រាជធានីភ្នំពេញ ៖ អគ្គស្នងការដ្ឋាននគរបាលជាតិកម្ពុជា បានប្រកាសកាលពីព្រឹកថ្ងៃទី៩ ខែមិថុនា ឆ្នាំ២០២០ ដោយបានបដិសេធថា ពុំបានចាប់ ឬអនុវត្តច្បាប់ចំពោះសកម្មជនអាវក្រហមថៃ ដែលស្នាក់អាស្រ័យនៅកម្ពុជាទេ ។ ជាមួយគ្នានេះ សមត្ថកិច្ចកម្ពុជាក៏កំពុងស្រាវជ្រាវបន្តពាក់ព័ន្ធនឹងករណីនេះ ជាពិសេសតម្រុយដែលបង្ហាញក្នុងកាមេរ៉ាសុវត្ថិភាពពាក់ព័ន្ធនឹងការបាត់ខ្លួនរបស់បុគ្គលខាងលើ ។ ស្របពេលនេះដែរ នាយឧត្តមសេនីយ៍ ខៀវ សុភ័គ ក៏បានឱ្យបណ្តាញព័ត៌មានក្នុងស្រុកថា លោក វ៉ាន់ ឆាឡឺម បាត់ខ្លួនតាំងពីឆ្នាំ២០១៧មកម្ល៉េះ ។
លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ប្រាប់បណ្តាញព័ត៌មានក្នុងស្រុកថា៖ «សមត្ថកិច្ចបដិសេធចំពោះការចាប់ខ្លួន លោក វ៉ាន់ឆាឡឺម ព្រោះសមត្ថកិច្ចកម្ពុជាមិនបានអនុវត្តច្បាប់ចំពោះបុគ្គលរូបនេះទេ ។ ដោយឡែក វីដេអូតាមកាមេរ៉ាពាក់ព័ន្ធនឹងបុគ្គលរូបនេះ សមត្ថកិច្ចនឹងធ្វើការស្រាវជ្រាវបន្តទៀត» ។
និស្សិតថៃឈ្មោះ វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) គឺជាសកម្មជននយោបាយក្រុមអាវក្រហមថៃ ត្រូវបានកាសែតថៃផ្សាយថា ត្រូវបានចាប់ខ្លួននៅរាជធានីភ្នំពេញ កាលពីថ្ងៃទី៤ ខែមិថុនា ឆ្នាំ២០២០ គ្រាដែលសកម្មជនក្រុមអាវក្រហមនេះ រត់ពីប្រទេសថៃ មកស្នាក់អាស្រ័យនៅកម្ពុជា ។ បុគ្គលរូបនេះ ត្រូវបានចោទប្រកាន់ពីបទប្រមាថព្រះមហាក្សត្រថៃ តាំងពីឆ្នាំ២០១៤មក ។កាលពីថ្ងៃទី៨ មិថុនា សមាជិកក្រុមអាវក្រហមរបស់ថៃមួយក្រុមតូច បានធ្វើការតវ៉ានៅមុខស្ថានទូតកម្ពុជា ប្រចាំនៅទីក្រុងបាងកក ដោយទាមទារឱ្យមានការស៊ើបអង្កេតលើករណី លោក Wanchalearm Satsaksit ដែលពួកគេចោទថាត្រូវបានចាប់ខ្លួននៅរាជធានីភ្នំពេញ ។
តាមទំព័រសារព័ត៌មានថៃ Khaosod បានផ្សាយរូបភាពលើកបដាតវ៉ាមុខស្ថានទូតកម្ពុជារបស់ពលរដ្ឋថៃប្រមាណ១០០នាក់ នៅថ្ងៃទី៨ មិថុនាថាជាការធ្វើបាតុកម្មនៅមុខស្ថានទូតខ្មែរប្រចាំប្រទេសថៃទាមទារឱ្យមានការស៊ើបអង្កេតករណីចាប់ជំរិត លោក Wanchalearm Satsaksit នៅរាជធានីភ្នំពេញ ។
ក្រុមបាតុករបានអះអាងថា ពួកគេមានភស្តុតាងគ្រប់គ្រាន់ដែលមិនអាចប្រកែកបាន ។
