ ម៉ូស្គូធ្លាប់និយាយថាបើអ៊ុយក្រែនវាយប្រហាររុស្ស៊ីដោយប្រើអាវុធរបស់អាមេរិក ពេលនោះ រុស្ស៊ីចាត់ទុកថាអាមេរិកបានចូលប្រឡូកដោយផ្ទាល់នៅក្នុងសង្គ្រាមនេះ។ អ្នកនាំពាក្យវិមានក្រឹមឡាំងថ្លែងថារុស្ស៊ីចាំបាច់ត្រូវតែអនុវត្តនយោបាយនុយក្លេអ៊ែរថ្មីដើម្បីឱ្យស៊ីសង្វាក់គ្នានឹងសភាពការណ៍ជាក់ស្ដែងនាពេលបច្ចុប្បន្ន៕
ចែករំលែកព័តមាននេះ