អាស៊ាន ៖ ស្របពេលដែលបណ្តាប្រទេសក្នុងតំបន់អាស៊ីអាគ្នេយ៍កំពុងទើបប្រទះ និងត្រៀមខ្លួនទប់ទល់នឹងការវាយប្រហាររបស់ព្យុះទីហ្វុង Yinxing ស្រាប់តែមានសេចក្តីរាយការណ៍ពីប្រទេសមីយ៉ាន់មកថា កាលពីយប់មិញនេះ មានការរញ្ជួយដីដ៏ខ្លាំងគួរសមផ្ទួនៗចំនួន៣លើក កើតមានឡើងក្នុងតំបន់ភ្នំ ដែលមានចម្ងាយ៤០គីឡូម៉ែត្រ…
អាស៊ាន ៖ ស្របពេលដែលបណ្តាប្រទេសក្នុងតំបន់អាស៊ីអាគ្នេយ៍កំពុងទើបប្រទះ និងត្រៀមខ្លួនទប់ទល់នឹងការវាយប្រហាររបស់ព្យុះទីហ្វុង Yinxing ស្រាប់តែមានសេចក្តីរាយការណ៍ពីប្រទេសមីយ៉ាន់មកថា កាលពីយប់មិញនេះ មានការរញ្ជួយដីដ៏ខ្លាំងគួរសមផ្ទួនៗចំនួន៣លើក កើតមានឡើងក្នុងតំបន់ភ្នំ ដែលមានចម្ងាយ៤០គីឡូម៉ែត្រ ពីទីក្រុងតាជីឡេក ប្រទេសមីយ៉ាន់ម៉ា ដែលមានព្រំដែនជាប់នឹងប្រទេសថៃ ភាគខាងជើង ដោយលើកទី១ នៅម៉ោង១១:៣០យប់ ថ្ងៃទី០៧ វិច្ឆិកា ក្នុងកម្រិត៤.៧រ៉ិច ក្នុងជម្រៅ៧គីឡូម៉ែត្រ និងនៅម៉ោង០១៖០៣នាទី ទៀបភ្លឺ ថ្ងៃ៨ វិច្ឆិកា ក្នុងកម្រិត៣.៥រិចទ័រ ក្នុងជម្រៅប្រហែល១០គីឡូម៉ែត្រ និងលើកទី៣ នៅម៉ោង០២និង៤៤នាទី ក្នុងកម្រិត២.៣ រិចទ័រ ក្នុងជម្រៅ១គ.ម ។
ប្រភពពីការិយាល័យទំនាក់ទំនងសាធារណៈខេត្តឈៀងរ៉ៃ បានប្រកាស នៅថ្ងៃសុក្រនេះថា ក្រៅពីមីយ៉ាន់ម៉ា ការញ្ជួយដីទាំងពីរលើកនេះ បណ្តាលឱ្យការញ័ររញ្ជួយដល់តំបន់ជាច្រើនក្នុងប្រទេសចិន ឡាវ ជាពិសេសខេត្តចំនួន៣ របស់ប្រទេសថៃ គឺខេត្តឈៀងម៉ៃ, ខេត្តឈៀងរ៉ៃ និងខេត្តម៉ែហុងសន ។
ប្រជាពលរដ្ឋថៃ ក្នុងស្រុកប្រមាណ១៣ នៃខេត្តទាំងបីខាងលើបានសំឡេងខ្លាំងដូចមានអ្វីធ្លាក់មកលើ ហើយផ្ទះជាន់ខាងលើ និងបង្អួចផ្ទះរបស់ពួកគេមានការញ័រជាខ្លាំង ប៉ុន្តែគិតត្រឹមព្រឹកម៉ោង១០នេះ ពុំទាន់មានរបាយការណ៍ពីការខូចខាតនៅឡើយទេ ។ តែបើតាមនាយកដ្ឋានឧតុនិយមថៃអះអាងថា ខ្លួនទទួលបានសេចក្តីរាយការណ៍ពីពលរដ្ឋថា មានការញ័រជាង២០ទីតាំង ។
ស្របគ្នានឹងការវាយប្រហារពីគ្រោះរញ្ជួយដី និងធាតុអាកាសចុះត្រជាក់ខ្លាំងនាភាគខាងជើងហើយនោះ នាព្រឹកថ្ងៃ៨ វិច្ឆិកានេះ ពលរដ្ឋថៃក្នុងស្រុកម៉ែសៃ នៃខេត្តឈៀងរ៉ៃ ដែលរងគ្រោះផ្ទួនៗដោយសារជំនន់រហ័ស ដែលហូរចុះពីតំបន់ភ្នំរបស់មីយ៉ាន់ម៉ានោះបានរាយការណ៍ពីការជន់លិចសារជាថ្មីថា ផ្សារសៃឡោមចយ ។
អ្នកស្រុកនាំគ្នាបង្ហោះតាមហ្វេសប៊ុក បង្ហាញពីការជន់លិចនៅតំបន់ផ្សារមួយនេះ ដោយនិយាយផ្លូវជុំវិញផ្សារ ប្រែក្លាយជាទន្លេម្តងទៀតហើយ ។
