រាជធានីភ្នំពេញ ៖ ម៉ូតូម៉ាកហុងដាឌ្រីម សេ១២៥ ចំនួនពីរគ្រឿង បានបើកបុកគ្នាពេញទំហឹងទាំងព្រឹក បណ្ដាលឲ្យអ្នកជិះទាំងសងខាងចំនួន ៣នាក់ រងរបួសធ្ងន់ធ្ងរ ហើយត្រូវបានក្រុមគ្រួសារ…
រាជធានីភ្នំពេញ ៖ ម៉ូតូម៉ាកហុងដាឌ្រីម សេ១២៥ ចំនួនពីរគ្រឿង បានបើកបុកគ្នាពេញទំហឹងទាំងព្រឹក បណ្ដាលឲ្យអ្នកជិះទាំងសងខាងចំនួន ៣នាក់ រងរបួសធ្ងន់ធ្ងរ ហើយត្រូវបានក្រុមគ្រួសារ បញ្ជូនទៅសង្គ្រោះបន្ទាន់ នៅមន្ទីរពេទ្យជាតិតេជោសន្តិភាព ចំណែកឯម៉ូតូទាំង២គ្រឿងនោះ ក៏បានរងការខូចខាតដូចគ្នាផងដែរ ។
ឧប្បត្តិហេតុការខាងលើនោះបានកើតឡើងនាវេលាម៉ោង៧និង២៥នាទីព្រឹកថ្ងៃទី០៤ ខែវិច្ឆិកា ឆ្នាំ២០២៤នេះ នៅតាមផ្លូវបេតុងអមផ្លូវរថភ្លើងខ្សែរាជធានីភ្នំពេញ-ខេត្តព្រះសីហនុ ត្រង់ចំណុចមុខរោងចក្រទឹកកក ស្ថិតនៅក្នុងភូមិស្រែក្នុង សង្កាត់កន្ទោក ខណ្ឌកំបូល រាជធានីភ្នំពេញ ។
បុរសអ្នកលក់នំប៉័ងម្នាក់ បានប្រាប់ថា នៅមុនពេលកើតហេតុ ខណៈពេលគាត់កំពុងជិះម៉ូតូដើរលក់នំប៉័ង បានឃើញម៉ូតូម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ 1JI-3990 ជិះដោយស្ត្រី ២នាក់ ធ្វើដំណើរចេញពីក្នុងរោងចក្រទឹកកក ក្នុងទិសដៅពីលិចទៅកើត ឡើងសំដៅទៅផ្លូវបេតុងខាងលើ ។ លុះពេលឡើងទៅដល់លើផ្លូវបេតុងនោះ ក៏ស្រាប់តែមានម៉ូតូម៉ាកហុងដាឌ្រីម សេ១២៥ ពណ៍ខ្មៅ មួយគ្រឿងទៀត ពាក់ស្លាកលេខភ្នំពេញ 1AL-3143 ជិះដោយយុវជនម្នាក់ ក្នុងទិសដៅពីជើងទៅត្បូងតាមផ្លូវបេតុងនោះ ទៅដល់បុកចំទទឹងម៉ូតូស្ត្រី២នាក់នោះ ពេញទំហឹង បណ្ដាលឲ្យរងរបួសធ្ងន់ទាំងសងខាង ចំនួន៣នាក់ តែម្ដង ។
ក្រោយពេលកើតហេតុ ជនរងគ្រោះទាំងអស់ ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យជាតិតេជោសន្តិភាពរៀងខ្លួន បន្ទាប់មក នគរបាលខណ្ឌកំបូល បានចុះទៅធ្វើការវាស់វែង ហើយនាំយកម៉ូតូទាំង២គ្រឿង ទៅរក្សាទុកនៅអធិការដ្ឋាននគរបាលខណ្ឌ រង់ចាំការដោះស្រាយនៅពេលក្រោយ ៕
ចែករំលែកព័តមាននេះ