រាជធានីភ្នំពេញ ៖ សមាគម WSBIDA ទទួលជ្រាបនូវសំណើថ្មីៗរបស់ក្រុមអ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា ដែលលើកឡើងអំពីការដំឡើងពន្ធលើគ្រឿងស្រវឹង គឺជាមធ្យោបាយសម្រាប់បង្កើនចំណូលរដ្ឋ ។ សមាគមបានយល់អំពីគោលបំណងនៃការកាត់បន្ថយការប្រើប្រាស់គ្រឿងស្រវឹង និងការបង្កើនប្រាក់ចំណូលរបស់រដ្ឋ…
រាជធានីភ្នំពេញ ៖ សមាគម WSBIDA ទទួលជ្រាបនូវសំណើថ្មីៗរបស់ក្រុមអ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា ដែលលើកឡើងអំពីការដំឡើងពន្ធលើគ្រឿងស្រវឹង គឺជាមធ្យោបាយសម្រាប់បង្កើនចំណូលរដ្ឋ ។ សមាគមបានយល់អំពីគោលបំណងនៃការកាត់បន្ថយការប្រើប្រាស់គ្រឿងស្រវឹង និងការបង្កើនប្រាក់ចំណូលរបស់រដ្ឋ ។ បើយោងតាមប្រវត្តិនៃទិន្នន័យ និងតួលេខសកលបានបង្ហាញថា វិធានការនេះអាចនាំទៅរកផលវិបាកដែលយើងមិនចង់បានទៅវិញ ។
ការយល់ដឹងអំពីពន្ធលើគ្រឿងស្រវឹង ៖ តាមការយល់ដឹងរបស់សមាគម រាជរដ្ឋាភិបាលអនុវត្តគោលនយោបាយពន្ធលើគ្រឿងស្រវឹងដោយមានគោលបំណងចម្បងចំនួនបី គឺ ៖
1. ការបង្កើតប្រាក់ចំណូល ៖ បង្កើនលទ្ធភាពព្យាករណ៍ថវិការជាតិ រួមចំណែកដល់ការគ្រប់គ្រងប្រកបដោយប្រសិទ្ធភាព និងបង្កើនប្រសិទ្ធភាពប្រាក់ចំណូល ។
2. ផលប៉ះពាល់ទីផ្សារ ៖ ពង្រឹងការត្រួតពិនិត្យទីផ្សារ ទប់ស្កាត់ការគេចពន្ធ និងពាណិជ្ជកម្មខុសច្បាប់ និងរួមចំណែកដល់ការអភិវឌ្ឍន៍សេដ្ឋកិច្ចជាតិ ។
3. ទំនួលខុសត្រូវសង្គម ៖ ការចំណាយលើសង្គមពីការប្រើប្រាស់គ្រឿងស្រវឹងមិនបានត្រឹមត្រូវ ដែលកើតឡើងដោយសារអ្នកពិសា រដ្ឋាភិបាលបានធ្វើការជំរុញអោយមានការពិសាប្រកបដោយការទទួលខុសត្រូវ ។
គោលបំណងខាងលើនេះមានទំនាក់ទំនងគ្នាយ៉ាងជិតស្និទ្ធ ហើយវិធីនៃការកំណត់យកពន្ធ អាចជះឥទ្ធិពលយ៉ាងខ្លាំងដល់ភាពជោគជ័យ លទ្ធភាពបង្កើនប្រាក់ចំណូល ទីផ្សារ និងទំនួលខុសត្រូវសង្គម ។ ខណៈពេលដែលការផ្តោតជាចម្បងលើវិធីសាស្ត្រគណនាពន្ធដារ មានឥទ្ធិពលលើគោលនយោបាយសារពើពន្ធកាន់តែទូលំទូលាយ ហើយមានសារៈសំខាន់ណាស់ក្នុងការទទួលស្គាល់ថា ការបង់ពន្ធ និងការកំណត់តម្លៃគ្រឿងស្រវឹង គឺជាកត្តាជំរុញដ៏មានប្រសិទ្ធភាពសម្រាប់កាត់បន្ថយការប្រើប្រាស់ និងគ្រោះថ្នាក់ដែលពាក់ព័ន្ធ ហើយទីបំផុតវិធីសាស្ត្រនេះនឹងកែលម្អសុខភាពទូទៅ និងការបង្កើនប្រាក់ចំណូលដើម្បីគាំទ្រដល់កិច្ចខិតខំប្រឹងប្រែងថែទាំសុខភាពនិងការការពារ ។
ផលវិបាកមិនចង់បាន ដែលអាចកើតមាន ៖ ផលប៉ះពាល់អវិជ្ជមានលើប្រាក់ចំណូល ។ ការយកពន្ធគ្រឿងស្រវឹងច្រើនពេកអាចមានឥទ្ធិពលផ្ទុយពីការបង្កើនចំណូលពន្ធរួម ។ ខ្ញុំសូមលើកឧទាហរណ៍ថ្មីៗ ដូចជា ៖
- ចក្រភពអង់គ្លេស ៖ ការដំឡើងពន្ធ ១០,១% លើស្រា ក្នុងខែសីហា ឆ្នាំ ២០២៣ បណ្តាលឱ្យមានការកាត់បន្ថយចំនួន ១០៨ លានផោន ក្នុងការប្រមូលពន្ធគយ រវាងខែសីហា ឆ្នាំ ២០២៣ ដល់ខែឧសភា ឆ្នាំ ២០២៤ បើធៀបនឹងឆ្នាំមុន ។ វិធានការនេះ ក៏បានធ្វើអោយដំណើរការកាត់បន្ថយអតិផរណាមានភាពយឺតយ៉ាវ តែកើនឡើងសម្ពាធសេដ្ឋកិច្ចលើវិស័យបដិ-សណ្ឋារកិច្ច ដែលការលក់គ្រឿងស្រវឹងបានចូលរួមជាចំណែកមួយសំខាន់ក្នុងវិស័យនេះ ។
- ប្រទេសអូស្ត្រាលី ៖ ការបង្កើនពន្ធលើស្រានៅឆ្នាំ ២០២៣ បាននាំឱ្យប្រាក់ចំណូលពន្ធនៅខ្វះចំនួន ១៧០ លានដុល្លារអូស្ត្រាលី ធៀបនឹងផែនការ (១១៤ លានដុល្លារអាមេរិក) ។ ការដំឡើងពន្ធបានជំរុញឱ្យមានអតិផរណា និងកើនឡើងនូវសម្ពាធចំណាយនៃការរស់នៅប្រចាំថ្ងៃ ។ សេណារីយ៉ូនេះ បានបង្ហាញអំពីឥទ្ធិពលនៃការ “ការជួញដូរធ្លាក់ចុះ” ឬ “ការបន្ទាបតម្លៃ” ដែលអ្នកពិសាជ្រើសរើសជម្រើសថោកជាង ដោយមិនចាំបាច់កាត់បន្ថយការទទួលទាន ។ ដំណើរការនេះគឺពាក់ព័ន្ធជាពិសេសសម្រាប់ទីផ្សារក្នុងតំបន់អាស៊ីអាគ្នេយ៍ រួមទាំងប្រទេសកម្ពុជាផងដែរ ដែលការយកពន្ធខ្ពស់អាចជំរុញនូវពាណិជ្ជកម្មខុសច្បាប់ និងផ្លាស់ប្តូរការប្រើប្រាស់ឆ្ពោះទៅរកផលិតផលដែលមិនមានការគ្រប់គ្រង ។