មហាជនជាច្រើន បានចូលទៅខមមិនដោយខ្លះបានផ្តល់កម្លាំងចិត្តអ្នកស្រុករងគ្រោះ ខណៈខ្លះទៀតសម្តែងក្តីបារម្ភ ហើយអោយយោបល់ថា អ្នកស្រុកគួរតែរើចេញពីតំបន់នោះទៅព្រោះជួបគ្រោះទឹកជំនន់ច្រើនលើក ច្រើនដងពេកហើយ ។ ក្រៅពីភាគខាងជើង នៅថ្ងៃទី០៨ ខែវិច្ឆិកានេះ មជ្ឈមណ្ឌលឧតុនិយមភាគខាងត្បូងថៃ បានចេញសេចក្តីព្រមានដោយអះអាងថា ដោយសារឥទ្ធិលនៃព្យុះទីហ្វុង Yinxing និងខ្យល់មូសុងឦសានខេត្តចំនួន៨ នៃភាគខាងត្បូងឈូងសមុទ្រថៃ នឹងប្រឈមដោយហានិយភ័យនៃខ្យល់បក់បោកខ្លាំង និងភ្លៀងធ្លាក់ខ្លាំងជោគជាំ ដែលនាំមកនូវទឹកជំនន់ និងការបាក់ដី ចាប់ពីថ្ងៃទី ៨-១១ ខែវិច្ឆិកា ។
តាមរយៈការព្យាករណ៍នេះ មន្ត្រីជំនាញបានអំពាវនាវឱ្យមានការប្រុងប្រយ័ត្នចំពោះគ្រោះមហន្តរាយមួយចំនួនដូចជា ជំនន់ទឹកភ្លៀង ជំនន់រហ័សហូរចុះពីព្រៃ ជំនន់ភក់ និងការបាក់ដីតាមតំបន់ភ្នំ រួមការនេសាទនិងធ្វើនាវាចរណ៍លើផ្ទៃសមុទ្រផងដែរ ។
ងាកទៅកាន់ប្រទេសវៀតណាមឯណោះវិញ នៅព្រឹកព្រលឹមថ្ងៃសុក្រនេះ ព្យុះទីហ្វុង Yinxing បានធ្វើដំណើចូលមកដល់សមុទ្រវៀតណាមខាងកើតហើយ ក្រោយពីវាបានធ្វើដំណើឆ្លងកាត់វាយប្រហារយ៉ាងដំណំលើកោះ Luzon របស់ប្រទេសហ្វីលីពីន ។
VN Express បានដងស្រង់របាយការណ៍ពីមជ្ឈមណ្ឌលជាតិព្យាករណ៍ធនធានជលសាស្ត្របានឲ្យដឹងថា នៅវេលាម៉ោង៤៖០០នាទីទៀបភ្លឺ ចំណុចកណ្តាលរបស់ព្យុះ ស្ថិតនៅលើឈូងសមុទ្រតុងកឹងជាមួយនឹងល្បឿនខ្យល់ខ្លាំងបំផុត១៦៦គីឡូម៉ែត្រក្នុងមួយម៉ោង ហើយបន្តកំពុងរំកិលខ្លួនចូលមកកាន់តែកៀកច្រាំងក្នុងល្បឿន១៥គីឡូម៉ែត្រ ក្នុងមួយម៉ោង ។
ទីភ្នាក់ងារឧតុនិយមវៀតណាមព្យាករណ៍ថា ដោយសារឥទ្ធិពលនៃខ្យល់ព្យុះនេះខេត្ត Quang Ninh និងខេត្តKhanh Hoa នឹងមានខ្យល់បោកបក់ខ្លាំង ភ្លៀងធ្លាក់ជោគជាំ ទឹកជំនន់ និងការរអិលបាក់ដី ខណៈដែលតំបន់សមុទ្រភាគខាងកើតនឹងមានខ្យល់គួចរលកសមុទ្រខ្ពស់ៗរហូតដល់ទៅ៨ម៉ែត្រ ដែលអាចបង្ករគ្រោះថ្នាក់ដល់នាវាធុនធំ ។
ដូចនេះ ដើម្បីត្រៀមទប់ទល់នឹងព្យុះព្យុះទីហ្វុង Yinxing កាលពីយប់មិញនេះ រដ្ឋមន្ត្រីក្រសួងធនធានធម្មជាតិ និងបរិស្ថានវៀតណាម បានចុះហត្ថលេខាលើការលិខិតផ្លូវការដោយស្នើឱ្យគណៈកម្មាធិការប្រជាជននៃខេត្ត Quang Ninh និង ខេត្តKhanh Hoa ត្រួតពិនិត្យការវិវឌ្ឍន៍របស់ព្យុះ គ្រប់គ្រងយ៉ាងតឹងរ៉ឹងកប៉ាល់ដែលចេញចូលសមុទ្រ ត្រៀមជម្លៀសប្រជាជនចេញពីតំបន់គ្រោះថ្នាក់ និងដាក់ចេញវិធានការធានាសុវត្ថិភាពអាយុជីវិត និងទ្រព្យសម្បត្តិរបស់ប្រជាពលរដ្ឋ ។
គួរកត់សម្គាល់ថា ចាប់តាំងពីដើមឆ្នាំ២០២៤មក មានព្យុះចំនួន ៦ បានវាយប្រហារសមុទ្រខាងកើតវៀតណាម ។ ថ្មីៗបំផុត គឺព្យុះទីហ្វុងត្រាមី បានវាយលុក ខេត្ត Thua Thien Hue និងទីក្រុង Da Nang កាលពីថ្ងៃទី២៧ខែតុលា បង្កឲ្យមានភ្លៀងធ្លាក់ខ្លាំងនៅតំបន់ភាគកណ្តាលភាគកណ្តាល សម្លា.ប់មនុស្ស ៨ នាក់ របួស១៤នាក់ ខូចខាតផ្ទះជាង៣០០ខ្នង បំផ្លាញដំណាំជាង១២០០ហិកតា និងសម្លា.ប់សត្វពាហនៈចំនួន ១៥០០ក្បាល ៕
ចែករំលែកព័តមាននេះ