ធនាគារពិភពលោក(WB)បានផ្សាយកាលពីថ្ងៃទី១៨ វិច្ឆិកា ថាសីតុណ្ហភាពនៅលើផែនដីអាចកើនខ្ពស់៤អង្សាសេដោយគ្មានហេតុផលក្នុងរយៈពេល៥០ឆ្នាំខាងមុខជាហេតុបណ្ដាលមកពីការខូចខាតនៃប្រព័ន្ធជម្រកនៅតាមឆ្នេរសមុទ្រ ។ លោកជីម យ៉ុងឃីម ប្រធានWBបានអំពាវនាវដល់ក្រុមប្រទេសកំពុងអភិវឌ្ឍន៍ដែលមាននិន្នាការនឹងក្លាយជាប្រទេសមានទ្រព្យសម្បត្តិស្ដុកស្ដម្ភក្នុងពេលអនាគតត្រូវបង្កើនកិច្ចខំប្រឹងប្រែងកាត់បន្ថយការបញ្ចេញឧស្ម័នផ្ទះកញ្ចក់ឬបញ្ចេញឧស្ម័នកំដៅចាប់ពីពេលនេះតទៅ ។
ក្រៅ ពីជួយកាត់បន្ថយបញ្ហាបរិស្ថានក៏ជាផ្នែកមួយក្នុងយុទ្ធនាការកាត់បន្ថយភាពក្រីក្រ និងអត់ឃ្លានបានដែរ ។ របាយការណ៍បញ្ជាក់ថា សីតុណ្ហភាពលើផែនដីមាននិន្នាការកើនខ្ពស់បន្ថែមទៀតប្រហែល៤អង្សាសេនៅក្នុងឆ្នាំ២០៦៣ប្រសិនបើប្រជាពលរដ្ឋនៅលើពិភពលោកគ្មានសាមគ្គីជាធ្លុងមួយក្នុងការដោះស្រាយបញ្ហាបរិស្ថានឱ្យប្រាកដប្រជា ។
បច្ចុប្បន្នសីតុណ្ហភាពនៅលើផែនដីកើនឡើងប្រហែល០,៨អង្សាសេធ្វើឱ្យកើតមានបម្រែបម្រួលអាកាសធាតុបង្កឱ្យកើតមានគ្រោះធម្មជាតិធ្ងន់ជាបន្តបន្ទាប់ដោយក្នុងអំឡុងពេលចុងក្រោយនេះមានព្យុះសានឌី ដែលបោកបក់វាយប្រហារលើប្រទេសនៅតំបន់សមុទ្រការីបៀន និងឆ្នេរសមុទ្រភាគខាងកើតសហរដ្ឋអាមេរិកបង្កឱ្យមានការខូចខាតយ៉ាងមហាសាល ។
ប្រសិនបើសីតុណ្ហភាពផែនដីកើនដល់៤អង្សាសេប្រាកដមែននឹងមានបម្រែបម្រួលស្ថានភាពបរិស្ថានទៅលើមនុស្សធ្ងន់ដូចជាមានព្យុះកំដៅ នឹងរីករាលដាលគ្របដណ្ដប់រុស្ស៊ី និងសីតុណ្ហភាពមធ្យមក្នុងអំឡុងខែកក្កដារបស់ប្រទេសនៅក្នុងតំបន់សមុទ្រមេឌីទែរ៉ាណេនឹងកើនឡើងប្រហែល៩អង្សាសេ រួមទាំងធ្វើឱ្យមានផលប៉ះពាល់យ៉ាងខ្លាំងទៅលើផ្កាថ្ម និងសត្វក្នុងមហាសមុទ្រ។
ក្រៅពីសីតុណ្ហភាពកើនខ្ពស់នឹងធ្វើឱ្យកម្រិតទឹកសមុទ្រក៏មានកំណើនក្លាយជាគ្រោះធម្មជាតិដល់ប្រទេសមានព្រំប្រទល់ជាប់នឹងមហាសមុទ្រដូចជាបង់ក្លាដេស ឥណ្ឌា ឥណ្ឌូណេស៊ី ម៉ាដាហ្គាស្កា មិចស៊ិក ម៉ូសំប៊ិក ហ្វ៊ីលីពីន វ៉េណេស៊ុយអេឡា និងវៀតណាម អាចតាមយាយីដោយការកើតជំងឺរាតត្បាតរួមទាំងផ្ដល់ផលប៉ះពាល់ដល់យន្តការផលិតអាហារធ្វើឱ្យកើតមានស្ថានការណ៍អត់ឃ្លាន ជាពិសេសនៅតំបន់អាហ្វ្រិកកាន់តែធ្ងន់។
ចំណែកលោកបាន គីមូន អគ្គលេខាធិការអង្គការសហប្រជាជាតិបានថ្លែងថា របាយការណ៍របស់WBឆ្លុះបញ្ចាំងឱ្យឃើញថា ធាតុពិតបញ្ហាទាំងនេះមិនមែនជារឿងនៅឆ្ងាយទេគឺដល់ពេលវេលាដែលមនុស្សត្រូវសហការគ្នាឱ្យបានប្រាកដប្រជាជាងនេះដើម្បីការពារបរិស្ថាន និងប្រតិបត្តិតាមអនុសញ្ញាបរិស្ថានដែលបានចុះហត្ថលេខានៅទីក្រុងដឺបានប្រទេសអាហ្វ្រិកខាងត្បូងកាលពីឆ្នាំមុនស្ដីពីការសម្រេចកិច្ចព្រមព្រៀងផ្នែកបរិស្ថានថ្មីក្នុងឆ្នាំ២០១៥ ៕
ចែករំលែកព័តមាននេះ