រាជធានីភ្នំពេញ ៖ ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបូរាណដណ្ដើម “ពានរង្វាន់សម្ដេចបវរធិបតី” មានប្រតិភូកីឡា គ្រូបង្វឹក និងអត្តពលិកមកពីតាមបណ្ដារាជធានី-ខេត្ត ចូលរួមប្រមាណ ៧២២នាក់ និងមានរយៈពេល៣ថ្ងៃ…
រាជធានីភ្នំពេញ ៖ ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបូរាណដណ្ដើម “ពានរង្វាន់សម្ដេចបវរធិបតី” មានប្រតិភូកីឡា គ្រូបង្វឹក និងអត្តពលិកមកពីតាមបណ្ដារាជធានី-ខេត្ត ចូលរួមប្រមាណ ៧២២នាក់ និងមានរយៈពេល៣ថ្ងៃ គិតចាប់ពីថ្ងៃទី១៨ដល់ថ្ងៃទី២០ ខែតុលា នេះបើតាមការឱ្យដឹងពីលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានគណៈកម្មការរៀបចំការប្រកួតកីឡាយុទ្ធគុនចម្រុំខ្មែរបូរាណ ពានរង្វាន់សម្ដេចបវរធិបតី ដែលបានមានប្រសាសន៍លើកឡើងនៅក្នុងឱកាសធ្វើពិធីបើកការប្រកួតកាលពីព្រឹកថ្ងៃទី១៨ ខែតុលា នៅក្នុងវិមានពហុកីឡដ្ឋានជាតិ ។
មុនពេលដំណើរការឱ្យមានព្រឹត្តិការណ៍ នៃការប្រកួតកីឡាយុទ្ធគុនចម្រុះខ្មែរបូរាណ ពានរង្វាន់សម្ដេចបវរធិបតីនេះផងដែរ សហព័ន្ធកីឡាយុទ្ធគុនចម្រុះកម្ពុជា ត្រៀមខ្លួនបានយ៉ាងល្អ ដើម្បីឱ្យដំណើរការ នៃការប្រកួតបានលូន ប្រកបដោយវិជ្ជាជិវៈ គឺបានបើកវគ្គបណ្ដុះបណ្ដាលគ្រូបង្វឹក អាជ្ញាកណ្ដាល ចៅក្រម ស្ដីពីបទបញ្ជាបច្ចេកទេស និងបទបញ្ជាការប្រកួតចំនួន ២វគ្គ ។
ជាងនេះទៅទៀត បានទទួលភាពកក់ក្ដៅ ក្នុងការរៀបចំសម្រាប់ការស្នាក់នៅ ហូបចុក និងដឹកជញ្ជូនកីឡាករ កីឡាការិនី គ្រូបង្វឹក និងទ័ពមកពីតាមបណ្ដាខេត្តនានា ព្រមទាំងក្រុមព្រឹទ្ធាចារ្យយុទ្ធគគុន ព្រមទាំងដំណើរការបង្ហាញមុខចុងក្រោយចុង និងថ្លឹងចាប់គូតាមការគ្រោងទុក នៅថ្ងៃទី១៦ ខែតុលា កន្លងមកនេះ ទទួលបានការចុះសួរសុខទុក និងការលើកទឹកចិត្តជាថវិការ ចំនួន១០ម៉ឺនរៀល ក្នុងម្នាក់ៗ ទាំងកីឡាករ កីឡាការិនី គ្រូបង្វឹក ព្រឹទ្ធាចារ្យ ពេទ្យ មន្ត្រីបច្ចេកទេស ប្រកបដោយភាពភ្ញាក់ផ្អើលរបស់សម្ដេចបវរធិបតីនាយករដ្ឋមន្ត្រី ពិសេសទទួលបានដំបូន្មានល្អៗ និងលើកទឹកចិត្តសម្រាប់អ្នកចូលរួមទាំងអស់គ្នា ។
ក្នុងនាមគណៈកម្មការរៀបចំការប្រកួតសូមថ្លែងអំណរគុណយ៉ាងជ្រាលជ្រៅបំផុត ចំពោះគំនិតផ្ដួចផ្ដើមដ៏ខ្ពង់ខ្ពស់ និងការរៀបចំពានរង្វាន់ដ៏ថ្លៃថ្លាបំផុត សម្រាប់ការប្រកួតដ៏មានអត្ថន័យជ្រាលជ្រៅ ក្នុងចក្ខុវិស័យវែងឆ្ងាយ របស់សម្ដេចបវរធិបតី នាយករដ្ឋមន្ត្រី ក្នងការជម្រុញការអភិរក្ស ដើម្បីអភិវឌ្ឍយុទ្ធគុនដូនតាខ្មែរ ។
ឯកឧត្តមបណ្ដិត ថោង ខុន ទេសរដ្ឋមន្ត្រី បានមានប្រសាសន៍ឱ្យដឹងថា ការប្រកួតកីឡាយុទ្ធគុនចម្រុះខ្មែរបូរាណពានរង្វាន់សម្ដេចបវរធិបតីនេះ ជាព្រឹត្តិការណ៍កីឡា-វប្បធម៌-ទេសចរណ៍ ដ៏មានសារៈសំខាន់ និងមានគុណតម្លៃថ្លៃថ្លាបំផុត ក្នុងការរួមចំណែកគាស់រំលេចឡើងវិញ នូវយុទ្ធគុនបូរាណ ក្បួនយុទ្ធគុន យុទ្ធសិល្ប៍ យុទ្ធោបករណ៍បូរាណ និងយុទ្ធសាស្ត្រសង្គ្រាមរបស់មហាវិរក្សត្រ និងបុព្វបុសដូនតាខ្មែរ គ្រប់ជំនាន់ បានប្រើប្រាស់ជាមូលដ្ឋានក្នុងការបង្កើតបានអាណាចក្រខ្មែរ ដ៏រឹងមាំនាសម័យបូរាណ ព្រមជាមួយនេះ ក៏ដើម្បីសិក្សាស្រាវជ្រាវប្រវត្តិយុទ្ធគុន ស្វែងរកប្រភពឯកសារបូរាណ និងទស្សនវិជ្ជាយុទ្ធគុនដូនតាខ្មែរ ដែលនៅសេសសល់ ហើយកំពុងកប់បាត់នៅក្នុងសហគមន៍ ដើម្បីយកមករៀបចំជាឯកសារទាំង ឯកសារសំណេរនិងឯកសារឌីជីថលរបស់ជាតិ សម្រាប់បន្សល់ទុកឱ្យក្មេងជំនាន់ក្រោយប្រើប្រាស់ជាមូលដ្ឋាន ។
នៅក្នុងពិធីបើកនេះផងដែរបានការអញ្ជើញជាគណៈអធិបតីពីឯកឧត្តមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មការចំពោះកិច្ច តំណាងដ៏ខ្ពង់ខ្ពស់សម្ដេចធិបតីហ៊ុន ម៉ាណែត និងដល់ថ្ងៃធ្វើពិធីបិទការប្រកួតនៅល្ងាចថ្ងៃទី២០ ខែតុលា ទើបមានវត្តមានដ៏ខ្ពង់ខ្ពស់របស់សម្ដេចធិបតីនាយករដ្ឋមន្ត្រី នឹងអញ្ជើញបំពាក់មេដាយជូនជ័យលាភីដោយផ្ទាល់ និងផ្ដល់ជាអនុសាស្ត្របិទការប្រកួត ៕
ចែករំលែកព័តមាននេះ