រាជធានីភ្នំពេញ ៖ ថ្ងៃទី ៤ ខែកញ្ញា ឆ្នាំ ២០២៤ ផ្សារមូលបត្រកម្ពុជា និងធនាគារ អេស៊ីលីដា ភីអិលស៊ី «ធនាគារ អេស៊ីលីដា» ជាធនាគារពាណិជ្ជទីមួយ ដែលបានបោះផ្សាយលក់មូលបត្រកម្មសិទ្ធិជាសាធារណៈនៅកម្ពុជា បានប្រកាសនៅថ្ងៃនេះថា ដោយមានការផ្តួចផ្តើមរបស់ផ្សារមូលបត្រកម្ពុជា និងធនាគារ អេស៊ីលីដា បានសហការរៀបចំកម្មវិធី «វេទិកាក្រុមហ៊ុនចុះបញ្ជី» ។ វេទិកានេះបានប្រារព្ធឡើងនៅទីតាំងធនាគារ អេស៊ីលីដា ការិយាល័យកណ្តាល ក្រោមប្រធានបទស្តីពី វឌ្ឍនភាពរបស់ ធនាគារ អេស៊ីលីដា ដោយមានការអញ្ជើញចូលរួមផ្ទាល់ ពីសាធារណជន និងវិនិយោគិនជាតិ និងអន្តរជាតិ ។ គោលបំណងនៃការរៀបចំវេទិកានាថ្ងៃនេះ គឺដើម្បីផ្សព្វផ្សាយអំពីសក្តានុពលរបស់ធនាគារ អេស៊ីលីដា ដើម្បីឱ្យវិនិយោគិន បានស្វែងយល់ពីកាលានុវត្តភាពរបស់ធនាគារ នាពេលបច្ចុប្បន្ន និងអនាគត ព្រមទាំងផ្តល់ឱកាសដល់វិនិយោគិន បានឃើញដោយផ្ទាល់ពីសកម្មភាព និងវឌ្ឍនភាពនៃប្រតិបត្តិការអាជីវកម្មរបស់ធនាគារផងដែរ ។
បណ្ឌិត អ៉ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា ធនាគារ អេស៊ីលីដា ជាធនាគារពាណិជ្ជខ្មែរឈានមុខ ដែលលោកអ្នកជឿទុកចិត្តបំផុតនៅប្រទេសកម្ពុជា ក្នុងការផ្តល់ និងការបម្រើសេវាកម្មហិរញ្ញវត្ថុ ជូនដល់សាធារណជននៅគ្រប់មជ្ឈដ្ឋានក្នុងសហគមន៍ ។ ធនាគារ អេស៊ីលីដា ជាធនាគារឌីជីថល ដែលមានបម្រើសេវាកម្មហិរញ្ញវត្ថុយ៉ាងសម្បូរបែប ដូចជា សេវាធនាគារឌីជីថល សេវាឥណទាន សេវាបញ្ញើ-សន្សំ សេវាផ្ទេរប្រាក់ក្នុង និងក្រៅប្រទេស សេវាប័ណ្ណឥណទាន-ឥណពន្ធ សេវាហិរញ្ញប្បទានពាណិជ្ជកម្ម សេវាចាត់ចែងសាច់ប្រាក់ និងសេវាធនាគារជាច្រើនផ្សេងទៀត ។ ធនាគារ អេស៊ីលីដា មានបុគ្គលិកបម្រើការងារជាជនជាតិខ្មែរសរុបចំនួន ១២.០៧០ នាក់ និងមានបណ្តាញប្រតិបត្តិការចំនួន ២៦៤ សាខា នៅទូទាំងប្រទេសកម្ពុជា ។
ធនាគារ អេស៊ីលីដា បានបោះផ្សាយលក់មូលបត្រកម្មសិទ្ធិលើកដំបូង និងចុះបញ្ជីភាគហ៊ុនដោយជោគជ័យនៅផ្សារមូលបត្រកម្ពុជា នៅថ្ងៃទី ២៥ ខែឧសភា ឆ្នាំ ២០២០ ដោយមានការចូលរួមពីវិនិយោគិនសរុបចំនួន ២.៤៩៦ នាក់ ដោយកាន់កា.ប់ភាគហ៊ុនចំនួន ៤.៣៤៤.៨៦៥ភាគហ៊ុន ស្មើនឹង ១,០០៣១% នៃភាគហ៊ុនសរុបរបស់ធនាគារ អេស៊ីលីដា ។
គិតត្រឹមដំណាច់ខែមិថុនា ឆ្នាំ ២០២៤ វិនិយោគិន របស់ធនាគារ អេស៊ីលីដា កើនឡើងចំនួន ១៨.៤៨២ នាក់ ស្មើនឹង ៣៥.៧០% នៃចំនួនវិនិយោគិនសរុបនៅផ្សារមូលបត្រកម្ពុជា ខណៈភាគហ៊ុនដែលកំពុងជួញដូរនៅលើទីផ្សារមូលបត្រកម្ពុជា (Floating shares on CSX) មានចំនួន ៧៦.០៩៨.៣២៩ ភាគហ៊ុន ស្មើនឹង ១៧,៥៦៨១% នៃភាគហ៊ុនសរុបរបស់ធនាគារ អេស៊ីលីដា ចំនួន ៤៣៣.១៦៣.០១៩ ភាគហ៊ុន ។ ទន្ទឹមនឹងនេះ ធនាគារ អេស៊ីលីដា ទំហំជួញដូរនៅទីផ្សារមូលបត្រ (Trading volume) ចំនួន ៧៦.៧៧៣.៤៥១ ភាគហ៊ុន និងមូលធនទីផ្សារ (Market Capitalization) សរុបចំនួន ៣,២៩ ទ្រីលានរៀល ។
