រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធភា និងជាប្រធានគណបក្សប្រជាជនកម្ពុជា បានបញ្ជាក់ថា កម្ពុជាត្រូវការរៀនសូត្រពីទីម័រឡេស្តេ នូវការគ្រប់គ្រងធនធានប្រេង…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធភា និងជាប្រធានគណបក្សប្រជាជនកម្ពុជា បានបញ្ជាក់ថា កម្ពុជាត្រូវការរៀនសូត្រពីទីម័រឡេស្តេ នូវការគ្រប់គ្រងធនធានប្រេង ដោយកម្ពុជា នៅមិនទាន់បានវិនិយោគ ឬក៏យកផលប្រយោជន៍ ពីធនធានប្រេងដែលមាននៅក្នុងដែនសមុទ្រ និងដែនដីគោក នៅឡើយទេ ។
ការបញ្ជាក់របស់សម្ដេចតេជោ ប្រធានព្រឹទ្ធសភា ខណៈអនុញ្ញាតឱ្យលោក អ៊ឺមេណេហ្ស៊ីលដូ គុប៉ា ឡូប៉េស (Ermenegildo Kupa Lopes) ឯកអគ្គរដ្ឋទូត វិសាមញ្ញ និងពេញសមត្ថភាព នៃសាធារណរដ្ឋប្រជាធិបតេយ្យទីម័រ ឡេស្តេ (ទីម័រខាងកើត) ចូលជួបសម្តែងការគួរសម នៅព្រឹកថ្ងៃទី១៩ ខែវិច្ឆិកា ឆ្នាំ២០២៤ ។
ក្នុងជំនួបសម្ដេចតេជោ បានកោតសរសើរ និងមានមោទនភាព ចំពោះការរីកចម្រើនលើគ្រប់វិស័យ នៃទំនាក់ទំនងរវាងប្រទេសយើងទាំងពីរ កម្ពុជា និងទីម័រឡេស្តេ ដោយទំហំពាណិជ្ជកម្មក៏ បានកើនឡើង ពិសេសអរគុណទីម័រឡេស្តេ ដែលបាននាំអង្ករពីកម្ពុជា ចំនួន៤ពាន់តោន នៅ ឆ្នាំ២០២៤នេះ ។
ជាមួយគ្នានោះដែរ សម្ដេចតេជោ បានផ្ដល់ជាអនុសាសន៍យ៉ាងដូច្នេះថា ៖ «ដើម្បីធានាស្ថិរភាព នៃការផ្គត់ផ្គង់ និងសន្តិសុខស្បៀង សម្រាប់ទីម័រឡេស្តេ ទីម័រឡេស្តេ គួរតែពិចារណាលើការវិនិយោគទុននៅកម្ពុជា ដោយបង្កើតឃ្លាំងស្តុកម៉ាស៊ីនកិនស្រូវ និងបណ្ដាញទិញស្រូវអង្ករ យកមកកិនហើយនាំទៅកាន់ប្រទេសទីម័រឡេស្តេ រួមទាំងផលិតផលកសិកម្មផ្សេងៗ ដើម្បីផ្ដល់ក្នុងវិស័យចិញ្ចឹមសត្វ ផងដែរ» ។
ក្នុងជំនួបនោះដែរ សម្ដេចតេជោ ក៏បានមានប្រសាសន៍ផងដែរថា យើងមានលទ្ធភាពបំពេញឱ្យគ្នាទៅវិញទៅមក ដោយទីម័រឡេស្តេមានសមត្ថភាព និងបទពិសោធន៍ ក្នុងការគ្រប់គ្រងថាមពល ហើយកម្ពុជាមាន ស្បៀង ដែលយើងនឹងអាចផ្លាស់ប្ដូរ បទពិសោធន៍ធ្វើអាជីវកម្មជាមួយគ្នា ហើយកម្ពុជាត្រូវការរៀនសូត្រពីទីម័រឡេស្តេ នូវការគ្រប់គ្រងធនធានប្រេង ដោយកម្ពុជា នៅមិនទាន់បានវិនិយោគ ឬក៏យកផលប្រយោជន៍ ពីធនធានប្រេង ដែលមាននៅក្នុងដែនសមុទ្រ និងដែនដីគោក នៅឡើយទេ ៕
ចែករំលែកព័តមាននេះ