ទីក្រុងបេរូត៖ នៅទីបំផុត ក្រុមហេសបូឡា និងអ៊ីស្រាអែលចាប់ផ្ដើមវាយប្រហារគ្នាជាទម្រង់សង្គ្រាមពេញលេញជាបណ្ដើរៗហើយ។ លើកនេះពួកគេមិនមែនបាញ់គ្នារប៉េះរប៉ោះដូចលើកមុនទៀតទេ។ អនុប្រធានក្រុមហេសបូឡាថ្លែងថាក្រុមរបស់គាត់បើកឆាកប្រយុទ្ធទ្រង់ទ្រាយធំ ហើយនឹងធ្វើឱ្យប្រជាជននៅអ៊ីស្រាអែលខាងជើងត្រូវតែផ្លាស់ប្ដូរទីលំនៅជាចាំបាច់។
លោកណែម កាសឹម (Naim Kassem) ថ្លែងថាក្រុមរបស់លោកទទួលរងគ្រោះ យើងចេះឈឺ ដូច្នេះ បើយើងឈឺ អ៊ីស្រាអែលក៏ឈឺដូចគ្នា។ លោកថ្លែងដូច្នេះនៅពេលចូលរួមពិធីបុណ្យសពមេបញ្ជាការកំពូលរបស់ក្រុមហេសបូឡា លោកអ៊ីប្រាហ៊ីម អាឃីល (Ibrahim Akil)។ គាត់និយាយទៅអ៊ីស្រាអែលថាសេដ្ឋកិច្ចរបស់អ្នកនឹងដួលរលំ។ អ្នកមិនអាចសម្រេចគោលដៅរបស់ខ្លួនបានឡើយ។
លោកកាសឹមថ្លែងបន្តទៀតថាក្រុមហេសបូឡាដែលស្លាប់មេទ័ពកំពូលៗរបស់ខ្លួនជាបន្តបន្ទាប់នារយៈពេលប៉ុន្មានខែនេះកាន់តែមានកម្លាំងខ្លាំងជាងមុន។ លទ្ធផលនៃការប្រយុទ្ធគ្នានៅក្នុងសមរភូមិអាចបញ្ជាក់ត្រង់ចំណុចនេះ។ លោកកាសឹមសូមផ្ដាំថារ៉ុកកែត១០០គ្រាប់ដែលហេសបូឡាផ្លោងចូលទឹកដីអ៊ីស្រាអែលកាលពីព្រឹកមិញគ្រាន់តែជាការចាប់ផ្ដើមតែប៉ុណ្ណោះ។ នឹងមានវគ្គបន្តទៀត។
ការបាញ់ប្រហាររបស់ហេសបូឡាលើកនេះពិតជាមិនធម្មតាទេ។ រ៉ុកកែតខ្លះបាញ់ចូលជ្រៅទៅក្នុងទឹកដីអ៊ីស្រាអែលដូចជាទីក្រុងហៃហ្វា (Haifa)ជាដើម។ អ៊ីស្រាអែលក៏វាយប្រហាររាប់រយដងចូលទឹកដីលីបង់ផងដែរ។ លើកនេះភាគីទាំង២លែងបាញ់គ្នាត្រឹមតែបន្តិចបន្តួចតាមព្រំដែនដែលគេហៅថា «ការប៉ះទង្គិចគ្នា» តទៅទៀតហើយ។ សង្គ្រាមនេះអាចនឹងផ្ទុះឡើងពេញទំហឹង។
ការបាញ់ស្រោចគ្រាប់រ៉ុកកែតរបស់ហេសបូឡាចូលទៅក្នុងទឹកដីអ៊ីស្រាអែលកាលពីយប់ថ្ងៃសៅរ៍ឆ្លងចូលថ្ងៃអាទិត្យនោះជាការសងសឹកទៅលើ២ចំណុច។ ទី១-សងសឹកអ៊ីស្រាអែលដែលទម្លាក់គ្រាប់បែកទៅលើមូលដ្ឋានរបស់ហេសបូឡានៅលីបង់ស្លាប់យុទ្ធជនរបស់ពួកគេរាប់សិបនាក់រួមទាំងមេទាហានជើងចាស់របស់ក្រុមនេះផងដែរ។ ទី២-សងសឹកករណីដែលអ៊ីស្រាអែលលួចបង្កប់គ្រឿងផ្ទុះនៅក្នុងឧបករណ៍ផ្ញើសារ និងវិទ្យុទាក់ទងស្លាប់៣៧នាក់ និងរបួស៣ពាន់នាក់។
គេស្ដាប់ឮសំឡេងស៊ីរ៉ែនស្រែកប្រកាសអាសន្នពាសពេញប្រទេសអ៊ីស្រាអែលខាងជើង។ ជនជាតិអ៊ីស្រាអែលរាប់សែននាក់រត់ចូលទីកន្លែងលាក់ខ្លួន។ រ៉ុកកែត១គ្រាប់ធ្លាក់ចំផ្ទះរបស់អ្នកស្រុកនៅទីក្រុងមួយក្បែរហៃហ្វា ធ្វើឱ្យរបួស៣នាក់ និងឆេះអគារ និងឡានជាច្រើនគ្រឿង។ ទីភ្នាក់ងារជួយសង្គ្រោះអ៊ីស្រាអែលប្រាប់ថាមនុស្ស៤នាក់រងរបួសដោយសារអំបែងគ្រាប់រ៉ុកកែត។
នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ថ្លែងថាលោកនឹងធ្វើអ្វីៗគ្រប់យ៉ាងដើម្បីស្ដារសន្តិសុខជាតិនៅភាគខាងជើង និងអនុញ្ញាតឱ្យប្រជាជនវិលទៅលំនៅដ្ឋានរបស់ខ្លួនវិញ។ រយៈពេល២៤ម៉ោងចុងក្រោយនេះ អ៊ីស្រាអែលវាយប្រហារប្រទេសលីបង់ខាងត្បូងត្រូវចំទីតាំងយោធា៤០០កន្លែងរួមទាំងទីតាំងស្តុកទុកគ្រាប់រ៉ុកកែតផងដែរ៕
ចែករំលែកព័តមាននេះ