ទីក្រុងម៉ានីឡា៖ ខ្យល់ព្យុះឈ្មោះយីនស៊ីង (Yinxing) កំពុងបោកបក់យ៉ាងពេញបន្ទុកទៅលើប្រទេសហ្វ៊ីលីពីនខាងជើង និងបានគាស់រំលើងដើមឈើទាំងឫសឱ្យដួលរលំពេញផ្លូវ។ ដំបូលផ្ទះដែលប្រក់ដែកស័ង្កសី ឬក្បឿងល្មមៗត្រូវខ្យល់កួចបំប៉ើងខ្ទេចខ្ទីអស់។ គិតទៅ ហ្វ៊ីលីពីនរងគ្រោះខ្លាំងគួរសមដែរនៅក្នុងឆ្នាំនេះ។ ពោលគឺខ្យល់ព្យុះនេះកើតឡើងត្រឹមតែពីរបីអាទិត្យប៉ុណ្ណោះបន្ទាប់ពីខ្យល់ព្យុះមុននោះសម្លាប់មនុស្ស១៥០នាក់។
ដើម្បីដោះស្រាយបញ្ហានៅចំពោះមុខ អាជ្ញាធរប្រញាប់ជម្លៀសមនុស្ស២១០០០នាក់ចេញពីភូមិចំនួន២០០កន្លែងនៅខេត្តខាហ្កាយ៉ាន (Cagayan)មុនការមកដល់នៃខ្យល់ព្យុះ។ នេះបើយោងតាមការបង្ហើបឱ្យដឹងពីមន្ត្រីទទួលបន្ទុកខាងគ្រប់គ្រងគ្រោះមហន្តរាយប្រចាំខេត្តនេះ។ អានុភាពនៃខ្យល់ព្យុះធ្វើឱ្យសំរាម ឬរបស់របរផ្សេងៗហោះហើរអណ្ដែតត្រសែតពេញអាកាស។
នៅទីក្រុងកុនសាកានេះ (Gonzaga) ហាងលក់ហេមបឺហ្គឺត្រូវខ្យល់បក់ខ្ទេចខ្ទីអស់។ សូម្បីតែនៅផ្សារទំនើបមួយកន្លែងក៏ត្រូវខ្យល់បំប៉ើងទ្វារខ្ទេចខ្ទីអស់។ យីនស៊ីងជាខ្យល់ព្យុះទីបីដែលវាយប្រហារប្រទេសហ្វ៊ីលីពីននៅក្នុងរយៈពេលមិនដល់មួយខែនៅឡើយទេបន្ទាប់ពីខ្យល់ព្យុះត្រាមី និងកង្រីសម្លាប់មនុស្ស១៥៨នាក់។ នេះបើយោងតាមការិយាល័យជាតិគ្រប់គ្រងគ្រោះមហន្តរាយ។ អ្នកដែលស្លាប់ច្រើនជាងគេគឺស្លាប់ដោយសារខ្យល់ព្យុះត្រាមី។
ជាមួយនឹងល្បឿនបោកបក់១៧៥គីឡូម៉ែត្រក្នុង១ម៉ោងគិតជាមធ្យម និងពេលខ្លះបង្កើនល្បឿនដល់២៤០គីឡូម៉ែត្រក្នុង១ម៉ោង ខ្យល់ព្យុះយីនស៊ីងវាយប្រហារតំបន់មាត់សមុទ្រសាន់តា អាណា (Santa Ana) និងតំបន់ក្បែរៗនោះយ៉ាងដំណំ។ ភ្លៀងក៏ចាប់ផ្ដើមធ្លាក់មកខ្លាំងៗដូចគេហែកមេឃ ខណៈដែលផ្ទះរបស់អ្នកស្រុកត្រូវខូចខាតយ៉ាងធ្ងន់ធ្ងរត្រឹមតែ១ប៉ប្រិចភ្នែក។
អាជ្ញាធរប្រាប់ថាខ្យល់ព្យុះបានគាស់រំលើងដើមឈើទាំងឫសអស់ជាច្រើនដើម។ ឥឡូវនេះសមត្ថកិច្ចកំពុងផ្ទៀងផ្ទាត់ព័ត៌មានដែលថាប៉ុស្តិ៍នគរបាលនៅទីក្រុងសាន់តា អាណាបានរងការខូចខាត។ ទោះជាយ៉ាងណាក្ដី គេមិនទាន់ទទួលដំណឹងថាមានអ្នកស្លាប់នៅឡើយទេ។ អាជ្ញាធរគ្រប់គ្រងគ្រោះមហន្តរាយប្រចាំខេត្តខាហ្កាយ៉ានកំពុងចាត់វិធានការដោះស្រាយបញ្ហានេះ។
ទីភ្នាក់ងារឧតុនិយមជាតិថ្លែងថាខេត្តខាហ្កាយ៉ានដែលមានមនុស្សរស់នៅសរុប១,៣លាននាក់នោះអាចនឹងរងគ្រោះយ៉ាងដំណំដោយសារកម្លាំងបោកបក់ពេញទំហឹងនៃខ្យល់ព្យុះយីនស៊ីង។ នៅខេត្តអ៊ីឡូខូស ន័រតេ (Ilocos Norte) ក្រុមអ្នកជួយសង្គ្រោះកំពុងត្រៀមខ្លួនជាស្រេចដើម្បីជួយការងាររបស់នគរបាលថ្នាក់មូលដ្ឋាន, ទីភ្នាក់ងារពន្លត់អគ្គិភ័យ និងកងទ័ព។
គេកំពុងតាមដានដោយយកចិត្តទុកដាក់ក្រែងលោមានករណីបាក់ដី ជំនន់ទឹកភ្លៀង និងការហក់ឡើងខ្ពស់យ៉ាងឆាប់រហ័សនៃទឹកទន្លេ។ ខ្យល់បក់ខ្លាំងៗដល់កម្រិតនេះក៏ធ្វើឱ្យបារម្ភផងដែរថាអាចនឹងមានរលកសមុទ្រខ្ពស់ៗនៅខេត្តអ៊ីលីខូស ន័រតេ និងខាហ្កាយ៉ាន។ អាជ្ញាធរគ្រប់គ្រងគ្រោះមហន្តរាយដែលប្រចាំការនៅខេត្តអាផាយ៉ាវ (Apayao) ប្រាប់ថាគេបានជម្លៀសមនុស្ស៥០០នាក់ទៅកាន់ទីកន្លែងសុវត្ថិភាព៕
ចែករំលែកព័តមាននេះ