ទីក្រុងកៀវ៖ តើអ៊ុយក្រែនកំពុងធ្វើតេស្តភាពអត់ធ្មត់របស់រុស្ស៊ីឬយ៉ាងណា? បន្ទាប់ពីរុស្ស៊ីធ្វើបច្ចុប្បន្នភាពនយោបាយនុយក្លេអ៊ែររបស់ខ្លួនមិនបានប៉ុន្មានម៉ោងផង អ៊ុយក្រែនបានពន្លះរុស្ស៊ីដោយមីស៊ីលរបស់អាមេរិកម៉ាកអាត់តាខំ (ATACMS) ជាច្រើនគ្រាប់។ នេះជាជាលើកដំបូងបំផុតដែលអ៊ុយក្រែនហ៊ានធ្វើដូច្នេះចាប់តាំងពីទទួលបានសញ្ញាភ្លើងខៀវពីលោកបៃដិន។ ការបាញ់មីស៊ីលឆ្ងាយៗចូលទឹកដីរុស្ស៊ីនោះក៏ធ្វើឡើងចំខួបទី១ពាន់ថ្ងៃនៃការផ្ទុះសង្គ្រាមអ៊ុយក្រែនផងដែរ។
លោកពូទីនទើបតែផ្ដល់សច្ចាប័នជាផ្លូវការដើម្បីកែសម្រួលនយោបាយនុយក្លេអ៊ែររបស់រុស្ស៊ីដែលកំណត់ថា «លើកនេះមិនចាំបាច់ប្រទេសដទៃវាយប្រហាររុស្ស៊ីដោយនុយក្លេអ៊ែរ, មិនចាំបាច់ប្រទេសដទៃវាយប្រហារទ្រង់ទ្រាយធំគំរាមកំហែងចំពោះសិទ្ធិរស់រានមានជីវិតរបស់រុស្ស៊ី និងមិនចាំបាច់រដ្ឋមិនមែននុយក្លេអ៊ែរវាយប្រហារដោយអាវុធធម្មតាប៉ុន្តែមានរដ្ឋនុយក្លេអ៊ែរនៅពីក្រោយខ្នងនោះទេ។ សំខាន់ឱ្យតែប្រទេសដទៃហ៊ានប៉ះរុស្ស៊ីតែប៉ុនសរសៃសក់ រុស្ស៊ីនឹងពិចារណាប្រើអាវុធនុយក្លេអ៊ែរ»។
បណ្ដាញតេឡេក្រាមដែលមានទំនាក់ទំនងជាមួយយោធាអ៊ុយក្រែនបានបង្ហោះវីឌីអូឃ្លីបកាលពីយប់មិញដែលអះអាងថាគ្រាប់មីស៊ីលអាត់តាខំរបស់អាមេរិកត្រូវបានបាញ់ចេញពីទីតាំងមួយនៃប្រទេសអ៊ុយក្រែន។ យោងតាមមន្ត្រីរដ្ឋាភិបាលអាមេរិក អ៊ុយក្រែនបាញ់មីស៊ីលនោះប្រហែល៨គ្រាប់។ នៅក្នុងចំណោមនោះ ប្រព័ន្ធការពារដែនអាកាសរុស្ស៊ីអាចបាញ់ទម្លាក់បាន២គ្រាប់។ ឥឡូវនេះ អាមេរិកកំពុងវាយតម្លៃអំពីទំហំនៃការខូចខាតរបស់រុស្ស៊ីដោយសារគ្រាប់មីស៊ីលទាំងនោះ។
