ខេត្តកំពង់ចាម ៖ តាមបទបញ្ជារបស់ស្នងការនគរបាលខេត្ត លោកឧត្តមសេនីយ៏ត្រី បែន រ័ត្ន និងមានការចូលរួមពីតំណាងស្ថានទូតកូរ៉េខាងត្បូងប្រចំាកម្ពុជា សមត្ថកិច្ចខេត្តកំពង់ចាមបានធ្វើការឡោមព័ទ្ឋសណ្ឋាគារមនោរម្យ ក្នុងសង្កាត់-ក្រុងកំពង់ចាម ដោយធ្វើការឃាត់ចាប់ខ្លួនបុរសជនជាតិកូរ៉េខាងត្បូងម្នាក់ដែលមានជំនាញលួចដកលុយតាមប្រព័ន្ឋ ATM នៅក្នុងប្រទេសកូរ៉េខាងត្បូង ។
ហេតុការណ៏ព័ទ្ឋចាប់បង្កឲ្យមានការភ្ញាក់ផ្អើនេះ បានកើតឡើងនៅម៉ោងជាង១០ព្រឹកថ្ងៃទី១០ មេសា ២០១៤ ។ បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងទៀតថា បុរសជនជាតិកូរ៉េនេះឈ្មោះ លី អ៊ីនយ៉ុង (Lee Inyong ) កើតថ្ងៃទី១០ តុលា ១៩៧៨ លិខិតឆ្លងដែនលេខ JR 3533883 មានប្រពន្ឋជាជនជាតិខ្មែរ-អ៊ិស្លាម ។
បើតាមលោកវរៈសេនីយ៏ឯក ប៊ុម ប៊ន ស្នងការរងទទួលផែនកណ្តាលសន្តិសុខបានបញ្ជាក់ឲ្យដឹងថា បុរសជនជាតិកូរ៉េខាងលើនេះជាមេខ្លោងមានជំនាញខ្ពស់ខាងលួចដកលុយតាមប្រព័ន្ឋ ATM ដោយបានប្រព្រឹត្តបទល្មើសនៅក្នុងប្រទេសកូរ៉េខាងត្បូងជាមួយគូកនមួយចំនួនទៀត ។
លោកបន្តថាបទល្មើសចុងក្រោយគឺមេខ្លោងនិងគូកនបានលួយដកលុយពីធនាគារមួយនៅកូរ៉េខាងត្បូងបានបា្រក់ជាង១០ម៉ឺនដុល្លារ ប៉ុន្តែគូកនមួយចំនួនបានត្រូវចាប់ខ្លួននៅកូរ៉េ ។ ចំណែកមេខ្លោងរូបនេះនិងភរិយា បានធ្វើដំណើរមកកម្ពុជា ហើយបានជិះរថយន្តម៉ាក Luxus ព៌ណខ្មៅមួយគ្រឿងជាមួយប្រពន្ឋមកស្នាក់នៅសណ្ឋាគារខាងលើ ក៏ត្រូវសមត្ថកិច្ចដោយមានការសហការពីខាងស្ថានទូតកូរ៉េធ្វើការឃាត់ខ្លួនតែម្តង ។
ព័ត៌មានលម្អិតនឹងមានផ្សាយជូននៅលើសារព័ត៌មានកោះសន្តិភាព ៕
ចែករំលែកព័តមាននេះ