ការកើនឡើងពាណិជ្ជកម្មខុសច្បាប់ ៖ អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) បានកំណត់អត្តសញ្ញាណពាណិជ្ជកម្មខុសច្បាប់ថា ជាការគំរាមកំហែងជាសកលដែលបំផ្លាញអភិបាលកិច្ច នីតិរដ្ឋ និងការជឿទុកចិត្តរបស់សាធារណៈជនមកលើរដ្ឋាភិបាល ។ ការជួញដូរគ្រឿងស្រវឹងខុសច្បាប់មិនត្រឹមតែប៉ះពាល់ដល់ដំណើរការសេដ្ឋកិច្ចប៉ុណ្ណោះទេ ថែមទាំងបង្កហានិភ័យយ៉ាងធ្ងន់ធ្ងរដល់សុវត្ថិភាពសាធារណៈ និងសុខុមាលភាពសង្គមផងដែរ។ បញ្ហាគឺកាន់តែធ្ងន់ធ្ងរឡើងដោយការយកពន្ធខ្ពស់ និងវិធានការណ៍គ្រប់គ្រងនៅមានកំរិត ដូចដែលបានឃើញនៅក្នុងប្រទេសផ្សេងៗ ៖
-ប្រទេសក្រិក ៖ ការដំឡើងពន្ធជាប់ៗគ្នាបាននាំឱ្យមានការកើនឡើងជិត ៥០% នៃគ្រឿងស្រវឹងដែលមិនបានកត់ត្រា និងការធ្លាក់ចុះយ៉ាងខ្លាំងនៃប្រាក់ចំណូលរដ្ឋ ។
-ប្រទេសបែលហ្ស៊ិក ៖ ការដំឡើងពន្ធបានបណ្តាលឱ្យមានការថយចុះនៃបរិមាណលក់ និងប្រាក់ចំណូលរបស់រដ្ឋាភិបាល ដោយសារអ្នកប្រើប្រាស់ងាកទៅរកប្រទេសជិតខាងដែលមានតម្លៃទាបជាង ។
នៅក្នុងប្រទេសកម្ពុជា ការប្រើប្រាស់គ្រឿងស្រវឹងដែលមិនបានកត់ត្រា គឺស្ថិតក្នុងចំណោមកម្រិតខ្ពស់បំផុតនៅអាស៊ី គឺ ៤៦,៨% ។ នេះបង្ហាញពីតម្រូវការសម្រាប់ការអនុវត្ត និងការគ្រប់គ្រងដ៏រឹងមាំ ដើម្បីទប់ស្កាត់ការរីករាលដាលនៃពាណិជ្ជកម្មខុសច្បាប់ ។
ផលប៉ះពាល់អវិជ្ជមានលើសកម្មភាពសេដ្ឋកិច្ច និងសង្គម ៖ ឧស្សាហកម្មគ្រឿងស្រវឹង គឺជាការរួមចំណែកយ៉ាងសំខាន់ដល់សេដ្ឋកិច្ចរបស់ប្រទេសកម្ពុជា ផ្តល់ការងារ និងជួយដល់អាជីវកម្មក្នុងស្រុក ។ ពន្ធខ្ពស់អាចរារាំងកំណើន ប៉ះពាល់ដល់ជីវភាពរស់នៅ និងស្ថិរភាពសេដ្ឋកិច្ច ។ លើសពីនេះ ការប្តូរទៅប្រើប្រាស់គ្រឿងស្រវឹងដែលខុសច្បាប់ ដោយសារទំនិញស្របច្បាប់មានតំលៃខ្ពស់ នាំឲ្យបង្កើនហានិភ័យនៃការពុល និងផលវិបាកសុខភាពរយៈពេលវែង ធ្វើឱ្យមានបន្ទុកដល់ប្រព័ន្ធថែទាំសុខភាពបន្ថែមទៀត និងធ្វើឱ្យប៉ះពាល់ដល់អត្ថប្រយោជន៍សុខភាពសាធារណៈ ។
សេចក្តីសន្និដ្ឋាន និងអនុសាសន៍
