រាជធានីភ្នំពេញ ៖ មនុស្សមួយចំនួនរស់នៅ តែងតែមានភាពសប្បាយរីករាយ និងទុក្ខព្រួយ ហើយនៅពេលដែលពួកគាត់មានទុក្ខព្រួយ ឬភ័យខ្លាចអ្វីមួយ គេតែងតែបន់ឲ្យទេវតា ឬជំនាងផ្ទះ ព្រះភូមិ បន់ដូនបន់តាឲ្យជួយជានិច្ច ។ តើមនុស្សបែបណាទៅទើបទេវតាតាមជួយ និងថែរក្សា ?
ព្រះភិក្ខុ វជិរប្បញ្ញោ គូ សុភាព បានមានថេរដីកានៅក្នុងវីដេអូនៅលើបណ្តាញសង្គម កាលពី ពេលថ្មីៗនេះដោយមានសង្ឃដីកា ៖ បើគិតពីបុណ្យចូលឆ្នាំនេះយើងថា ទទួលទេវតាឆ្នាំថ្មីនេះត្រូវ តែបើគិតពីទេវតា គឺនៅជាមួយយើងជាប្រចាំហើយ ។ មួយទេវតាមែនទែន ដូចជាជំនាងផ្ទះ ឬក៏ទេវតានៅហ្នឹងដើមឈើ (យើងហៅរក្ខទេវតា ) ហើយទេវតានៅភូមិស្រុកអីយើងហៅថា (អារក្ខទេវតា) ។ តែខ្មែរយើងចូលចិត្តហៅអារុកអារក្ខទេវតា តែតាមពិតទេវតា២ខុសគ្នា អារុក្ខទេវតា ទេវតានៅដើមឈើ ទី២អារក្ខទេវតា ទេវតាថែរក្សាតាមតំបន់ ភូមិស្រុកស្រះ ឬក៏ព្រៃ ឬក៏ក្រុងអីអ៊ីចឹងទៅ ។
ជាមួយគ្នានោះដែរ ភិក្ខុ វជិរប្បញ្ញោ គូ សុភាព បានមានសង្ឃដីកាបន្ថែមទៀតថា ប៉ុន្តែទេវតាហ្នឹង គេជួយយើង ទាល់តែយើងមានបុណ្យ បើយើងអត់បុណ្យ យើងបន់យ៉ាងម៉េចក៏គេមិនជួយដែរ ។ បើយើងមានបុណ្យ គេមិនត្រូវជួយ ក៏ត្រូវជួយយើងដែរពីព្រោះកាតព្វកិច្ចគេមួយ គឺជួយអ្នកមានសីល អ្នកមានគុណធម៌ហ្នឹងឯង ។ អ៊ីចឹងដើម្បីចង់ឲ្យទេវតាជួយត្រូវធ្វើអីសិន ? ត្រូវជួយខ្លួនឯង ត្រូវសាងល្អខ្លួនឯង ត្រូវធ្វើជាមនុស្សល្អ ធ្វើជាអ្នកមានបុណ្យ ចិញ្ចឹមម៉ែចិញ្ចឹមឪ ចែកទានមានចិត្តមេត្តា អនុគ្រោះ មានចិត្តមេត្តា ស្រលាញ់រាប់អាន ហើយចិត្តត្រជាក់ អាហ្នឹងទេវតាថែរក្សាហ្មង មិនបាច់សុំក៏គេត្រូវតែថែរក្សាដែរ ។
ទន្ទឹមនោះដែរ ភិក្ខុ វជិរប្បញ្ញោ គូ សុភាព មានសង្ឃដីការបញ្ជាក់ថា ហើយបើដើរតែឈ្លោះជាមួយគេ ជេរគេ ទេវតាណាជួយយើង ចាំបាច់តែទេវតាអី តែងអ្នកស្គាល់ក្បែរយើងក៏គេមិនជួយដែរ ។ មួយវិញទៀត កាលពីពេលថ្មីៗកន្លងមកនេះ ភិក្ខុអគ្គធម្មោ ពិសី បានសម្តែងធម៌ទេសនានៅលើបណ្តាញសង្គមហ្វេសប៊ុកថា ៖ ទេវតាដែលអាចផ្តល់សេចក្តីសុខឱ្យយើងបាន ទាល់តែយើងជាអ្នកមានបុណ្យផង! ។
ព្រះតេជគុណ ជ្រួញ ពិសី មានសង្ឃដីកា ៖ ត្រូវចាំថា ទេវតាដែលអាចផ្តល់សេចក្តីឲ្យយើងបាន ទាល់តែយើងជាអ្នកមានបុណ្យផង ។ ពពួកទេវតា ថែរក្សាចំពោះបុគ្គលណាដែលមានកតញ្ញុតាធម៌ មានការដឹងគុណមាតាបិតា គ្រូបាអាចារ្យ ត្រកូលរៀមច្បង អ្នកមានឧបក្ការលើខ្លួន ជាអ្នកមានសីលល្អ ក្នុងការរស់នៅ មានសីលវិន័យ ប្រកបដោយភាពថ្លៃថ្នូរ គឺទេវតាជាអ្នករក្សា ។ រក្សាដោយសារតែយើងមានបុណ្យ មានបុណ្យក្នុងទីនេះ គឺជាចំណែកនៃកុសលដែលមានក្នុងខណ្ឌសណ្តាននេះឯង ។