នៅក្នុងអំឡុងឆ្នាំ ២០១៩ សកម្មភាពជួញដូរភាគហ៊ុននៅលើទីផ្សារមូលបត្រកម្ពុជាមាន ៖
• វិនិយោគិនសរុបចំនួន ២២.៤៤៧ គណនី ។
• ទំហំជួញដូរ (Trading volume) សរុបចំនួន ១៥.៤៨៩.៩០៥ ភាគហ៊ុន ។
• ភាគហ៊ុនសរុបដែលបានចុះបញ្ជី (Listed shares) មានចំនួន ៣០៥.៣០៤.៤៩៥ ភាគហ៊ុន ។
• មូលធនទីផ្សារ (Market Capitalization) សរុបចំនួន ២,៨១ ទ្រីលានរៀល ។
បន្ទាប់ពីវត្តមានរបស់ធនាគារ អេស៊ីលីដា នៅលើផ្សារមូលបត្រកម្ពុជា រហូតមកដល់ដំណាច់ខែមិថុនា ឆ្នាំ ២០២៤ ផ្សារមូលបត្រកម្ពុជា មានការកើនឡើង ៖
• វិនិយោគិនសរុបចំនួន ៥១.៧៧១ គណនី ។
• ទំហំជួញដូរ (Trading volume) សរុបចំនួន ១៦៨.៨០៧.៨២៩ ភាគហ៊ុន ។
• ភាគហ៊ុនសរុបដែលបានចុះបញ្ជី (Listed shares) មានចំនួន ៣.១២៨.៩១៤.៧៨៤ ភាគហ៊ុន ។
• មូលធនទីផ្សារ (Market Capitalization) សរុបចំនួន ១១,២១ ទ្រីលានរៀល ។
លោកបណ្ឌិត បានមានប្រសាសន៍បន្ថែមទៀតថា ក្នុងនាមជាក្រុមហ៊ុនបោះផ្សាយលក់ មូលបត្រកម្មសិទ្ធិ ធនាគារ អេស៊ីលីដា នៅតែប្តេជ្ញារក្សាស្តង់ដារខ្ពស់បំផុត ក្នុងការប្រតិបត្តិអភិបាលកិច្ចសាជីវកម្ម និងការរក្សាតម្លាភាព ដើម្បីធានាថា ភាគីពាក់ព័ន្ធទាំងអស់នឹងទទួលបានព័ត៌មានធនាគារ និងអត្ថប្រយោជន៍ផ្សេងៗ ដូចៗគ្នាប្រកបដោយប្រសិទ្ធភាព ដូចជា ការជូនដំណឹងអំពី ផែនការយុទ្ធសាស្ត្រ របាយការណ៍ហិរញ្ញវត្ថុ ភាគលាភ និងគំនិតផ្តួចផ្តើមសំខាន់ៗ របស់ធនាគារ។ ការប្រកាន់ខ្ជាប់របស់ធនាគារ ក្នុងការអនុវត្តដ៏ល្អបំផុតចំពោះអភិបាលកិច្ចសាជីវកម្ម បានដើរតួយ៉ាងសំខាន់បំផុត ក្នុងការទាក់ទាញ និងការកសាងទំនុកចិត្តជូន វិនិយោគិន និងភាគហ៊ុនិក ឱ្យចូលរួមចំណែកក្នុងទីផ្សារភាគហ៊ុន និងមានប្រតិបត្តិការជួញដូរយ៉ាងសកម្មជាបន្តបន្ទាប់។ លើសពីនេះទៀត ធនាគារ អេស៊ីលីដា ផ្តោតការយកចិត្តទុកលើនវានុវត្តន៍បច្ចេកវិទ្យាឌីជីថល បានបង្កើនបទពិសោធន៍ និងប្រសិទ្ធភាព ក្នុងការបម្រើសេវាធនាគារជូនអតិថិជន និងសាធារណជន ប្រកបដោយគុណភាព ភាពងាយស្រួល និងសុវត្ថិភាពខ្ពស់ ។
អំពីធនាគារ អេស៊ីលីដា ភីអិលស៊ី
ធនាគារ អេស៊ីលីដា មានសាខាបុត្រសម្ព័ន្ធចំនួន ៤ គឺ សាកលវិទ្យាល័យ ពាណិជ្ជសាស្ត្រ អេស៊ីលីដា ឯ.ក, ក្រុមហ៊ុនមូលបត្រ អេស៊ីលីដា ម.ក, ធនាគារ អេស៊ីលីដា ឡាវ លីមីតធីត និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំងការិយាល័យតំណាងនៅមីយ៉ាន់ម៉ា ។ គិតត្រឹមដំណាច់ត្រីមាសទី ២ ឆ្នាំ២០២៤ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១០,០៨ ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៧,៥៤ ប៊ីលានដុល្លារអាមេរិក និងមានអតិថិជនប្រមាណជាង ៤,៦១ លាននាក់។ ជាមួយគ្នានេះដែរ ធនាគារ អេស៊ីលីដា មានដៃគូអាជីវកម្ម សរុបច្រើងជាង ០,៤១ លានដៃគូ និងមានអ្នកប្រើប្រាស់អេស៊ីលីដាម៉ូបាលសរុបចំនួន ៣,៨ លាននាក់ ៕ អត្ថបទសហការ
ចែករំលែកព័តមាននេះ