ខេត្តកំពង់ចាម ៖ យុវជនម្នាក់ឈ្មោះ ផល្លា ចាន់ថា អាយុ២០ឆ្នាំ បច្ចុប្បន្នរស់នៅស្រុកកែវសីម៉ា ខេត្តមណ្ឌលគិរី ហើយមានស្រុកកំណើតនៅភូមិមេឡោ ឃុំមាន ស្រុកអូររាំងឪ ខេត្តកំពង់ចាម ត្រូវបានមិត្តភក្ត័០៣នាក់ ល្បួងទៅដើរលេង ហើយប្លន់សម្លាប់យកគ្រឿង អលង្ការ ដែលក្នុងនោះមានខ្សែកប្លាទីន ទំងន់២ជី និងខ្សែដៃប្លាទីន ទំងន់៤ជី និងទូរសព្ទ័ដៃមួយគ្រឿង តម្លៃ១៥០ដុល្លារ ដោយអាករស្ទើរដាច់ និងសម្លាប់បំបិទមាត់ដោយយកសព ទៅបោះចោលនៅ ចំណុចស្ពានព្រែកសណ្តាយ ជាប់ព្រំប្រទល់ស្រុក០៣ គឺ ស្រុកអូរាំងឪ ស្រុកស៊ីធរកណ្តាល និងស្រុកកោះសុទិន ។
សពត្រូវបានប្រជាពលរដ្ឋប្រទះឃើញ នៅល្ងាចថ្ងៃទី ១៨មេសា ២០១៤ នៅចំណុចស្ពានព្រែកសណ្តាយ បង្កឱ្យមានការភ្ញាក់ផ្អើល ហើយនាំគ្នាចូលទៅមើល ទើបស្គាល់ពីភិនភាគ ជនរងគ្រោះ គឺមានឈ្មោះ ផល្លា ចាន់ថា ដែលបានបាត់ខ្លួនតាំងពីថ្ងៃទី ១៦ មេសា ២០១៤ ។
តាមលោកវិរៈសេនីយ៍ត្រី លឿង រដ្ឋា អធិការនគរបាលស្រុកអូររាំងឪ បានប្រាប់ឱ្យដឹងថា ក្នុងឱកាសបុណ្យចូលឆ្នាំថ្មី ប្រពៃណីខ្មែរ ជនរងគ្រោះបានធ្វើដំណើរពីស្រុកកែវ សីម៉ា ខេត្តមណ្ឌលគិរី មកលេងស្រុកកំណើត នៅក្នុងខេត្តកំពង់ចាម ។ហើយពេលមកដល់ស្រុកកំណើត នៅថ្ងៃ ទី១៦មេសា ២០១៤ ជនរងគ្រោះត្រូវបានមិត្តភក្ត័០៣នាក់មកល្បួងទៅដើរលេង ដោយមិនឃើញជនរងគ្រោះត្រឡប់មកផ្ទះវិញ សាច់ញាត្តបានតាមរកតែពុំឃើញ ហើយទូរសព្ទ័ជនរងគ្រោះក៏ចុចមិនចូល ។
សមត្ថកិច្ចបានប្រាប់ឱ្យដឹងថា ពេលនេះមុខសញ្ញាជនសង្ស័យទាំងអស់ ត្រូវបានសមត្ថកិច្ចដឹងអស់ហើយ ហើយថា ពេលនេះផងដែរជនសង្ស័យបានចែកជាពីរមុខសញ្ញា ដោយមួយគេចចូលក្នុងទឹកដីខេត្តសៀមរាប និងមួយទៀតគេចចូលទៅក្នុងទឹកដីប្រទេសថៃ ។សពត្រូវបានក្រុមគ្រួសារយកទៅធ្វើបុណ្យតាមប្រពៃណី ។
យោងតាមបញ្ជារបស់លោក ឧត្តមសេនីយ៏ត្រី បែន រត្ន័ ស្នងការនគរបាលខេត្តកំពង់ចាម បានឱ្យកម្លាំងអធិការដ្ឋាន ធ្វើការតាមចាប់ខ្លួនជនសង្ស័យ ឱ្យបាន ដើម្បីយកមកផ្តន្ទាទោសតាមផ្លូវច្បាប់ ។
ចែករំលែកព័តមាននេះ