រាជធានីភ្នំពេញ៖ សហជីពធំៗ ដែលជាអ្នកតំណាងកម្មករនិយោជិតនៅកម្ពុជា បានប្រកាសគាំទ្រយ៉ាងពេញទំហឹង ចំពោះការសម្រេចចិត្តដ៏ឈ្លាសវៃ របស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី…
រាជធានីភ្នំពេញ៖ សហជីពធំៗ ដែលជាអ្នកតំណាងកម្មករនិយោជិតនៅកម្ពុជា បានប្រកាសគាំទ្រយ៉ាងពេញទំហឹង ចំពោះការសម្រេចចិត្តដ៏ឈ្លាសវៃ របស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដកខ្លួនចេញពីគម្រោង អភិវឌ្ឍតំបន់ត្រីកោណ កម្ពុជា-ឡាវ-វៀតណាម (CLV) ។
លោក ហ្វា សាលី ប្រធានសម្ព័ន្ធសហជីពជាតិ បានចូលរួមអបអរសាទរចំពោះការសម្រេចចិត្តដ៏ត្រឹមត្រូវរបស់ប្រមុខ រាជរដ្ឋាភិបាល ដោយសារកន្លងមកក្រុមជ្រុលនិយមមួយចំនួន បានយកករណី CLV ធ្វើជាលេស ក្នុងការប៉ុនប៉ង ផ្ដួលរំលំ រាជរដ្ឋាភិបាល និងមានបំណងបង្កចលាចលនៅក្នុងសង្គម ។
លោកបន្តថា ក្រុមជ្រុលនិយមទាំងនោះ ថែមទាំងបានញុះញង់ឱ្យពលរដ្ឋ និងពលករនៅក្រៅប្រទេសប្រឆាំង នឹងរាជរដ្ឋាភិបាលតាមរយៈការប្រើប្រាស់ហេតុផល CLV ប៉ុន្ដែពេលនេះពួកគេបានខកចិត្តវិញ ដោយសារការសម្រេច ចិត្តដ៏ឈ្លាសវៃរបស់ថ្នាក់ដឹកនាំរាជរដ្ឋាភិបាល ។
មេសហជីពរូបនេះបញ្ជាក់ថា៖ «ក្នុងនាមខ្ញុំជាថ្នាក់ដឹកនាំសហជីព ខ្ញុំក៏ដូចជាកម្មករនិយោជិតដែរ គឺសូមប្រកាសគាំទ្រ ចំពោះការសម្រេចចិត្តរបស់សម្ដេច អគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ព្រោះកម្ពុជាមិនបានខាតបង់អ្វីនោះទេ ។ ម្យ៉ាងទៀត យើងនៅតែបន្តកសាងហេដ្ឋារចនាព្រំដែន របស់យើងដដែល» ។
លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា កន្លងទៅនេះក្រុមជ្រុលនិយម បានចាប់យកចំណុចនេះ ធ្វើជាអាវុធនយោបាយ ដើម្បីមួលបង្កាច់ និងវាយប្រហារចំពោះរាជរដ្ឋាភិបាល ដោយការភូតកុហកឥតឈប់ឈរ ធ្វើឱ្យប្រជាជនមួយចំនួនមានការភាន់ច្រឡំ ។
លើសពីនេះលោកថា ពួកគេបានធ្វើការចោទប្រាជរដ្ឋាភិបាលថា បានកាត់ទឹកដីនៃខេត្តទាំង ៤ នៃភាគឦសាន ឱ្យទៅបរទេសហើយចុងក្រោយនេះ ក៏បានប្រើរឿងនេះដើម្បីញុះញង់ និងបំផុសបំផុលប្រជាជន ឱ្យចូលរួមអនុវត្តនូវផែនការ ១៨ សីហា ក្នុងការប៉ុនប៉ងអុកឡុកបង្កអស្ថិរភាពដល់សង្គមជាតិ ។
លោកនិយាយថា៖ «ក្នុងនាមខ្ញុំជាមេដឹកនាំសហជីព សូមគាំទ្រទាំងស្រុងនូវការសម្រេចចិត្តដ៏ត្រឹមត្រូវនេះ ព្រោះការសម្រេចចិត្តរបស់ថ្នាក់ដឹកនាំ ពិតជាបានពិចារណាយ៉ាងច្បាស់លាស់ និងប្រកាន់ជំហរសាមគ្គីភាព បូរណភាពទឹកដីរបស់យើង» ។
សម្តេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា និងសម្តេចធិបតីនាយករដ្ឋមន្ត្រី ព្រមទាំងថ្នាក់ដឹកនាំផ្សេងៗទៀត នៅយប់ថ្ងៃទី២០ ខែកញ្ញា ឆ្នាំ២០២៤ នេះ បានប្រកាសពីការសម្រេចរបស់កម្ពុជា ក្នុងការបញ្ចប់ការចូលរួម ក្នុងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ចាប់ពីថ្ងៃ២០ ខែកញ្ញា ឆ្នាំ២០២៤នេះតទៅ។ការបញ្ចប់នេះសម្តេចតេជោ ហ៊ុន សែន បានសង្កត់ធ្ងន់ថា ដើម្បី «ដកអាវុធចេញពីដៃពួកជ្រុលនិយម» កុំឲ្យមានលទ្ធភាពញុះញង់បោកប្រាស់ប្រជាជនកម្ពុជាតទៅទៀត ៕ អត្ថបទសហការ
ចែករំលែកព័តមាននេះ