ឥណ្ឌូនេស៊ី៖ ក្នុងកិច្ចខិតខំប្រឹងប្រែងជម្រុញវិស័យទេសចរណ៍នៅកោះស៊ូម៉ាត្រាខាងលិចឱ្យកាន់តែទូលំទូលាយ ពិសេសដើម្បីទាក់ទាញទេសចរបរទេសនៅបណ្តាប្រទេសជាសមាជិកអាស៊ាន រដ្ឋាភិបាលឥណ្ឌូនេស៊ី រំពឹងថានឹងមានជើងហោះហើរផ្ទាល់រវាងទីក្រុងផាដាង (Padang) នៃកោះស៊ូម៉ាត្រាខាងលិច មករាជធានីភ្នំពេញ នៃប្រទេសកម្ពុជាឆាប់ៗនេះ ។

ថ្លែងប្រាប់អ្នកសារព័ត៌មានមកពីប្រទេសកម្ពុជា និងប្រទេសឡាវ លោក Asril ប្រធានផ្នែកទីផ្សារទេសចរណ៍​នៃកោះស៊ូម៉ាត្រាខាងលិច បានបញ្ជាក់ថា ឥណ្ឌូនេស៊ី សង្ឃឹមថា កម្ពុជានិងឥណ្ឌូនេស៊ី នឹងមានជើងហោះហើរត្រង់រវាងទីក្រុងភ្នំពេញ និងទីក្រុង ផាដាង នៃខេត្តកោះស៊ូម៉ាត្រាខាងលិច ដើម្បីទាក់ទាញ និងជំរុញកំណើនភ្ញៀវទេសរវាងកម្ពុជា និងស៊ូម៉ាត្រា ឱ្យបានកាន់តែច្រើនថែមទៀត។

លោក Asril ឱ្យដឹងថា រយៈពេល៩ខែ ឆ្នាំ២០២៣ កោះស៊ូម៉ាត្រាខាងលិច ឬ ភាគច្រើនស្គាល់ថា ជាទីក្រុង ផាដាង (Padang) ទទួលបានភ្ញៀវទេសចរក្នុងស្រុកប្រមាណជាង ៦ លាននាក់ និងភ្ញៀវទេសចរបរទេសប្រមាណ ៦៩ ០០០នាក់ ដែលភាគច្រើនមកពីប្រទេសម៉ាឡេស៊ី ដោយសារមានជើងហោះហើរត្រង់រវាងទីក្រុង ផាដាង និងកូឡាឡាំពួរ ​ចំនួន​៥ ដងក្នុងមួយថ្ងៃ ខណៈទេសចរមកប្រទេសអូស្រ្តាលី និងអឺរ៉ុបក៏មានចំនួនច្រើនគួរឱ្យកត់សម្គាល់។

បើតាមលោក Asril ក្នុងចំណោមភ្ញៀវទេសចរបរទេសដែលបានមកកម្សាន្តនៅផាដាង គឺមានជនជាតិខ្មែរប្រមាណជាង ១០០ នាក់ ខណៈមិនធ្លាប់មានភ្ញៀវទេចរពីប្រទេសឡាវ មកកាន់ស៊ូម៉ាត្រាខាងលិចនោះទេ។ លោកបានបញ្ជាក់ថា នៅពេលខាងមុខ លោកចង់ឃើញ​ភ្ញៀវទេសចរកម្ពុជាជាច្រើនមកទស្សនាខេត្តស៊ូម៉ាត្រាខាងលិច​ ដែលជាខេត្តមានសក្តានុពលទេសចរណ៍ខ្ពស់ ទាំងទេសចរណ៍ធម្មជាតិ វប្បធម៌ និងប្រវត្តិសាស្ត្រ ។

លោក Darmawi, S.Pd. I នាយកប្រតិបត្តិផ្នែកក្រុមហ៊ុនរៀបចំដំណើរកម្សាន្តនៅ Padang មានប្រសាសន៍ថាលោកក៏សង្ឃឹមថានឹងជើងហោះហើរត្រង់រវាង Padang និងរាជធានីភ្នំពេញផងដែរ។ លោកបានបញ្ជាក់ថា នៅកោះស៊ូម៉ាត្រាខាងលិច មានក្រុមហ៊ុនទេសចរណ៍ជាង ២៦០ ក្រុមហ៊ុនដើម្បីបម្រើសេវាកម្មទេសចរណ៍។

