រាជធានីភ្នំពេញ ៖ យុវជនម្នាក់បានជិះម៉ូតូ១គ្រឿង ឌុបប្អូនស្រីជីដូនមួយរបស់ខ្លួន ចេញពីធ្វើការត្រលប់ទៅផ្ទះ ស្រាប់តែងងុយដេកហើយងោក១ភាំង បាត់បង់ម្ចាស់ការ ក្នុងការបើកបរ ក៏រេចង្កូតជ្រុលទៅបុកបង្គោលភ្លើងថ្ម ១ដើម ពេញទំហឹង បណ្ដាលឲ្យរងរបួសធ្ងន់ធ្ងរ បន្ទាប់មក ត្រូវបានក្រុមសង្គ្រោះអង្គភាព៧១១ ដឹកយកទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ភ្លាមៗ ចំណែកយុវតី ដែលជាប្អូនស្រីជីដូនមួយរងរបួសស្រាល ។
ឧប្បត្តហេតុនេះ បានកើតឡើងកាលពីវេលាម៉ោង២រសៀលថ្ងៃទី៦ ខែមិថុនា ឆ្នាំ២០២៤ នៅតាមមហាវិថីសហព័ន្ធរុស្ស៊ី ត្រង់ចំណុចស្ពានអាកាសចោមចៅ មុខធនាគារអេស៊ីលីដា ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
យុវតី ដែលជាប្អូនស្រីបានប្រាប់ឲ្យដឹងថា នៅមុនពេលកើតហេតុបងប្រុសជីដូនមួយ បានជិះម៉ូតូ១គ្រឿងម៉ាកហុងដាប៊ីត ពណ៍ស លាយខៀវ ពាក់ស្លាកលេខកំពង់ស្ពឺ 1X-6550 ឌុបនាងចេញពីធ្វើការត្រលប់ទៅផ្ទះ ។ ដោយបានធ្វើដំណើរតាមមហាវិថីសហព័ន្ធរុស្ស៊ី ក្នុងទិសដៅពីជើងទៅត្បូង លុះពលទៅដល់ត្រង់ចំណុចកើតហេតុខាងលើ បងប្រុសងងុយ ហើយដេកងោក១ភាំង ។ បណ្ដាលឲ្យរេចង្កូតជ្រុលទៅបុកបង្គោលភ្លើងថ្ម ១ដើម នៅចិញ្ចើមផ្លូវពេញទំហឹងតែម្ដង ពេលនោះបងប្រុសរងរបួសធ្ងន់ដួលដេក នៅនឹងកន្លែងក្រោកមិនរួចឡើយ ចំណែកនាងរងរបួសស្រាលប៉ុណ្ណោះ ។
សមត្ថកិច្ចបានប្រាប់ឲ្យដឹងថា ក្រោយពេលកើតហេតុ កម្លាំងនគរបាលបានដែលប្រចាំការនៅជិតនោះ បានទៅពិនិត្យមើល ភ្លាមៗផងដែរ បន្ទាប់មកក្រុមសង្គ្រោះអង្គភាព៧១១ ដឹកយកយុវជន ដែលរងរបួសធ្ងន់ទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ។ ចំណែកឯប្អូនស្រីជីដូនមួយ ដែលជាអ្នកជិះខាងក្រោយរងរបួសស្រាល ហើយម៉ូតូបានរងការខូចខាត និងបានឲ្យជាងនៅជិតនោះជួយធ្វើការជួសជុល ៕
ចែករំលែកព័តមាននេះ