រាជធានីភ្នំពេញ ៖ បុរសជាជនសង្ស័យចោរលួចម៉ូតូមា្នក់ឈ្មោះ សេង រតនា ហៅ ពៅ អាយុ ៣៦ឆ្នាំ ស្នាក់នៅផ្ទះជួលនៅម្តុំរោងចក្រ បឹងក្រពើ មានស្រុកកំណើតនៅក្នុងស្រុកស្វាយអន្ទរ ខេត្តព្រៃវែង ត្រូវម្ចាស់គេចាប់ខ្លួនបាននៅពេលកំពុងតែធ្វើសកម្មភាពលួច យកម៉ូតូមួយគ្រឿងម៉ាកគប់ជ្រុង C90 ព៌ណទឹកប៊ិច ពាក់ស្លាកលេខភ្នំពេញ១AX-6920 ដែលមានម្ចាស់ឈ្មោះយ៉េង យឿន ភេទប្រុស អាយុ ៣២ឆ្នាំ ជាបុគ្គលិក ក្រុមហ៊ុនមួយ មានទីលំនៅភូមិចំការឪឡឹក សង្កាត់ការកាប ខណ្ឌពោធិសែនជ័យ។ ករណីចាប់បានចោលួចម៉ូតូនេះ បានកើតឡើងកាលពីវេលាម៉ោង៥ និង១០នាទីល្ងាច ថ្ងៃទី ០៩ ខែមេសា នៅខាងមុខផ្ទះលេខ១០ ផ្លូវលេខ១៨៣ ក្នុងសង្កាត់ទំនប់ទឹក ខណ្ឌចំការមន។
តាមប្រភពព៌ត័មានពីបុរសជាម្ចាស់ម៉ូតូ បានប្រាប់ឱ្យដឹងថា ម៉ូតូរបស់គាត់ត្រូវបានបញ្ឈរទុកនៅខាងមុខទីស្នាក់ការរបស់ក្រុមហ៊ុន នៅពេលដែលរូបគាត់កំពុងតែអង្គុយធ្វើការនៅខាងក្នុងការិយាល័យ ក៏ស្រាប់តែឃើញជនសង្ស័យរូបនេះបានមកធ្វើសកម្មភាពលួចយកម៉ូតូរបស់គាត់។ តាមប្រភពដដែលបានប្រាប់ឱ្យដឹងទៀតថា បានជាជនសង្ស័យមកធ្វើសកម្មភាពលួចយកម៉ូតូរបស់គាត់បែបនេះដោយសារតែគេបានឃើញមាន ភាពស្ងាត់ច្រងំ ហើយទ្វារការិយាល័យត្រូវបានបិទដោយទ្វារកញ្ចក់ដែលមិនអាចមើលពីខាងក្រៅឃើញ តែអាចមើល ឃើញច្បាស់ពីខាងក្នុងច្បាស់។ លុះពេលដែលបានឃើញជនសង្ស័យកំពុងតែធ្វើសកម្មភាពលួចម៉ូតូដូច្នេះបុរសជាម្ចាស់ក៏បាននាំគ្នាចេញមកចាប់ខ្លួនចោររូបនេះបានភ្លាមៗ និងបានទូរស័ព្ទទៅប្រាប់នគរបាលឱ្យមកនាំខ្លួនយកទៅកាន់ប៉ុស្តិ៍ទំនប់ទឹកផងដែរ។
បន្ទាប់ពីបាននាំខ្លួនជនសង្ស័យជាចោលួចម៉ូតូបានហើយ គេបានឃើញមានឧបករណ៏សំរាប់កាច់ករម៉ូតូជាដែករាងអក្សរតេមួយផងដែរនៅនឹងដៃរបស់ជនសង្ស័យ ដោយសំអាងទៅលើវត្ថុតាងនិងបានធ្វើសកម្មភាពលួចម៉ូតូជាក់ស្តែងនគរបាលប៉ុស្តិ៍ទំនប់ទឹកក៏បានបញ្ជូនខ្លួនគេទៅកាន់អធិការដ្ឋាននគរបាលខណ្ឌចំការមនដើម្បីធ្វើការជាបន្តទៀត។
ចែករំលែកព័តមាននេះ