កោះសន្តិភាពសូមបង្ហាញជូនប្រិយមិត្តអ្នកអានពីតារាសម្តែងកូរ៉េចាស់វស្សានាង Lee Ji Hye ។ ទស្សនិកជនខ្មែរនិយមតាមដានរឿងភាគកូរ៉េ ស្គាល់នាង Lee Ji Hye តាមរយៈឈ្មោះ ហេជូ ក្នុងរឿង May Queen ឬប្រែខ្មែរថា «នាវាបេះដូង» ដែលកំពុងដាក់បញ្ចាំងតាមកញ្ចក់ទូរទស្សន៍ហង្សមាស ពីថ្ងៃចន្ទដល់ថ្ងៃសុក្រ ចាប់ពីម៉ោង៨និង៣០នាទី ដល់ម៉ោង៩យប់ ។
ទាំងជីវិតក្នុងខ្សែភាពយន្ត និងជីវិតពិត ហេជូ ជួបឧបសគ្គច្រើន ជាពិសេសជីវិតស្នេហា ។ នៅក្រៅឆាក ហេជូ ធ្លាប់ជួបការព្រាត់និរាសស្នេហា ពីលោក Lee Dong Gun តួសម្តែងក្នុងរឿង Sweet 18 និងរឿង My Boy Friend is Type B បន្ទាប់ពីសាងភាពផ្អែមល្ហែមជាមួយគ្នាអស់រយៈពេល៤ឆ្នាំ ។ ទោះជាយ៉ាងណាក្តី ទីបំផុតបេះដូងប្រេះស្រាំរបស់នាង Lee Ji Hye ត្រូវលោកព្រះរាជអាជ្ញា Jong Hyuk Joon ជាអ្នកជួយស្អំ ។ នាងបានរៀបការជាមួយលោក Jong Hyuk Joon នៅថ្ងៃទី២១ កញ្ញា ២០១០ ក្នុងរដ្ឋហាវ៉ៃ សហរដ្ឋអាមេរិក ។
ដោយឡែក ខ្សែជីវិតក្នុងរឿងនាវាបេះដូងវិញ ហេជូ បានឆ្លងកាត់ឧបសគ្គរាប់លានដំណាក់កាលក្នុងឋានៈជាកូនដែលត្រូវគេលួចយកទៅបោះចោល មុនពេលយកទៅចិញ្ចឹមដោយក្រុមគ្រួសារមួយ ។ នៅជាមួយក្រុមគ្រួសារនេះ ហេជូ រងទុក្ខមិនតិចទេតាំងពីតូចរហូតដល់ធំ នាងគឺជាអ្នកទទួលបន្ទុកចិញ្ចឹមគ្រួសារ ដោយយកទេពកោសល្យសាងសង់នាវាធ្វើជាដើមទុន ។
នាង Lee Ji Hye គឺជាតារាម៉ូដែលមុនពេលទទួលបានឱកាសថតរឿងភាគទូរទស្សន៍ដំបូង គឺរឿង Sammer Scent ។ តាមរយៈរឿងនេះធ្វើឱ្យនាងចាប់ផ្តើមល្បីឈ្មោះបោះសំឡេង និងទទួលបានពានរង្វាន់កិត្តិយសជាតារាឯក ។
តាមរយៈការសម្តែងខ្សែភាពយន្ត និងរឿងភាគទូរទស្សន៍ជាង៣០រឿង នាងហេជូ ទទួលបានពានរង្វាន់ចំនួន១៥ ក្នុងចំណោមនោះគ្រាន់តែនៅក្នុងរឿងនាវាបេះដូង នាងទទួលបានពានរង្វាន់តារាសម្តែងឯកចំនួន២ ៕
ចែករំលែកព័តមាននេះ