រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជា អស់ឱកាសឡើងទៅកាន់ជុំទី៣ ការប្រកួតជម្រុះពានរង្វាន់ជើងឯកទ្វីបអាស៊ី AFC Asian Cup Saudi Arabia…
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជា អស់ឱកាសឡើងទៅកាន់ជុំទី៣ ការប្រកួតជម្រុះពានរង្វាន់ជើងឯកទ្វីបអាស៊ី AFC Asian Cup Saudi Arabia ឆ្នាំ ២០២៧ បន្ទាប់ពីចាញ់ក្រុមភ្ញៀវស្រីលង្កា នៅក្នុងការប្រកួតជម្រុះជុំទី២ ជើងទី២ Play-Off ដោយការទាត់បាល់១១ម៉ែត្រកាត់សេចក្តី កាលពីយប់ថ្ងៃទី១០ ខែកញ្ញា ឆ្នាំ២០២៤។
ការប្រកួតជើងទី១ កាលពីថ្ងៃទី៥ ខែកញ្ញា នៅឯកីឡដ្ឋាន Racecourse International ស្ថិតក្នុងទីក្រុងកូឡុំបូ ប្រទេសស្រីលង្កា ក្រុមទាំងពីរបានបញ្ចប់ទៅដោយលទ្ធផលស្មើគ្នា គ្មានគ្រាប់ស៊ុតបញ្ចូលទី។ លុះការប្រកួតជើងទី២ នៅពហុកីឡដ្ឋានជាតិអូឡាំពិក រាជធានីភ្នំពេញ កាលពីថ្ងៃទី១០ ខែកញ្ញា ក្រោយបញ្ចប់ការប្រកួតរយៈពេល៩០នាទីពេញ និងម៉ោង១៥នាទី២ដង ម្ចាស់ផ្ទះកម្ពុជាបានត្រឹមស្មើជាមួយនឹងស្រីលង្កាដោយលទ្ធផល ២ទល់នឹង២។ ដូច្នេះការប្រកួតឈានដល់ការទាត់បាល់១១ម៉ែត្រកាត់សេចក្តី ដែលជាលទ្ធផលបញ្ចប់ទៅ ក្រុមភ្ញៀវស្រីលង្កាយកឈ្នះកម្ពុជា ដោយលទ្ធផល ៤ទល់នឹង២។
គួរឱ្យដឹងផងដែរថា ការប្រកួតជម្រុះជុំទី២ Play-Off ដែលធ្វើឡើង២ជើង សរុបមាន៦ក្រុម ដោយនៅក្នុងនោះ កម្ពុជាប៉ះស្រីលង្កា ទីម័រខាងកើតប៉ះម៉ុងហ្គោលី និងព្រុយណេប៉ះម៉ាកាវ ដោយលេងនៅក្នុងថ្ងៃដំណាលគ្នា ដើម្បីរក៣ក្រុមឈ្នះឡើងបន្តទៅការប្រកួតជុំទី៣ ដែលជាការប្រកួតវគ្គសន្សំពិន្ទុក្នុងពូល។
លទ្ធផលសរុបទាំងពីរជើង នៃការប្រកួតជម្រុះជុំទី២ Play-Off
-ស្រីលង្កា ២-២ (៤-២) កម្ពុជា
-ទីម័រខាងកើត ៤-៣ ម៉ុងហ្គោលី (៤-១ ជើងទី១)
-ព្រុយណេ ៤-០ ម៉ាកាវ (៣-០ ជើងទី១)
ដូច្នេះស្រីលង្កា ទីម័រខាងកើត និងព្រុយណេ បានបន្តឡើងទៅកាន់ការប្រកួតជម្រុះជុំទី៣ ដែលជាការប្រកួតសន្សំពិន្ទុនៅក្នុងពូល ដែលមានសរុប២៤ក្រុម ដើម្បីចម្រាញ់យកតែ៦ក្រុមប៉ុណ្ណោះ បន្តឡើងទៅបង្គ្រប់២៤ក្រុម សម្រាប់ការប្រកួតជុំផ្តាច់ព្រ័ត្រពានរង្វាន់ AFC Asian Cup ឆ្នាំ ២០២៧ ដែលប្រទេសអារ៉ាប៊ីសាអូឌីតធ្វើជាម្ចាស់ផ្ទះ៕ (រូបភាព ៖ សហព័ន្ធកីឡាបាល់ទាត់កម្ពុជា)
ចែករំលែកព័តមាននេះ