លើសពីនេះទៀត ព្រះតេជគុណ ភក្ខុអគ្គធម្មោ ជ្រួញ ពិសី មានសង្ឃដីកាបន្តថា ជីវិតរបស់យើងរស់នៅរាល់ថ្ងៃនេះ មានការប្រព្រឹត្តិខុសខ្លាំងណាស់ តែងតែសុំអង្វរឲ្យទេវតា អារុក្ខទេវតា ទេវតាដែលថែរក្សាក្នុងជ្រោះជ្រលងដងអូរ អ្នកតាវល្លិ៍ជាដើមមកអស់ហើយសូមឲ្យផ្តល់នូវសេចក្តីសុខ ប៉ុន្តែបើយើងជាអ្នកមិនមាននូវសុចរិតធម៌ មិនមែនជាអ្នកមានសេចក្តីល្អក្នុងដួងចិត្ត ហើយ គ្មានការប្រព្រឹត្តិល្អ ដោយ កាយ វាចាហ្នឹងទេ ទេវតាមិនអាចមករក្សាយើងបានឡើយ ។ ចេះតែសុំទេវតាឲ្យជួយ ចំណែកខ្លួនឯងមិនធ្វើទេវតាជួយខ្លួនឯងទេ ចូលចិត្តឲ្យតែទេវតាមើលមិនឃើញនោះមកជួយ ។ ហើយចុះខ្លួនឯងមានសទ្ធា មានសីល មានបញ្ញា មានសោត អាហ្នឹងហើយជាទេវធម៌ ជាធម៌នាំឲ្យបាននូវទេវតា(ទេវតារស់)។ ចេះតែទៅបន់ទេវតា ទេវតាមិនដែលឲ្យសុខ ឲ្យសិរីយើងអីបន្តិចផង ។
បន្ថែមពីនេះទៀត ព្រះតេជគុណ ជ្រួញ ពិសី មានសង្ឃដីកា ៖ ហើយទៅបន់ព្រះឲ្យជួយ សូមឲ្យខ្ញុំរកស៊ីមានបាន សុខដុមរមនា ជាដើម ហើយដែលព្រះនិយាយជាមួយយើងថា ម៉េចអត់? បានមានសង្ឃដីកាថា ៖ រឿងជីវិតរបស់យើងនេះ គឺប្រព្រឹត្តិទៅតាមកម្ម សាងហេតុយ៉ាងណាហ្នឹងទទួលបានផលយ៉ាងនោះ ។ បើយើងសាងល្អនោះនឹងទទួលបានមកសេចក្តីសុខពិត ទី១ សុខ ព្រោះតែការមិនបៀតបៀនអ្នកដទៃ កើតមកក្នុងជាតិសាសន៍តែមួយ មានជាតិតែមួយ មានកំណើតតែមួយ ហើយជាអ្នកមាននូវចាស់ កើត ឈឺ ស្លា.ប់តែមួយ តើយើងទៅបៀតបៀនគ្នាដើម្បីអ្វី ? បៀតបៀនគ្នាហើយទទួលបានក្តីសុខទេ?បើយើងបៀតបៀនអ្នកដទៃ យើងឈ្នះ យើងបានយើងពូកែហើយ ប៉ុន្តែវានាំឲ្យយើងកើតនូវពៀរវេរា ។ «អ្នកឈ្នះប្រទះនូវពៀរ អ្នកចាញ់រមែងដេកជាទុក្ខ» អ្នកណា ជាអ្នកសម្តែង គឺព្រះពុទ្ធជាអ្នកសម្តែង ។ អ្វីណាដែលកំពុងតែទទួលបានក្នុងឥឡូវនេះ ពេលនេះ ខណៈនេះ ម៉ោងនេះ ត្រឹមតែជាចិត្តដែលសោយនូវអារម្មណ៍តែប៉ុណ្ណោះ ។ បើយើងបៀតបៀនគេ ច្បាស់ណាស់នឹងទទួលបានសេចក្តីទុក្ខមិនខាន ។ បើយើងចង់បានសុខ យើងទាំងឡាយមិនត្រូវមានគំនុំគុំគួន បៀតបៀនអ្នកដទៃឡើយ ព្រោះអាការបៀតបៀនគេនោះវានៅអត់សុខសោះ គឺវាក្តៅ បើក្តៅហើយកុំសង្ឃឹមថា ញោមបាននូវសេចក្តីសុខ ហើយកុំសង្ឃឹមថា បាននូវភាពត្រជាក់ ព្រោះភាពត្រជាក់របស់យើងនេះគឺនៅត្រង់ការដែលយើងចេះអនុគ្រោះ សង្គ្រោះទៅកាន់មនុស្សជុំវិញខ្លួននោះទេតើ ៕
ចែករំលែកព័តមាននេះ