នៅកោះស៊ូម៉ាត្រាខាងលិច maជនជាតិឥណ្ឌូនេស៊ីប្រមាណជាង ៦០ ភាគរយនៅ កោះស៊ូម៉ាត្រាខាងលិច អាចនិយាយភាសាអង់គ្លេសសម្រាប់ការធ្វើទំនាក់ទំនងជាមួយភ្ញៀវទេសចរបរទេស។ លោកបានបញ្ជាក់ថា ឥណ្ឌូនេស៊ី ក៏កំពុងជម្រុញទេសចរណ៍ Hala ផងដែរ។ លោក Darmawi បានបន្តថា នៅកោះស៊ូម៉ាត្រាខាងលិច មាន ១៩ ស្រុក ក្នុងនោះ Padang ជាទីក្រុងដែលល្បីល្បាញជាងគេបំផុតដែលបានទាក់ទាញទេសចរក្នុងស្រុកនិងក្រៅស្រុកជាច្រើន។

សូមបញ្ជាក់ថា អ្នកសារព័ត៌មាន ៧ រូប (៤ រូប មកពីកម្ពុជា និង ៣ រូបមកពីប្រទេសឡាវ) មកពី៧ស្ថាប័នផ្សេងៗគ្នា ត្រូវបានអញ្ជើញទៅទស្សនកិច្ចឈ្វេងយល់ពីតំបន់ទេសចរណ៍សំខាន់ៗ នៅកោះស៊ូម៉ាត្រាខាងលិច ដើម្បីដើម្បីផ្សព្វផ្សាយសក្តានុពលទេសចរណ៍ក្នុងតំបន់​ និងការពង្រឹងទំនាក់ទំនងវិស័យទេសចរណ៍រវាងគ្នាទៅវិញទៅមក។

អ្នកសារព័ត៌មានដែលបានចូលរួមក្នុងដំណើរ​ទស្សនកិច្ចស្វែងយល់ពីកោះស៊ូម៉ាត្រាខាងលិចនេះ ​រួមមាន បណ្តាញសារព័ត៌មាន Koh Santepheap Daily, Fresh News ,Cambodianess, ​​Sabay News និង ​ព្រមទាំងសារព័ត៌មាន៣ទៀតមកឡាវ រួមមាន Vientiane Times, Champa Meuanglao និង Vientiane Mai។ ​

សម្រាប់ដំណើរទស្សនកិច្ចសិក្សា​ស្វែងយល់ពីតំបន់ទេសចរណ៍សក្តានុពល នៅកោះស៊ូម៉ាត្រាខាងលិច បានធ្វើឡើងរយៈពេល ៦ថ្ងៃ ចាប់ពីថ្ងៃទី ៥ ដល់ថ្ងៃទី១០ ខែវិច្ឆិកា ឆ្នាំ២០២៣ ដែលតំបន់ទេសចរណ៍សំខាន់ៗ មានលក្ខណៈជាទេសចរណ៍ធម្មជាតិ វប្បធម៌ និងប្រវត្តិសាស្ត្រ ​រួមមាន ទីក្រុងផាដាង(Padang), ទីក្រុង Sawahlunto ដែល សារមន្ទីររថភ្លើង (Sawahlunto Train Museum) និង Ombilin Coal Mining Heritage of Sawahlunto ដែលអណ្តូងរ៉ែនេះត្រូវបានចុះបញ្ជីបេតិកភ័ណ្ឌពិភពលោក និងត្រូវបានសាងសង់ឡើងសម្រាប់ការទាញយក កែច្នៃ និងដឹកជញ្ជូនធ្យូងថ្មដែលមានគុណភាពខ្ពស់នៅក្នុងតំបន់ដែលមិនអាចចូលដំណើរការបាននៃកោះស៊ូម៉ាត្រា កន្លែងឧស្សាហកម្មនេះត្រូវបានបង្កើតឡើងដោយរដ្ឋាភិបាលនៃប្រទេសហូឡង់ខាងកើតនៃប្រទេសឥណ្ឌាក្នុងសម័យកាលនៃឧស្សាហូបនីយកម្មដ៏សំខាន់ជាសាកលចាប់ពីចុងសតវត្សទី 19 ដល់ដើមសតវត្សទី 20។

តំបន់ទេសចរណ៍សំខាន់ៗផ្សេងទៀត ដែលអ្នកសារព័ត៌មានកម្ពុជានិងឡាវបានទៅទស្សនាផងដែរនោះ គឺ វំាង Pagaruyung, ភូមិទេសចរណ៍ Kubu Gadang ទីក្រុង​ Bukittinggi ដែលជាអតីតរដ្ឋធានីរបស់ឥណ្ឌូនេស៊ី, ទស្សនា Lobang Jepang ឬ Lubang Jepang ដែលជាបរិវេណយោធាក្រោមដី ដែលឥឡូវនេះជាកន្លែងទេសចរណ៍ប្រវត្តិសាស្ត្រមួយនៅក្នុងទីក្រុង Bukittinggi ភាគខាងលិចកោះស៊ូម៉ាត្រា និងបឹង Geopark Maninjau ដែលជាបឹងកើតឡើងដោយសារតែការផ្ទុះភ្នំភ្លើង៕