ខេត្តស្ទឹងត្រែង៖ កម្លាំងឆ្មាំទន្លេប៉ុស្តិ៍កោះជ្រឹម ក្នុង​ខេត្តស្ទឹងត្រែង នៅថ្ងៃទី១៩ ខែមីនា ឆ្នាំ២០២៣ នេះ បាន​ប្រទះឃើញសត្វផ្សោតមួយក្បាល ស្លា.ប់ នៅចំណុចកោះព្រះ ដោយមិនឃើញមាន​ជាប់មង ឬសន្ទូចរនងទេ។ ប៉ុន្តែមានស្នាមឆ្នូត នៅពោះ។ កម្លាំងមន្ត្រីជលផល បានពិនិត្យមើល និងទាក់ទងទៅអង្គការ WWF ដើម្បីធ្វើកោសល្យវិច្ឆ័យ ដោយ​យកសាកសពផ្សោតទៅរក្សាទុក។

លោក ស្រី វិចិត្រ នាយខណ្ឌរដ្ឋបាលជនផលស្ទឹងត្រែង បាន​ឱ្យដឹងនារសៀលថ្ងៃអាទិត្យ ទី១៩ ខែមីនានេះ​ថា សត្វផ្សោត ដែលស្លា.ប់ បានអណ្តែត ដែលគេបានប្រទះ​ឃើញនៅព្រឹកមិញ ម៉ោង ៦ និង ៣០នាទី។ បន្ទាប់មក ខាងរដ្ឋបាលជលផល បានយកស.ព​សត្វផ្សោតនោះ មករក្សាទុក ដើម្បីធ្វើកោសល្យវិច្ឆ័យ ពីអង្គការ WWF ដើម្បី​ដឹងថា សត្វផ្សោតមួយក្បាលនោះ ស្លា.ប់ដោយ​សារអ្វីពិតប្រាកដ?។

លោកបន្តថា សត្វផ្សោត ១ក្បាលនោះ មានទំងន់ជាង ១៩០គីឡូក្រាម តែមិនទាន់ដឹងថា រស់នៅក្នុងអន្លងផ្សោតណាពិតប្រាដកទេ។ លុះត្រាតែខាងអង្គការ WWF ពិនិត្យច្បាស់លាស់ ទើបដឹងថា វារស់នៅក្នុងអន្លង់មួយណា?។ ចំណុចដែលសត្វផ្សោតស្លា.ប់នេះ នៅក្បែរ​អន្លង់ត្បូងខ្លា  ដែល​មានព្រំប្រទល់រវាង​ខេត្តស្ទឹងត្រែង និង​ខេត្ត​ក្រចេះ។

លោក ស្រី វិចិត្រ នាយខណ្ឌរដ្ឋបាលជលផលស្ទឹងត្រែង បានបញ្ជាក់ថា ខេត្តស្ទឹងត្រែង មាន​អន្លង់ត្រីមេពូជ ដែលមានឈ្មោះថា អន្លង់ឈើទាល អន្លង់កោះសន្ទក់ អន្លង់កោះកូនសត្វ និងអន្លង់ត្បូងខ្លា ដែល​ជាអន្លង់ទឹកជ្រៅ និងបានរៀបចំចំណាត់ថ្នាក់ ជាកន្លែងការពារ អភិរក្សធនធានជលផល និងជីវចម្រុះ។ ក្នុងនោះ ក្រុម​ការងារ អភិរក្ស និងការពារ​​សត្វផ្សោត និងត្រីមេពូជ ជាសំខាន់៕ ពុយ វឌ្ឍនា