ជាមួយគ្នានេះបុរសម្នាក់ក្នុងចំណោមបាតុករបានស្នើសុំឲ្យធានាសុវត្ថិភាពដល់លោក Wanchalearm Satsaksit ហើយប្រសិនបើលោកបានបាត់បង់ជីវិតហើយ សូមឲ្យប្រគល់សាកសពរបស់លោកមកប្រទេសថៃវិញ ដើម្បីឲ្យក្រុមគ្រួសារធ្វើបុណ្យតាមប្រពៃណី ។ ជុំវិញករណីនេះ ស្ថានទូតថៃប្រចាំកម្ពុជានៅថ្ងៃទី៨ មិថុនា បានផ្ញើកំណត់ទូតមួយមកកាន់ក្រសួងការបរទេសកម្ពុជា ដើម្បីស្នើសុំឱ្យអាជ្ញាធរពិនិត្យ និងផ្ទៀងផ្ទាត់ពីព័ត៌មាននៃការចាប់ខ្លួនសកម្មជនអាវក្រហមរូបនេះនៅក្នុងរាជធានីភ្នំពេញ ។
ការផ្ញើកំណត់ទូតនេះ ធ្វើឡើងក្រោយពីសកម្មជនថៃរូបនោះ បានបាត់ខ្លួនអស់រយៈពេល៥ថ្ងៃមកហើយ ដោយមិនទទួលបានដំណឹងអ្វីទាល់តែសោះមកដល់ពេលនេះ ។ ក៏ប៉ុន្តែ សម្រាប់កម្ពុជាបានចេញមកបដិសេធថា មិនបានចាប់ខ្លួនជនជាតិថៃរូបនោះទេ ហើយថា នឹងស៊ើបអង្កេតពីករណីនេះផងដែរ ។
នៅក្នុងកំណត់ទូតផ្ញើមកកាន់ក្រសួងការបរទេសកម្ពុជា ស្ថានទូតថៃបានសួរនាំអំពីព័ត៌មាននៃការចាប់ខ្លួនសកម្មជនថៃ លោក វ៉ាន់ឆាឡឺម សាត់ស័ក្តិសិទ្ធ ដោយសួរថា ពិតជាមានការចាប់ខ្លួនពិតមែនឬយ៉ាងណា ។ ជាមួយគ្នានេះ ស្ថានទូតថៃក៏បានស្នើសុំឱ្យអាជ្ញាធរកម្ពុជាផ្ទៀងផ្ទាត់ជុំវិញព័ត៌មានដែលបានផ្សព្វផ្សាយជាបន្តបន្ទាប់ពីការចាប់ខ្លួននេះ ។ នេះបើតាមការអះអាងឱ្យដឹងរបស់លោក កុយ គួង អ្នកនាំពាក្យក្រសួងការបរទេសកម្ពុជា ។
ឆ្លើយតបចំពោះបញ្ហានេះ អាជ្ញាធរកម្ពុជាបានគូសបញ្ជាក់ថា នឹងធ្វើការស៊ើបអង្កេតស្រាវជ្រាវចំពោះករណីចាប់ខ្លួនសកម្មជនអាវក្រហមថៃរូបនេះ ក៏ប៉ុន្តែ លោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិបានប្រាប់សារព័ត៌មានក្នុងស្រុកនៅព្រឹកថ្ងៃទី៩ ខែមិថុនានេះថា ការបាត់ខ្លួនរបស់សកម្មជនថៃដែលផ្សព្វផ្សាយដោយសារព័ត៌មានជាបន្តបន្ទាប់នេះ គឺមិនមែនជាការអនុវត្តច្បាប់ដោយអាជ្ញាធរកម្ពុជានោះឡើយ ។
សូមបញ្ជាក់ថា ករណីចាប់ខ្លួនសកម្មជនថៃរូបនេះ ត្រូវបានទម្លាយឱ្យដឹងដោយអង្គការឃ្លាំមើលសិទ្ធិអន្តរជាតិ Human Rights Watch ។ អង្គការ Human Rights Watch កាលពីថ្ងៃទី៥ មិថុនា បានរាយការណ៍អំពីករណីចាប់ពង្រត់សកម្មជនថៃ លោក វ៉ាន់ឆាឡឺម សាតស័ក្តិសិទ្ធ ដោយមានរូបភាពពីកាមេរ៉ាសុវត្ថិភាពភ្ជាប់ជាមួយផង ។ បើតាមអង្គការសិទ្ធិមនុស្សនេះ លោក វ៉ាន់ឆាឡឺម សាតស័ក្តិសិទ្ធ អាយុ៣៧ឆ្នាំ ត្រូវគេចាប់រុញទាំងកម្រោលទៅក្នុងរថយន្តពណ៌ខ្មៅមួយ នាល្ងាចថ្ងៃទី៤ មិថុនា ក្នុងពេលដែលលោកវ៉ាន់ឆាឡឺមកំពុងទិញអាហារនៅទល់មុខអគារខុនដូដែលលោកស្នាក់នៅក្នុងខណ្ឌជ្រោយចង្វា រាជធានីភ្នំពេញ ។
