រាជធានីភ្នំពេញ ៖ ជាធម្មតានៅពេលដែលបុណ្យចូលឆ្នាំបានឈានមកដល់ ប្រជាពលរដ្ឋខ្មែរភាគច្រើនតែងតែនិយមនិមន្តព្រះសង្ឃមកសូត្រមន្តដើម្បីដេញឧបទ្រពចង្រៃដែលកើតមានក្នុងឆ្នាំចាស់ ដោយនាំមកនូវសេចក្តីសុខ សុភមង្គលនៅក្នុងឆ្នាំថ្មី ។
រាជធានីភ្នំពេញ ៖ ជាធម្មតានៅពេលដែលបុណ្យចូលឆ្នាំបានឈានមកដល់ ប្រជាពលរដ្ឋខ្មែរភាគច្រើនតែងតែនិយមនិមន្តព្រះសង្ឃមកសូត្រមន្តដើម្បីដេញឧបទ្រពចង្រៃដែលកើតមានក្នុងឆ្នាំចាស់ ដោយនាំមកនូវសេចក្តីសុខ សុភមង្គលនៅក្នុងឆ្នាំថ្មី ។
អ្នកជំនាញខាងព្រះពុទ្ធសាសនាបានបញ្ជាក់ថា ពិធីសូត្រមន្តលើករាសីនេះបានកើតមានជាច្រើនឆ្នាំមកហើយ ហើយវាក៏ជាប្រពៃណី និងទំនៀមទំលាប់របស់ប្រជាពលរដ្ឋខ្មែរដែលកាន់សាសនាព្រះពុទ្ធ។
ព្រះតេជគុណ ឃឹម សន មេគណរាជធានីភ្នំពេញបានមានពុទ្ធដិកាថា ការនិមន្តព្រះសង្ឃដើម្បីសូត្រមន្តលើករាសីនៅក្នុងថ្ងៃចូលឆ្នាំនេះ គឺជាជំនឿរបស់ដូនតាបន្សល់ទុកឱ្យផង និងជាប្រពៃណីទំនៀមទំលាប់របស់ខ្មែរយើងផង។ ព្រះតេជគុណបានបញ្ជាក់ថា តាមអត្ថន័យរបស់ធម៌ព្រះពុទ្ធ ជនណាដែលបានប្រព្រឹត្តនូវអំពើល្អ គឺតែងតែនាំមកនូវជ័យមង្គល ហេតុនេះការនិមន្តព្រះសង្ឃសូត្រមន្តលើករាសីនៅពេលចូលឆ្នាំឈានចូលមកដល់នេះ គឺមានន័យថា បុគ្គលនោះបានធ្វើនូវអំពើល្អទាំងវាចា និងចិត្ត និងបានឧទ្ទិសកុសលផលបុណ្យដល់បុព្វការីជនដែលបានចែកឋានទៅកាន់លោកខាងមុខ។
តាមការបញ្ជាក់របស់ព្រះតេជគុណ ឃឹម សន ការនិមន្តព្រះសង្ឃសូត្រមន្តលើករាសីនេះ គឺធ្វើឡើងតាមសទ្ធារបស់សាមីខ្លួនចាប់ពី១ទៅ៥អង្គក៏បាន ប៉ុន្តែបើតាមពិធីកម្មរបស់ដូនតាខ្មែរ ពិធីនេះមានទាំងសូត្រមន្តផង រំដោះគ្រោះ និងលើករាសីផង ហេតុនេះទាល់តែនិមន្តព្រះសង្ឃ៥អង្គ ឬអាច៩អង្គទៅ២០អង្គតាមសទ្ធាជ្រះថ្លា៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