សមាគមអ្នកនាំចូល និងចែកចាយស្រាបៀរ និងស្រា (WSBIDA) យើងខ្ញុំ សូមសំណូមពរយ៉ាងទទូចដល់រាជរដ្ឋាភិបាលកម្ពុជា និងអ្នកបង្កើតគោលនយោបាយនានា ឱ្យពិចារណាលើយុទ្ធសាស្ត្រណាផ្សេង ដើម្បីដោះស្រាយកង្វល់សុខភាពសាធារណៈ ដោយពុំមានផលវិបាកសេដ្ឋកិច្ច និងសង្គមដោយសារការបង្កើនពន្ធ ។ វិធីសាស្ត្រជាក់ស្តែង រួមមានកម្មវិធីអប់រំដ៏ទូលំទូលាយ បទប្បញ្ញត្តិប្រកបដោយតុល្យភាព និងអន្តរាគមន៍ដែលបានកំណត់ទុក ។ ការពង្រឹងសកម្មភាពអនុវត្តច្បាប់ដោយអាជ្ញាធរពាក់ព័ន្ធ ដូចជា អគ្គនាយកដ្ឋានពន្ធដារ, អគ្គនាយកដ្ឋានគយនិងរដ្ឋាករកម្ពុជា, គណៈកម្មការប្រយុទ្ធប្រឆាំងផលិតផលក្លែងក្លាយ, អគ្គនាយកដ្ឋាន ក.ប.ប និងនគរបាលជាតិ តាមរយៈកម្មវិធីត្រួតពិនិត្យ និងអភិបាលកិច្ចទីផ្សារជាប្រចាំ គឺជារឿងចាំបាច់ ។
វិធានការគោលនយោបាយពន្ធដារប្រកបដោយប្រសិទ្ធភាពមានសារៈសំខាន់ណាស់ សម្រាប់ការលើកកម្ពស់កំណើនប្រកបដោយចីរភាព និងកាត់បន្ថយភាពក្រីក្រ ។ បរិយាកាសគោលនយោបាយពន្ធដារប្រកបដោយតុល្យភាពជំរុញកំណើនអាជីវកម្ម និងការរួមចំណែកសេដ្ឋកិច្ចជាវិជ្ជមាន ។ ឧស្សាហកម្មគ្រឿងស្រវឹងយើងខ្ញុំ ប្តេជ្ញាគាំទ្ររដ្ឋាភិបាលក្នុងការកាត់បន្ថយការប្រើប្រាស់ដែលបង្កគ្រោះថ្នាក់ តាមរយៈការចែករំលែកការអនុវត្តល្អបំផុតជាអន្តរជាតិ និងគាំទ្រគោលនយោបាយពន្ធគ្រឿងស្រវឹងប្រកបដោយប្រសិទ្ធភាព ។
អំពីសមាគមអ្នកនាំចូល និងចែកចាយស្រាបៀរ និងស្រា (WSBIDA)
WSBIDA គឺជាសមាគមអព្យាក្រឹតមួយ ដែលបានចុះបញ្ជី និងទទួលស្គាល់ដោយ ក្រសួងមហាផ្ទៃ កាលពីថ្ងៃទី ១៤ ខែកក្កដា ឆ្នាំ ២០២២ ។ ជាសមាគមតំណាងឱ្យក្រុមហ៊ុនអ្នកនាំចូល និងអ្នកចែកចាយគ្រឿងស្រវឹងនៅកម្ពុជា សូមគាំទ្រយ៉ាងពេញទំហឹងនូវការលើកកម្ពស់ការប្រើប្រាស់គ្រឿង ស្រវឹងប្រកបដោយការទទួលខុសត្រូវ និងគោលនយោបាយគាំទ្រដែលរួមចំណែកដល់សុខុមាលភាពសេដ្ឋកិច្ច និងសង្គម ។ សមាគមមានទីតាំងនៅ អគារលេខ១៧ មហាវិថីសហព័ន្ធរុស្សី ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ និងលេខទំនាក់ទំនង (៨៥៥) ៧០ ៩៩៩ ៧៣៧ ៕ អត្ថបទសហការ
ចែករំលែកព័តមាននេះ