លោក វ៉ាន់ឆាឡឺម សាតស័ក្តិសិទ្ធ ត្រូវគេស្គាល់ថាជាសកម្មជនប្រជាធិបតេយ្យមួយរូប (អាវក្រហម) ដែលហ៊ានរិះគន់វាយប្រហារដោយចំៗទៅលើរដ្ឋាភិបាលថៃដឹកនាំដោយលោកនាយករដ្ឋមន្ដ្រី ប្រាយុទ្ធ ចាន់អូចា ។ ក្រោយរដ្ឋប្រហារថ្ងៃទី២២ ឧសភា ឆ្នាំ២០១៤ នៅប្រទេសថៃ លោក វ៉ាន់ឆាឡឺម បានភៀសខ្លួនទៅកាន់ប្រទេសឡាវ និងក្រោយមកមកកាន់កម្ពុជា ដើម្បីគេចពីរឿងក្ដីក្ដាំចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ ។
មួយថ្ងៃមុនពេលត្រូវចាប់ពង្រត់ ពោលគឺនៅថ្ងៃទី៣ ខែមិថុនា លោក វ៉ាន់ឆាឡឺម បានបង្ហោះនូវវីដេអូដ៏ខ្លីមួយលើបណ្ដាញសង្គមហ្វេសប៊ុក ដែលមានខ្លឹមសារជេរប្រមាថនាយករដ្ឋមន្ដ្រីថៃ លោក ប្រាយុទ្ធ ចាន់អូចា ថាជាមេដឹកនាំដែលល្ងង់ខ្លៅ បានតែនិយាយ តែដឹកនាំប្រទេសមិនកើត ។នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ប្រាប់បណ្តាញព័ត៌មានក្នុងស្រុកឱ្យដឹងនៅថ្ងៃទី៩ ខែមិថុនា ឆ្នាំ២០២០ថា លោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) ជនជាតិថៃ ដែលជាសកម្មជនក្រុមអាវក្រហម បានបាត់ដំណឹងពីកម្ពុជា តាំងពីឆ្នាំ២០១៧មកម្ល៉េះ ក្រោយពេលដែលលោកបានសុំពន្យារពេលទិដ្ឋាការស្នាក់នៅបាន២ឆ្នាំ ។
នាយឧត្តមសេនយ៍បានបញ្ជាក់ថា ឆ្លងតាមការស្រាវជ្រាវរបស់សមត្ថកិច្ច នៅក្នុងប្រព័ន្ធចេញ-ចូលរបស់ភ្ញៀវដែលមកកាន់ប្រទេសកម្ពុជា គឺឈ្មោះ Wanchalearm Satsaksit បានចេញចូលកម្ពុជាច្រើនដង ហើយនៅមុនឆ្នាំ២០១៥ ជននេះបានមកស្នើសុំពន្យារពេលទិដ្ឋាការស្នាក់នៅដែលមានសុពលភាពត្រឹមឆ្នាំ២០១៧ ប៉ុន្តែចាប់តាំងពីឆ្នាំ២០១៧មក ជននេះបានបាត់ខ្លួនរហូត ដោយមិនដឹងថាបាត់ទៅទីណាទេ ។ «បើបុគ្គលនេះរស់នៅក្នុងកម្ពុជា គឺរស់នៅដោយខុសច្បាប់ហើយ ប៉ុន្តែគាត់ទៅណាក៏យើងមិនបានដឹងតាំងពីពេលនោះមក» ។
អ្នកនាំពាក្យក្រសួងមហាផ្ទៃ ក៏បានអំពាវនាវឱ្យសាក្សី ឬជនទាំងឡាយដែលមានព័ត៌មានអំពីករណីបាត់ខ្លួន លោក Wanchalearm Satsaksit សូមសហការជាមួយសមត្ថកិច្ច ដោយផ្តល់ព័ត៌មានពិតប្រាកដដល់សមត្ថកិច្ច ដើម្បីធ្វើការស្រាវជ្រាវ ។ លោកបញ្ជាក់ថា តាមច្បាប់អន្តោប្រវេសន៍ជនបរទេសមិនអាចស្នាក់នៅកម្ពុជា ហួសសុពលភាពទេ ប៉ុន្តែជននេះបានបាត់ដំណឹង ៕
ចែករំលែកព័តមាននេះ