គេដឹងថាគ្រាប់មីស៊ីលបានវាយប្រហារទីតាំងស្តុកទុកគ្រាប់រំសេវរបស់រុស្ស៊ីនៅទីក្រុងការ៉ាឆេវ (Karachev) ដែលមានប្រជាជនរស់នៅ១៨០០០នាក់។ មន្ត្រីរូបនេះនិយាយយោងតាមប្រភពពីខាងក្រុមស៊ើបការណ៍សម្ងាត់។ សភាពការណ៍ប្រែប្រួលថ្មីនេះជាការគួរឱ្យព្រួយបារម្ភ។ ស្រួលមិនស្រួលអាចនឹងផ្ទុះសង្គ្រាមនុយក្លេអ៊ែរមែន, មិនអាចមើលស្រាលបានឡើយ។ លោកពូទីនប៊ិះតែនឹងប្រើអាវុធនុយក្លេអ៊ែរម្ដងហើយកាលពីពេលដែលសង្គ្រាមអ៊ុយក្រែនផ្ទុះឡើងខ្លាំងកាលពីខែតុលា ឆ្នាំ២០២២។
បញ្ហានៅត្រង់ថាអាមេរិកកំពុងបារម្ភខ្លាំងនៅពេលរុស្ស៊ីទទួលបានកងទ័ពជំនួយពីកូរ៉េខាងជើងរាប់ពាន់នាក់ ប្រភពខ្លះថាដល់ជាង១ម៉ឺននាក់ ដើម្បីវាយបណ្ដេញកងទ័ពអ៊ុយក្រែនចេញពីតំបន់ខឺស និងជួយវាយប្រហារនៅអ៊ុយក្រែនខាងកើត។ គិតចាប់ពីថ្ងៃនេះទៅ អ៊ុយក្រែនយ៉ាងហោចណាស់មានពេល២ខែដើម្បីប្រើប្រាស់គ្រាប់មីស៊ីលរបស់អាមេរិកបាញ់ឆ្ងាយៗចូលទឹកដីរុស្ស៊ីទម្រាំលោកត្រាំឡើងកាន់អំណាច។ លោកសន្យាថានឹងខិតខំបិទបញ្ចប់សង្គ្រាមត្រឹមតែរយៈពេល២៤ម៉ោង។
បើយោងតាមអ្នកវិភាគ ទាំងរុស្ស៊ី និងអ៊ុយក្រែនមិនអាចមានធនធានច្រើនសម្បូរហូរហៀរដើម្បីប្រឡូកនៅក្នុងសង្គ្រាមនេះរយៈពេលយូរពេកទេ។ គ្រាន់តែថារុស្ស៊ីនៅមានផ្លូវដើរវែងឆ្ងាយ និងមានធនធានច្រើនជាងអ៊ុយក្រែនតែប៉ុណ្ណោះ។ នៅក្នុងករណីបាញ់មីស៊ីលយប់មិញនោះ អ៊ុយក្រែនទទួលស្គាល់ថាខ្លួនបានវាយប្រហារដេប៉ូស្តុកទុកអាវុធយុទ្ធភ័ណ្ឌរបស់រុស្ស៊ីនៅទីក្រុងការ៉ាឆេវនៃតំបន់ប្រ៊ីយ៉ង់ (Bryansk) ពិតប្រាកដមែន។ ប៉ុន្តែអ៊ុយក្រែនមិនបានបញ្ជាក់ថាវាយប្រហារដោយមីស៊ីលអ្វីទេ។
យោធាអ៊ុយក្រែនថ្លែងថាគេស្ដាប់ឮសំឡេងផ្ទុះយ៉ាងកងរំពងផ្ទួនៗគ្នានៅលើទីតាំងវាយប្រហារនោះ។ នៅពេលអ្នកសារព័ត៌មានសួរថាតើអ៊ុយក្រែនវាយប្រហារដោយមីស៊ីលអាត់តាខំមែនឬទេ? ប្រមុខដឹកនាំអ៊ុយក្រែន លោកហ្សេឡិនស្គី មិនបានឆ្លើយថាមែន ឬមិនមែនទេ។ លោកគ្រាន់តែបង្ហើបដោយខ្លីថាអ៊ុយក្រែនមានអាវុធសម្រាប់វាយប្រហារឆ្ងាយៗ។ អ៊ុយក្រែនមានយន្តហោះដ្រូនផលិតនៅក្នុងស្រុកដែលអាចវាយប្រហាររយៈចម្ងាយឆ្ងាយ ហើយក៏មានមីស៊ីលម៉ាកអាត់តាខំផងដែរ៕
ចែករំលែកព័តមាននេះ